ГӦСТЬЯС
Митипӧр гозъя олӧны карын. Митипӧр инженералӧ, а Дуня бухгалтералӧ. Куим во ӧтлаынӧсь, а челядь абу на. Дуня шуӧ: нинӧм пӧ, удитам на.
Кӧнкӧ сиктын эм Дунялӧн мам. Нылыс абу на вунӧдӧма пӧрысьӧс: быд выль во заводитчигӧн ыстӧ телеграмма да вит шайт деньга.
Мӧд том гозъя, Ваня да Сима Саковъяс, тӧрыт локтісны на ордӧ гӧститны. Ваня да Митипӧр — рӧднӧй вокъяс.
— Донаясӧй! — пӧся окаліс гӧстьясӧс Дуня воиганыс, а рытнас шӧпкӧдіс верӧсыслы: — Быд праздник локтӧны... Асьныс ӧтчыдысь на эз корлыны...
— Но ӧд гожӧмнас ми дзонь тӧлысь на ордын олім, — шуис Митипӧр.
— Мый нӧ кӧть! Сиктад ставыс ачыс быдмӧ, а оз ков ньӧбны. Ветлӧны сэні... Некутшӧм бурджык пӧдарок эз вайны ни... А кутшӧм уна сёйӧ гӧтырыс! А вокыд! Коньяк бутылкасӧ пӧшти ӧтнас ректіс.
— Ачыс ӧд тай вайис! — дӧзмис Митипӧр.
— Мый нӧ кӧть! Сьӧмга вайлісны да асьныс жӧ и сёйисны. Кутшӧм йӧз! Ӧти сайын нӧшта бать-мамсӧ вайӧдны колӧ вӧлі!
— Дугды, Дуня! — ӧлӧдіс Митипӧр. — Яндысь, абу мича тадзи. Аслам жӧ рӧднӧй вок!
— Мый нӧ кӧть!..
Дыр броткис Дуня, а орчча комнатаӧ узьны водӧм Ваня ставсӧ кывзіс. И рад эськӧ вӧлі не кывзыны, но кыліс. Бур кӧть сійӧ, мый гӧтырыс узьӧ, нинӧм оз кыв. Крут характера Сима эськӧ пыр жӧ пасьтасис да муніс.
Асывнас Ваня да Сима чеччисны водз. Дуня меліа нюмъяліс налы. «Ладнӧ, Дунюшка, — гажаа думайтіс Ваня, — лӧсьӧда ме тэныд рыт кежлас пӧдарок!»
Ваня ветліс почта вылӧ да ыстіс телеграмма: «Талун жӧ локтӧй, папа да мама, дед да баб». Сэсся медаліс такси, сетіс адрес да ыстіс таксисӧ сиктӧ.
Том гозъяяс юыштісны, сьылыштісны да йӧктыштісны. Ваня частӧкодь видзӧдлывліс часі вылӧ.
— Кытчӧкӧ тэрмасян, Ваня? — мела юаліс Дуня.
— Виччыся гӧстьясӧс, — очсыштіс Ваня.
Дунялӧн паськаліс вомыс. Шензьӧмӧн видзӧдліс верӧсыс вылӧ и Сима:
— Тэ, Ваня, гажа али мый? Кутшӧм гӧстьясӧс виччысян? Тэ ачыд гӧсть.
— Виччыся тай, — нюмъёвтіс Ваня. — Мед Дунялӧн коньякыс оз шоммы...
Митипӧр серӧктіс, выльысь кисьталіс румкаясӧ.
Рытланьыс ӧдзӧсӧ таркнитісны. Пырисны кыкӧн: бать да мам.
— Мыйла нӧ коринныд? — юаліс неуна повзьӧм чужӧма мам. — Мыйкӧ лои?
— К-коді корис? — шӧйӧвоши Дуня.
Ӧдзӧс бара воссис. Пырисны баб да дед.
— А вот и ми! — гажаа юӧртіс дед.
— Господи! — шӧпнитіс Дуня да муртса садьтӧг эз усь: «Сёясны ӧні ставсӧ!»
Гӧстьяс олісны кык лун. Дуня пыр вӧлі зумыш.
Мунӧм водзвылын гӧстьяс мыйкӧ шӧпкӧдчыштісны, сэсся дед юӧртіс: гӧгӧртыштам пӧ карса магазинъясті да вӧлись мунам. Пӧрысьджык гӧстьяс петӧм бӧрын Ваня шуис:
— Тэ, Митипӧр, эн ӧбидитчы... Та ыджда аравасӧ ӧд вердны да юктавны колӧ. А аппетитъяс миян, кыдзи казяліс Дуня, бурӧсь. Пасибӧ тіянлы ыджыд. Выль во дырйи волӧй миянӧ. Карын моз, дерт, гашкӧ, ог вермӧй гӧститӧдны, но мыйсюрӧ и миян эм. Сиктад ӧд, асьныд тӧданныд, ставыс ачыс быдмӧ. Ньӧбны оз ков.
— Ваня! — горӧдіс Митипӧр. — Тэ йӧймин али мый?
Дуня пӧсявтӧдзыс гӧрдӧдіс. Тайӧ здукас пырис ыджыд нопъя дед.
— Уп! Ӧдва кыски...
Дед ректіс нопсьыс калбас, консерв банкаяс, чери, вина бутылкаяс. Дуня повзьӧмӧн видзӧдіс дед вылӧ, эз тӧд, мый вӧчны.
— Солыс, пӧжалуй, унджык ньӧбсис: та мында сов кык лунӧн эг вевъялӧй сёйны, — довкйӧдлыштіс юрнас дед да шняпкис пызан шӧрӧ пуд джынъя сов мешӧк. — Но нинӧм: совнад рокыд оз тшык...
Ваня да Митипӧр эз вермыны кутчысьны да серӧктісны. Дуня ӧдйӧ петіс мӧд жырйӧ.
Пошкигтырйи пырис баб. Сійӧ ньӧбӧма базар вылысь кык ведра картупель.
Гӧстьяс мунӧм бӧрын Митипӧр юрас кутчысьӧмӧн ветлӧдліс джодж кузя, а Дуня курччаліс вом дорсӧ да эз лысьт видзӧдлыны верӧсыс вылӧ.
— Мый нӧ вӧчны, Митипӧр? — дыр чӧв олӧм бӧрын мыжа гӧлӧсӧн юаліс Дуня. — Гашкӧ, пӧсылка ыстам да?
— Кутшӧм пӧсылка? Совсӧ да картупельсӧ али мый сэтчӧ сюялан?
— Совсӧ да картупельсӧ ог, а мукӧдсӧ. Оз ӧд, кӧнкӧ, бӧр ыстыны? А, Митипоша?
Митипӧр серӧктіс:
— Пӧжалуй, тэ прав. Валяй!
