КУЗЬКИНЛӦН ПЫВСЯН

Кузькин ёрт бара шнёпкысис юрнуӧдан креслӧ вылысь. Эз, дерт, прӧстаысь: дженьыдик кадӧн сійӧ торкис ладсӧ вель бур предприятиелысь.

Шойччыштіс мортыд, и со сійӧс индісны ыджыд пывсянӧ директорӧн. «Зэв бур удж, сӧстӧм! — радпырысь ниртыштіс ныр боксӧ Кузькин. — Кӧть лунтыр швачӧдчы корӧсьӧн дон мынтытӧг!»

Выль веськӧдлысь мӧвпалігтыр ветлӧдліс олӧма банщицакӧд, Анна тьӧткӧд, пывсян жыръясті.

— Абу ставыс лючки, — довкйӧдліс юрнас Кузькин. — Шуам, талун ме кабинетын «майтӧгалі» сьылісӧ юысь кочегарлысь, а аски сыкӧд жӧ ӧтлаын пывсям? И кыкнанным пасьтӧмӧсь! Кутшӧм нӧ менам сэки авторитет лоӧ? Оз ло. Руководстволы некутшӧм торъя жыр абу лӧсьӧдлӧмаӧсь! А ӧд райцентрад эмӧсь меысь на гырысьджык веськӧдлысьяс. Налы, думайтан, зэв долыд пасьтӧг бергавны уджалысь йӧз водзас?

— Век тадзи вӧлі, некод эз норасьлы, — ышловзис Анна тьӧт. Кузькин ниртыштіс ныр боксӧ:

— Некод эз норасьлы, но некод эз и ошкы татшӧм пӧрадоксӧ. Колӧ мыйкӧ выльтор лӧсьӧдны...

Недыр мысти пывсян бердын пансис стрӧитчӧм. Мед ӧдйӧджык эштӧдны уджсӧ, Кузькин ыстывліс сэтчӧ и ассьыс йӧзсӧ. Пывсянлӧн уджыс торксис. Заводитчисны норасьӧмъяс, дугдывтӧг триньгис телефон.

— Алло! Талун пывсяныс уджалӧ?

— Уджалӧ, — мудзӧмпырысь вочавидзис Кузькин. — Ми лун и вой уджалам, весиг аслыным некор пывсьыштны.

— Пывсян? Мыйла пӧсь ваыс кӧдзыд?

— Пывсян?

— Да, Кузькин кывзӧ.

— Тэ кузькина мать, а абу Кузькин! Кӧні корӧсьыд?

— А кос гӧлик тэныд оз ков?! — ёрччыштіс директор да пуктіс трубкасӧ.

— Алло, пывсян?

— Да, пывсян! — дзикӧдз скӧрмис юралысь. — Босьт корӧсьтӧ да лок! Тазйыс пӧрччысян шкап вылын, мед сійӧ троньгысяс юр вылад!

— Алло, тайӧ пывсян?

— Абу, тайӧ абу пывсян! — равӧстіс Кузькин.

— А мый нӧ?

— Морг!

— Мы-ый?!

— Морг! Лок ӧдйӧджык, виччысям!

Проводлӧн мӧдар помас тшӧкмунісны. Кузькин шпыньмуніс: со пӧ ӧти виньдіс жӧ.

Но коркӧ-некоркӧ и стрӧитчӧмыд эштіс. Кузькин долыдпырысь гӧграліс выль жыръясті, любӧпырысь пукыштіс шойччан жырйын. Небыд диван, креслӧяс, буфет, холодильник, вазаясын дзоридзьяс. Райцентрса гырысь йӧз лоӧны радӧсь. Налы жӧ и лӧсьӧдӧма и телефон. Зэв вермас лоны, мый корӧсясьӧм бӧрын воасны юраныс югыд мӧвпъяс, и позяс веськыда пывсянсянь сетавны кутшӧмсюрӧ индӧдъяс. Либӧ гӧтырыслы звӧнитласны: сідзи и сідз, пывси-мысси, самӧвар пукты, дозла ветлы.

Пекнича рытӧ Кузькин тшӧктіс юӧртны радио пыр: выльмӧдӧм пывсян дась! Субӧтаӧ да вӧскресенньӧӧ позьӧ корӧсясьны лун шӧрсянь вой шӧрӧдз, мукӧд лунъясӧ — дас час рытӧдз, выльлунӧ — пӧдса.

Выль жырйӧ пыранінӧ Кузькин ӧшӧдіс ичӧтик гижӧд: «Служебнӧй».

— Став начальствосӧ бура тӧдан? — юаліс Кузькин Анна тьӧтлысь.

— Тӧдтӧг ог ов, нэмсӧ тані уджала да.

— Сӧмын татчӧ лэдзав. Смотри, эн сорсьы!

Субӧтаӧ Кузькин босьтіс корӧсь да муніс пывсьыны.

«Ок, и чӧсмасьышта жӧ талун выль пывсянын! — мӧвпаліс сійӧ. — Гырысь йӧзкӧд ӧтлаын. Гашкӧ, Петровичлысь на мышсӧ корӧсявны сюрас...»

«Служебнӧй» гижӧдыс ӧдзӧсын эз вӧв, но тайӧ эз падмӧд Кузькинӧс.

— Чолӧм, ёртъяс! — долыдпырысь горӧдіс сійӧ пыригмозыс. — Ме чайта...

Мый чайтіс Кузькин ёрт, ӧнӧдз ачыс оз тӧд.

— Мый тэныд татысь колӧ, дурак?! — горӧдіс мичаник дзик пасьтӧм нывбаба.

— Дядя пырис! — чилӧстіс ичӧтик нывка.

Кельдӧдӧм директор грекӧн сорӧн петіс бӧрӧн да тіралысь кияснас ӧдва вермис пӧдлавны ӧдзӧссӧ.

Вӧлӧмкӧ, ачыс Петровичыд локтӧма пывсьыны медся водз. Анна тьӧт пыртӧдас сійӧс выль жыръясӧ: мед пӧ видзӧдлас. Петровичлы ставыс зэв ёна воас сьӧлӧм вылас. Молодеч пӧ Кузькин, зэв бур жыръяс лӧсьӧдӧма челядя мамъяслы. Шуас тадзи дай пырас, кыдзи и водзсӧ, ӧтувъя пывсянӧ.

«Вот сэсся и вӧч йӧзыдлы буртӧ! — шога ышловзис Кузькин. — Руководящӧй ёртъяс шусьӧны... Эк!»