КОМАНДИРОВКА

Жмот Ваньыд вӧвтӧ доддявны ни лэдзавны оз куж. Дай абу и дивӧ: нэмсӧ пукалӧма контораын.

Ӧтчыд арын, лымъя туй кузя нин, ми мӧдӧдчим сыкӧд райцентрӧ. Верст нелямын мунім нин лёкиник туйӧд дай мӧд сы мында лоӧ на районнӧй центрӧдзыд. Вӧвтӧ, дерт, шойччӧдыштны колӧ, дай аслыным оз мешайт мыйкӧ вомӧ сюйыштны.

Сувтім сиктӧ.

— Тэ ноптӧ босьт да пыр, — шуи ме Ваньлы, — тшӧкты самӧвар пуктыны, а вӧвнас ме ачым нин...

Лэдзалі вӧв, сеті сылы турун, сэсся дыркодь малалі корадодь пыдӧс, корси сёян тыра сумкаӧс. Гӧтыр сэтчӧ мыйкӧ унатор лӧдіс. Пуӧм яй пуктіс вӧв юр кодь тор: кузь туяд пӧ ставыс изсяс. Но кӧні нӧ сумкаӧй? Гашкӧ, инӧ, ёртӧй пыртіс? Тэрмасьӧмӧн пыри керкаӧ.

— Сумка? Кутшӧм сумка? — гӧгрӧстіс синъяссӧ Жмот Вань.

Вот тэныд и на! Кынӧм кутіс сюмавны тӧдчымӧн ёнджыка. «Но ладнӧ, — думайта, — Ваньлӧн нопйыс зэв сьӧкыд, позьӧ и отсыштны кокньӧднысӧ».

Пуксим чай юны. Вань кыскис нӧк тыра банка, калбас да пыж ыджда черинянь.

— Быдсяма дивӧыд овлывлӧ жӧ! — шензьышті ме ас вылӧ: — Сёян тыра сумкаыд вунӧ!

Жмот Вань нинӧм эз шу. Шӧраліс калбас, чунь кызта мавтіс выйӧн нянь шӧрӧм да черинянь вундігмоз, ышловзис:

— Да-а, сьӧкыд кузь вылад, сёянторйыд кӧ абу.

Ме радлышті: вот, мися, прамӧй мортыд тай гӧгӧрвоӧ. Нюжӧді киӧс чериняньлань, но Ваньыд кызӧктіс да кыскыштіс сійӧс асланьыс.

Жмот Ваньлӧн вӧрисны пельясыс... Ышловзи, кисьті аслым чай. «Ладнӧ, Жмот Вань, коркӧ асьтӧ тадзи жӧ гӧститӧда!»

Аттьӧалі пӧрысь кӧзяйкаӧс да чеччи пызан сайысь, весиг эг видлы пызан вылӧ вайӧм сола тшаксӧ.

— Бура ӧд и сёйсьӧ ывла вылад олӧм бӧрын! — Ыджыда горзьӧдіс Жмот Вань да малалыштіс гӧгрӧсмӧм кынӧмсӧ: — Весиг дивӧыд босьтӧ! А чайтӧ ме ог любит: мый пӧльзаыс пӧсь васьыд?

Ме чӧв олі.

Час-мӧд мысти мӧдӧдчим водзӧ.

— Пуксьы водзас да вӧтлы вӧвсӧ, — скӧракодь шуи Ваньлы. — Тэнад кынӧмыд пӧт.

Вань броткыштіс да дышпырысь кутчысис вӧжжиӧ. Недыр мунӧм мысти ывлаын дзикӧдз пемдіс, весиг вӧв бӧжыс омӧля тыдаліс. Додь дзуртӧм шы улӧ дыркодь вугралі. Кынӧмӧй важ мозыс гажтӧма гургис. «Кыдз эськӧ солыштны Жмот Ваньлы?» — мӧвпалі ме. Недыр мысти кыпӧдчышті да тӧждысьӧмӧн шуи:

— Мыйкӧ тай мегырыс зэв улын, лэптыштны колӧ... Тпру-у!

Сувтім, сулалам...

— А тэ чеччыв, Иван Митрич, нинӧм ӧд он ло, кӧть и зэлӧдыштан чересседельниксӧ!

Жмот Вань мыйкӧ нурбыльтіс да довгис вӧв дорӧ. Ме кыски турун улысь сылысь нопсӧ, кӧртышті корадодь мышкӧ кресталӧм сутугаӧ да скӧра шыаси:

— Но мый нӧ сы дыра маласян, окасян али мый вӧлыскӧд?

— А кӧні нӧ чересседельникыс? Кодӧс зэлӧднысӧ? — кылі шӧйӧвошӧм гӧлӧс.

— Чересседельникыс? Коді бӧж увтіыс мунӧ — сійӧ. Малышт да сюрас ки улад! Эк, тэ! Пуксьы лок, кытысь нин тэныд!

Сувтлі да ноксьышті вӧв дорын.

Час нёль мысти матыстчим Диюр сиктӧ.

