ТШАПМӦМА

Збодер Вась шойччан лунӧ вольскӧбтіс да коксӧ ёнакодь дойдіс. Гипсуйтісны да нуисны гортас. Шойччыны пӧ ковмас тӧлысь кымын.

Шензяна кӧть абу, а гӧтырыс радлӧ:

— Сідз тэныд и колӧ! Этшаджык юан ӧні!

— Ладнӧ, Груня! Ӧдва верми ветлыны мыссян доз дорӧ, а тэ килькъялан!

— Сьылідзирйыд кӧ чеги, нӧшта на эськӧ бурджык вӧлі да, — ышловзис гӧтырыс. — Мый нажӧвитлан — ставсӧ юан дай менсьым на дзайган. Челядьыд бать пыдди оз нин и пуктыны.

Вась нинӧм эз шу. Кор гӧтырыс муніс удж вылӧ, грекӧн сорӧн петаліс посводзӧ, кӧні ӧшаліс фуфайкаыс. Веськыд соспытшкӧсса гуся зептысь кыскис вит шайтаяс. Уджйӧз мынтыны лӧсьӧдӧма вӧлі. Ладнӧ, нӧрӧвитласны... Ӧти вит шайта сюйис зептас, мукӧдсӧ бӧр дзебис.

Груня локтіс ӧбедайтны.

— Кокӧй зэв ёна висьӧ, Грунюшка, — нор гӧлӧсӧн шыасис Вась. — На, со вит шайт, пӧлучкаысь кольӧма вӧлі. Котӧртлы дозла, гашкӧ кокниджык лоӧ...

Гӧтырыс нинӧм эз шу, босьтіс ведра да муніс.

«Сур, буракӧ, кӧсйӧ ньӧбны, — дӧзмыштіс Збодер Вась. — Но ладнӧ, сур кӧ и сур».

Недыр мысти гӧтырыс вайис ведра тыр... йӧв.

— Кӧдзыд йӧвсӧ зэв ёна радейтан да, мися, унджык и ньӧба. Сдача вылас со папирос вайи.

Груня малыштіс верӧссӧ юрӧдыс:

— Ю, Васенька, мыйта верман, а кольӧ кӧ да шоммас — блинъяс пӧжалам.

Вась весиг эз вермы скӧрмыны гӧтыр вылас, сэтчӧдз чуймис: збыльысь ӧмӧй водка доз пыдди позьӧ ньӧбны ведра йӧв дай сдача на кольӧ?!

Вӧчны нинӧм, кок пӧвнад ылӧ он чеччав. Вась юис йӧв да малаліс кынӧмсӧ. Но мӧд луннас, гӧтырыс мунӧм бӧрын, бара кыскис гуся зептысь вит шайт да мыччис пӧрысь суседкаыслы: доз пӧ вай, коркӧ, гашкӧ, пестӧ бара на поткӧдлышта.

— Кокыд ёна висьӧ? Но бурдас, бурдас, бур пи, бласлӧ-праслӧ...

Вась радлігтырйи виччысис суседкасӧ, но сыкӧд, вӧлӧм, вевъялӧма нин сёрнитыштны Груня, и пӧрысь нывбаба вайис... ветымын кольк!

— Сёй, Вася, на здоровье, збодерджык лоан, бласлӧ-праслӧ, дай кокыд ӧдйӧджык бурдас.

Бӧрд кӧть матькы. Скӧрмӧм Вась юис дас кымын кольк. Сьӧлӧм вылас кокниджык лои.

Рытнас Груня тӧждысьӧмпырысь юаліс:

— Мый, Васенька, гашкӧ, он нин сэтшӧма вись?

Диван вылын куйлысь Вась бергӧдчис мышкӧн да нурбыльтіс:

— Ладнӧ! Верӧсыд ӧдва ловъя, а ті килькъяланныд...

Груня ноксьыштіс плита дорын да вайис калбасӧн жаритӧм яичница, тасьті тыр пӧсь блинъяс да кӧдзыд йӧв.

— Ужнайт, Васенька, да бура узь.

Збодер Вась ышловзис. Блинъяс сёйигмоз сійӧ мӧвпаліс олӧм-вылӧм йылысь. Ладнӧ, ёна шогсьыны нинӧмла: фуфайка сос пытшкын коли на кык вит шайта!

И со Васьӧ пукалӧ ӧшинь дорын да мӧвпалӧ: «Вот ӧд кыдзи овлывлӧ олӧмад: и сьӧмыд эм, а дозйыд абу!»

Ӧшинь улын гигзисны да ислалісны челядь, коді лызьяс вылын, коді даддьӧн, а эсійӧ со зыр вылӧ пуксьӧма да тӧвзьӧ. Шум, серам.

«Челядьлы дозтӧ оз сетны, кӧть и ыстылан эськӧ да, — ышловзис Вась, — ковмас аслым ветлыны. Ладнӧ, исковтлам!» Шоныда тӧбис гипсуйтӧм коксӧ, пасьтасис да горӧдіс форточка пыр:

— Шурик, Ваньӧ, Петьӧ, Васьӧ! Пыралӧй!

Детинкаяс пырисны, пошиктӧны.

— Кокӧй зэв ёна висьӧ, пиянӧй, терпитны ог вермы. Хирург дорӧ ветлыны колӧ...

— Да ми, дядя Вася, ӧти здукӧн лэбовтӧдам! — горӧдісны челядь. — Лок, отсалам петнытӧ.

— Ладнӧ, бур пиян.

Васьӧс лым-бус тӧвзьӧдісны мир туй кузя. Виннӧй лавка дорӧ воигӧн висьысь збодермис:

— Тпру-у! Папиросла колӧ пыравны. Тэ, Шурик, збойджык, ньӧб.

Мыччис вит шайта.

— Оз сетны миянлы...

— Сетасны. Шу: дядя Вася тшӧктіс. Гӧтырлӧн чойыс тані уджалӧ. Со, аддзис нин ӧшинь пырыс. Сдача вылас водка ньӧб. Шу: хирург пӧ тшӧктӧма кок лапа вылӧ компресс пуктыны, мед ӧдйӧджык бурдас.

Дозсӧ питшӧгас дзебӧм бӧрын Вась тшӧктіс:

— Ӧні — гортӧ!

— А хирург дорад нӧ?

— Ладнӧ, кокниджык нин лои. Кор ковмас — асьныс воласны.

Ставыс эськӧ ладмис, но ӧтилаын ӧшыбка лои. Делӧыс сыын, мый Груня сёрнитӧма чойыскӧд. Менам Васенька вермас пӧ и суседкасӧ ыстывны, и челядьӧс, и весиг ачыс кынӧм вылас кыссьылас винаыдла. Казялан кӧ, мый дозсӧ ньӧбӧны верӧслы, сет пӧ со тайӧс. И мыччас чойыслы мичаа пробкаалӧм ва тыра сулея, кытчӧ курзьӧдӧм могысь сӧмын вӧлі чольснитӧма водкасӧ.

— Бара нин код! — шензис рытнас Груня. — Тэныд гортад кӧ нин ваялӧны-а?

Верӧсыс зумыша чӧв оліс, гӧтырыс муртса кутіс нюмсӧ.

Асывнас Груня чеччис водз, быдсяма чӧскыдторъяссӧ пуис-пӧжаліс, жаритіс-пражитіс.

Вась кыліс кухняысь петысь чӧскыд дукъяс да чеччис жӧ. Дульсӧ ньылалӧмӧн сійӧ видзӧдіс гӧтырыслӧн ноксьӧм вылӧ.

— Тэкӧд позьӧ эськӧ овны да, — нюмъёвтіс Вась.

— Лок сёйышт мыйкӧ, — серӧктіс Груня, — со, ставыс зэв чӧскыд.

Верӧсыс мыччис сылы медбӧръя вит шайта.

— Бара водка? — пыр жӧ гажтӧм лои Груня. Вась малыштіс гӧгрӧсмӧм кынӧмсӧ.

— Оз ков, пӧжалуй. Ладнӧ, ньӧб ведра джын йӧв.

Груня окыштіс верӧссӧ:

— Вая ме тэныд бутыль-мӧд яблочнӧй сок.

— Ладнӧ, сок кӧ и сок.

Гипс шедӧдігӧн сестра ошкыштіс Васьӧс:

— Ёнмыштӧмыд, мичаммӧмыд. Но, сэсся бура ов да уджав.

— Ладнӧ...

Гипс босьтӧм бӧрын Вась оліс гортас нӧшта вежон кымын. Эскӧй кӧть эн, тӧлысь чӧж мортыд эз видлы курыд зеллятӧ, и со, ловйӧн коли!

Больничнӧй лист вылӧ сетісны вель уна сьӧм. Виннӧй дорын Вась сувтовкерис. Пыравны кӧ-а? «Ӧти дозтӧ позьӧ, дерт, ньӧбны, — быттьӧ шӧпкӧдіс сылы кодкӧ. — Абу ӧд шутка: тӧлысь чӧж эн исыштлы. Уджалан кадӧ вӧлі юлывлан, а ӧні ӧд рыт! Босьт, небзьӧдышт сьӧлӧмтӧ...»

Дум вылас уси гӧтырыс, коді бӧръя кадӧ век вӧлі долыд чужӧма да мелі, весиг томмыштіс быттьӧ. Вась падъяліс. Тайӧ катласьысь ёсь здукас кодкӧ небыда кутчысис сылы сояс.

— Васенька, лок мунам гортӧ. Ньӧби со дас бутылка зэв чӧскыд ырӧш.

Вась серӧктіс, ӧвтыштіс кинас, и гозъя збодера мӧдӧдчисны гортлань.

Некымын лун мысти аванс сетісны. Ёртъясыс гортӧ эз тэрмасьны, кыдзи и пыр татшӧм шуда лунъясӧ, ньӧбисны водка, пырисны шонтысян будкаӧ. А Вась гусьӧник мӧдӧдчис гортас.

— Тэ нӧ кытчӧ? — горӧдіс чивгысь Ёгор.

— Гортӧ.

— Солькнитыштам да тшӧтш мунам!

— Оз ков мыйкӧ...

— Кыдзи «оз ков»? Водкатӧ ӧд оз ков нямлявны, гулькнит сӧмын! Лок пыр, пуксьы!

Вась ӧвтыштіс кинас: ладнӧ пӧ, ті кыдз кӧсъянныд, а ме муна.

— Ті видзӧдлӧй сы вылӧ, другъяс! — горӧдіс Ёгор да ёрччыштіс: тшапмӧма!

Ёртъясыс петісны ывлаӧ.

— Лешак сыкӧд, мед мунӧ! — шуис кодкӧ. Ёгор чилӧстіс:

— Мӧдысь бӧрдӧмӧн кутас корны-дзайгыны — ӧти войт ог сетӧй!

— Эн чивгы, Ёгор! Тэнсьыд ог кор, эн пов. Сэсся, ёртъяс, мыйла нӧ ме водка юа, гортын кӧ эм быдсяма сокыс, йӧв, компот да ырӧш? Тӧлысь эг ю. Челядь со бурджыка кутӧмаӧсь велӧдчыны, а гӧтыр йылысь он нин и сёрнит: том ичмонь кодь мелі да шань лои... А юнытӧ, Чивгысь Ёгор, тэ серти дас пӧв унджык юи. Став тыртӧм дозъяссӧ кӧ ӧтлаӧ чукӧртны да сывдны, то метр кызта стенъяса кык судта стекляннӧй керка позис нин эськӧ кыпӧдны.

Ызӧбтіс серам.

— Мунамӧй гортаныд, мужикъяс!

Ёртъясыс видзӧдлісны ӧта-мӧд выланыс.

— Еджыд рака, — нурбыльтіс Ёгор да пырис будкаӧ. Но «еджыд рака» бӧрся мыйлакӧ вӧтчисны кык-ӧ-куим «сьӧд рака».

Ӧти кывйӧн кӧ, вель топыд коллектив аванс лунӧ шӧри поті. Мый бара лоӧ пӧлучка дырйиыс-а?..