Коми Республикаса Конституция пыртӧм

йылысь

КОМИ РЕСПУБЛИКАСА ЗАКОН

(конституционнӧй)

Коми Республикаса Конституция примитӧмкӧд йитӧдын Коми Республикаса Верховнӧй Сӧвет шуис:

1 статья

Коми Республикаса Конституция, кодӧс примитӧма 1994 вося февраль 17 лунӧ, вынсялӧ сійӧс официальнӧя йӧзӧдан лунсянь, сэтшӧм юкӧнъясысь кындзи, кодъясӧс индӧ тайӧ Законыс.

Тайӧ кадсяньыс Коми Республикаса Конституция (Медшӧр Закон), кодӧс примитӧма 1978 вося май 23 лунӧ да сэсся вӧлі пырталӧма вежсьӧмъяс да содтӧдъяс, воштӧ вынсӧ, 157 да 158 статьяясысь кындзи, кодъяс уджалӧны Коми Республикаса герб да флаг йылысь лӧсялана законъяс примиттӧдз.

2 статья

Коми Республикаса Законъясысь да мукӧд правӧвӧй актъясысь, кодъяс уджалісны Коми Республика пасьта Коми Республикаса Конституция вынсьӧдтӧдз, водзӧ уджалӧны сійӧ юкӧнъяс, кодъяс лӧсялӧны Конституциялы.

3 статья

Коми Республикаса Государственнӧй Сӧветлӧн уджавны заводиттӧдз Коми Республикаса Верховнӧй Сӧвет збыльмӧдӧ Коми Республикаса Государственнӧй Сӧветлысь полномочиеяс, кодъясӧс индӧма Коми Республикаса Конституциялӧн 73 статьяӧн, 1 пунктысь кындзи, коді висьталӧ Конституция примитӧм йылысь, да 6 пунктысь кындзи, а сідзжӧ Коми Республикаса Юралысьлӧн полномочиеяс, кодъясӧс индӧны 85 статьялӧн 2, 8–11, 15 пунктъяс, кытчӧдз оз ло должностьын Коми Республикаса Юралысь.

Коми Республикаса Верховнӧй Сӧветлӧн сессияяс кадколастӧ Коми Республикалӧн Верховнӧй Сӧветса Президиум вермӧ пыртны вежсьӧмъяс Коми Республикаса Законъясӧ, примитны нормативнӧй актъяс сійӧ вопросъяс кузя, кодъясӧс индӧма Коми Республикаса Конституциялӧн 73 статьяысь 3, 4, 17, 18, 24 пунктъясын, та бӧрын найӧс вынсьӧдӧ Коми Республикаса Верховнӧй Сӧвет.

Сы бӧрын, корсянь заводитӧ уджавны Коми Республикаса Государственнӧй Сӧвет, Коми Республикаса дас кыкӧдысь бӧрйӧм Верховнӧй Сӧветлӧн, сылӧн органъяслӧн полномочиеяс, а сідзжӧ Коми Республикаса народнӧй депутатъяслӧн, кодъясӧс бӧрйӧма 1990–1993 воясын, полномочиеяс помасьӧны.

4 статья

Коми Республикаса Юралысьлӧн должностьӧ боссьытӧдз государственнӧй властьлӧн медвылыс исполнительнӧй да распорядительнӧй органлысь полномочиеяссӧ, кодъясӧс индӧма Коми Республикаса законодательствоӧн, а сідзжӧ Коми Республикаса Конституциялӧн 85 статьяысь 1, 3–6, 8, 12, 13 пунктъясын, пӧртӧ олӧмӧ Коми Республикаса Министръяслӧн Сӧвет.

Коми Республикаса Министръяслӧн Сӧвет сетӧ ассьыс полномочиеяссӧ Коми Республикаса Юралысьлы сы бӧрын, кор сійӧ босьтӧ должностьсӧ да лоӧ сёрнитчӧма Коми Республикаса Верховнӧй Сӧветкӧд государственнӧй веськӧдлан органъяслӧн тэчасног йылысь.

5 статья

Медым видзны политическӧй зумыдлун конституционнӧй реформа нуӧдігӧн да кольны государственнӧй власть органъяс уджын лӧсьӧдӧм туйвизь да йитӧдъяс, Коми Республикаысь Государственнӧй Сӧветса депутатъясӧс бӧрйӧны Коми Республикаса Юралысьлӧн уджӧ боссьӧм бӧрын квайт тӧлысь мысти.

6 статья

Коми Республикаса Юралысь, кодӧс бӧрйӧма медводдзаысь, сетӧ Коми Республикаса Верховнӧй Сӧвет водзын присяга.

7 статья

Коми Республикаса Юралысьлӧн уджӧ боссьытӧдз Коми Республикаса законъяс кырымалӧ да йӧзӧдӧ Коми Республикаысь Верховнӧй Сӧветса Веськӧдлысь; Коми Республикаысь Верховнӧй Сӧветса Президиум сетӧ Коми Республикаса государственнӧй наградаяс да почётнӧй нимъяс.

8 статья

Коми Республикаса Конституционнӧй надзор комитетлӧн полномочиеяс кольӧны Коми Республикаса Конституционнӧй Суд бӧрйытӧдз.

9 статья

Районъясса, республиканскӧй тӧдчанлуна каръясса да карын районъясса меставывса представительнӧй власть органъяс бӧрйӧм бӧрын Коми Республикаса Конституция серти Коми Республикаын народнӧй депутатъяслӧн став тшупӧдса местнӧй Сӧветъяслӧн уджыс дугӧдсьӧ да местнӧй Сӧветъясса депутатъяслӧн полномочиеяс помасьӧны.

Коми Республикаса Юралысьлӧн уджӧ босьтчан лунсянь меставывса администрацияяс пырӧны государственнӧй веськӧдлан органъяс системаӧ.

10 статья

Тайӧ Конституциялӧн 48 статьяысь коймӧд юкӧныс вынсялӧ Федеральнӧй Закон пыртӧм бӧрын, коді индас, кутшӧм лӧсялана гражданскӧй службаӧн позьӧ вежны военнӧй служба.

11 статья

Федеральнӧй Закон пырттӧдз, коді индас присяжнӧй заседательяс дырйи судӧн делӧяс видлаланног, Коми Республикаын кольӧ судӧн делӧяс видлалан воддза пӧрадок.

12 статья

Кытчӧдз Российскӧй Федерацияса уголовно-процессуальнӧй законодательство оз ло лӧсьӧдӧма Российскӧй Федерацияса Конституция серти, Коми Республикаын воддза ногӧн арестуйтӧны, видзӧны стража улын да кутӧны йӧзӧс, кодъясӧс чайтӧны мыж вӧчысьясӧн.

13 статья

Февраль 17 лун — Коми Республикаса Конституция примитан лун — шуӧма праздникӧн.

Коми Республикаысь Верховнӧй Сӧветса Веськӧдлысь

Ю. Спиридонов

Сыктывкар

1994 вося февраль 17 лун.

№XII-18/9