ДЕД МОРОЗ СКӦРАЛӦ
Дед Мороз асывсяньыс вӧлі кок йылын. Пемыднас на ломтіс пывсян. Пывсьӧм-мыссьӧм бӧрын Дед мороз топыда ӧбедайтіс, ыджыдысь-ыджыд мешӧкӧ, кытчӧ, ковмас кӧ, позис эськӧ кокнидика сюйны весиг ошкӧс, сюяліс быдсяма пӧлӧс чӧскыдторъяссӧ да мӧвпыштіс: «Водзджык ветла зверъяс да лэбачьяс дорӧ, сёрнитышта накӧд. Йӧзыс менӧ рытланьыс виччысьӧны а ӧні кадыс эм на. Дед Мороз шоныда пасьтасис, босьтіс бедьсӧ да пуксис ракета вылӧ... — Ж-ж-ж...
И со нин Дед Мороз Печора бокын. Пыр жӧ тшӧктіс сизьлы, медым сійӧ юӧртіс вӧрса олысьяслы, мый Дед Мороз вайӧма гӧснечьяс да тшӧктіс чукӧртчыны Печора бердса нырд вылӧ. Сизь збоя клёнӧдіс чорыд нырнас кос пуӧ. Тайӧс кылісны катшаяс и бур юӧрсӧ бӧж выланыс нуисны вӧр пасьта. Долыд юӧр кылӧм бӧрын вӧрын олысьяс шыбитісны ассьыныс делӧясныссӧ да уськӧдчисны Печора дорса нырд вылӧ.
— Дед Мороз локтӧма! Тэрмасьӧй! — Юргис вӧрын. Кӧч вӧлі дӧмӧ гӧтырыслы гынкот. Кыліс юӧрсӧ да шыбитіс гынкотсӧ пызан улӧ гынкотыд пӧ оз пышйы, а Дед-Морозыд мунас. А йӧра, кор казялас, мыйын делаыс, горӧдас гӧтырыслы: самӧвар пӧ пукты да тшӧтш лок, а ме пӧ водзджык муна да петкӧдла Дед Морозлы петляяссӧ, кодъясӧс пукталіс Дыш Вань. Сідзи и пышйис, весиг гачасьнысӧ эз вевъяв.
Лэбачьясыд, найӧ, дерт, водзджык воисны. Ракаяс да катшаяс ньӧти яндысьтӧг пуксисны веськыда Дед Морозлӧн мешӧк вылас. Дед Мороз скӧрмис да муртса эз котшкышт кузь бедьнас: тіысь пӧ грӧш дон пӧльза абу, а пуксянныд медся водзӧ. Лешакъяс пӧ ті.
Мукӧд лэбачьясыс пуксялӧмаӧсь пуяс вылӧ да быдсяма ногыс ошкӧны Дед Морозӧс. Еджыд гача байдӧг матыстчӧма Дед Морозлы кок улас да сӧмын нюмъялӧ: рад, буракӧ. А сьӧд пинжака тар ветлӧдлӧ кыдз пу ув кузя да шензьӧмӧн гоннявлӧ: ракаяссӧ да катшаяссӧ мый вылӧ пӧ и видзӧны.
Шум кылӧм бӧрын берег дорлань матыстчисны весиг черияс. Йӧрш вӧлі ёна скӧрмӧма: август помсянь пӧ вомӧ эг на сюйлы ни ӧти нидзув. Госа сьӧмга тшӧтш скӧрмис: вомтӧ пӧ тупкы. Нинӧм вылӧ пӧ видзӧднысӧ, а шумитан. Он кӧ пӧ чӧв ов сета пеляд да берегас лэбзян.
Кор ставыс чукӧртчисны, Дед Мороз лэптыліс бедьсӧ да шуис:
— Ёртъяс, ме ёна тэрмася да ог кут уна сёрнитны. Пӧдарокъяссӧ бӧрнас юкла, а ӧні сёрнитыштам. Ошйысьӧй, коді мыйӧн кужанныд...
— Ошйысьнысӧ нинӧмӧн, бӧрдны окота, Дед Мороз, — шуис таркӧд орччӧн пукалысь воробей.
— Мыйла?
— Сьӧкыда овсьӧ. Зэв кӧдзыд дай сёяныс абу — нинