ПАЛАДДЯ ПЕТРОВНА

Палладий Петрович Курьянов, ыджыд ён туша да кудриа тошка дядьӧ, пукаліс ӧшинь дорын да видзӧдіс колхознӧй видзьясвывса зорӧдъяс вылӧ. Ок и зорӧдъяс! Мичаӧсь, ыджыдӧсь, вежӧсь! Курьянов рытбыд ньылаліс дульсӧ да нюліс вом доръяссӧ.

Колхозникъяс эштӧдісны татысь турун пуктӧм да ӧні уджалісны кӧнкӧ ылын. А Курьяновлӧн дум вывсьыс эз вунлыны кос туруна зорӧдъясыс. Позис кӧ эськӧ кыскыны керка дорас кӧть нин ӧти зорӧд. Войбыд эз узь Палладий, гыжъяліс — малаліс кудриа тошсӧ, думайтіс. Чеччис шонді петігӧн да тувкнитіс гӧтырыслы бӧкас.

— Сувт да вайлы меным сарапантӧ!

— Йӧймис, коньӧр! — повзис гӧтырыс. — О, господи!

— Пельтӧммин али мый! — равӧстіс Курьянов да кыскис гӧтырсӧ вольпась вылысь.

— Сарапантӧ, мися, вай!

— Мыйнӧ нин тэкӧд, бласлӧ кристос, лои, Паладюшко? — бӧрддзис гӧтырыс.

Курьянов видзӧдліс повзьӧм гӧтырыс вылӧ да кватитчис: «Сійӧ жӧ оз тӧд, мыйла колӧ меным сарапаныс!»

— Эн пов, нинӧм оз ло... Кӧсъя видзьяс вылӧ ветлыны да видзӧдлыны, кыдзи-мый чӧвтӧмаӧсь. Гашкӧ зорӧдъяссӧ кытсюрӧ лӧсьӧдыштны колӧ, — жеркнитіс паськыд пиньяссӧ Курьянов. — А кыдзсюрӧ пасьтасьӧмӧн оз позь мунны тӧдмаласны...

Палладий сюйис зептас сарапан да чышъян, сэсся босьтіс куран да вуджис ю вомӧн. Бауӧн кыссис бадьяс увті да крыса моз кыйкнитліс эрд вылӧ, кӧні сулаліс ыджыд зорӧд. Кӧть шондіыс и вылынкодь нин вӧлі, но видз вылын некод эз вӧв: мӧдлаын йӧзыс уджалісны.

— Мисьтӧм тай зорӧдыс, — син пӧвсӧ чикыртліс Курьянов. — Сыныштам кӧ сэки том ныв кодь мича лоӧ. Хи-хи-хи!

Палладий сарапанасис да чышъянасис, сэсся рӧдтіс зорӧдлань.

— Сыныштам ми сыныштам,

Сёйыштам да юыштам! — мургис вомгорулас Палладий да зіля сыналіс зорӧдсӧ. Дженьыдик кадӧн лэдзис зорӧд бокъясысь нӧб дас!

— Вот тадзи колӧ уджавнысӧ! И зорӧдыс мича лои и оз тӧдчы, мый гусялӧма. — нюлыштіс нырувсӧ Курьянов.

Зорӧдсӧ гӧгӧрбок сыналӧм — нетшкӧм бӧрын сійӧ зэв ӧдйӧ вӧчис пывсян ыджда нӧб да котӧртіс бадьяслань. Асывбыд пышйӧдліс турунсӧ Курьянов. Сэсся вӧчис бадьяс костӧ мичаник зорӧд да меліа малыштіс сійӧс:

— Вот и чӧвтыштім, вот и миян турунтор эм! Ог кӧ дышӧдчы да мичмӧдышта матігӧгӧрса зорӧдъяссӧ — мӧслы тырмас дай вузыштны на позяс турунторсӧ...

Ставыс муніс лючки — ладнӧ, но дас сизимӧд нӧб пышйӧдігӧн делӧыс дзугсис. Пошиктырйи пырис Палладий кустъяс пытшкӧ, а сэні вугыр шатина том морт сулалӧ! Паладийлӧн уси нӧбйыс.

Том морт ёна шензьӧмӧн видзӧдліс сарапана да чышъяна уска-тошка дядьӧ вылӧ да юрсӧ чатӧртӧмӧн гора серӧктіс: — Паладий Петрович? Ха-ха-ха! Да ӧд тэ ӧні...Хо-хо-хо! Тэ ӧні Паладдя Петровна. Ха-ха-ха!