— Тані ковмас шойччӧдыштны вӧвсӧ. А тэ ноптӧ эн-ӧ кӧть вунӧд?

— Эг жӧ кӧ-а, — Жмот Вань сюйис кисӧ турун пытшкӧ. Кашкис-кашкис, сюся повзьӧм гӧлӧсӧн шыасис:

— Кӧнкӧ тай нӧ... збыльысь абу, Микулай Степанович?!

Ме очсышті:

— Пуктылін кӧ — некытчӧ лонысӧ.

Диюрӧ сувттӧдз Вань вевъяліс ёнакодь посньӧдны турунсӧ, но нопйыд, дерт, эз сюр. Ёрччигтырйи пырис керкаӧ. Кӧзяиныс, ыджыд тошка Ичӧт Вась, паныдаліс миянӧс зэв бура. Сійӧ буретш вӧлі ужнайтӧ.

— Вай пуксьӧй, пуксьӧй, туй выв йӧз, шонтысьӧй, шойччыштӧй, сёйыштӧй.

Ме, кыдзи важ тӧдса, пыр жӧ пукси пызан сайӧ, а Жмот Вань мыйкӧ нюжмасис, виччысис, буракӧ, мӧдысь корӧм. Ыджыд тошка Ичӧт Вась бергӧдчыліс сыланьӧ, кӧсйысис мыйкӧ шуны, но ме торки сійӧс:

— Митрич дзик на ӧні ужнайтіс да сылы оз, кӧнкӧ, и ков.

— Кӧні ужнайтіс?

— Красноборӧ сувтлім тьӧщаыс дорӧ...

— А-а... Блинъясӧн, сідзкӧ, чӧсмасис.

— Сэтчӧ жӧ мыйкӧ кынӧмнас мучитчӧ, да тэ, Василь Петрович, зэвсӧ сійӧс эн и невӧлит.

Ме лукавиттӧг сёйи-юи, мыйта тӧрис, сэсся пукси Жмот Ванькӧд орччӧн да, папирос ӧзтігмоз, ыджыда горзьӧді:

— А бура ӧд и сёйсьӧ, Митрич, ывла вылад олӧм бӧрын!

Нюжӧдчи диван вылӧ:

— Но, Митрич, кынӧмъясным пӧтӧсь, позьӧ и вугыртлыны час-мӧдтӧ. Мед вӧлыс бурджыка шойччас.

Узьсьӧма прамӧякодь: югдыштӧ нин вӧлі. Кӧзяева пуктӧмаӧсь самӧвар, пызан вылын гӧрдвидзис сьӧмга. Ме син бӧжӧн видзӧдлі ёрт вылӧ, а сійӧ меліа дзоргис вундалӧм чери вылӧ да ньылалыштіс дульсӧ. Вань зэв ёна радейтӧ сола чери, а сьӧмга вылӧ видзӧдігӧн, муртса синваыс оз пет.

Пуксим пызан сайӧ. Ме нюжӧдлі киӧс сьӧмгала да ышловзи:

— Чӧскыд жӧ нин тайӧ чериыс! А вот Митрич миян мыйлакӧ сӧвсем оз радейт некутшӧм чери.

— Но-о? — шензьыштіс кӧзяин.

— Оз. Торйӧн нин сьӧмга оз любит: вывті пӧ госа.

— Хм, — ошкытӧг пыркнитіс ыджыд тошнас Ичӧт Вась. — Кыйнысӧ, кӧнкӧ, оз куж, вот и оз радейт. Мед уджыштӧ миян чери кыян бригадаын, кисьтыштӧ пӧсьсӧ, видлӧ кӧтасьӧм-кынмӧмыслысь кӧрсӧ — сэки велалас сёйны черисӧ...

— А вот чайтӧ сійӧ любитӧ, — нюмъёвті ме, — кӧть сизим стӧкан юас! Ме, шуӧ, чайтӧгыд овны ог вермы.

Яра югъялысь синъяснас улӧ видзӧдлӧмӧн Ваньӧ юис рудзӧг няньӧн чай. Чужӧмыс сылӧн вежласис быдсяма ногыс. Ме весиг повзи, мед кӧть сылӧн збыльысь эз висьмы кынӧмыс ёна скӧралӧм вӧсна.

Райцентрын ми манитчим. Жмот Ваньлӧн нопйыс зэв ӧдйӧ тыртӧммис, кӧть ме сэтчӧ эг и сюйлы нырӧс, сьӧмыс быри...

Гортӧ мунігӧн ме зіля верді сійӧс ньӧбӧм сёян-юанӧн.

Воим сиктӧ.

— Пасибӧ, Микулай Степанович, — корадоддьысь чеччигмоз, шуис Вань.

— Нинӧм вылӧ, — вочавидзи ме да бергӧді вӧлӧс: чужан сиктӧй коли куим километр сайын.

— Пырав чай юны да вӧлись нин мун! — горӧдіс, кылӧ, Жмот Вань.

— Мӧдысь ветлам райцентрӧ да сэки нин! — серӧкті ме да рӧдті гортлань...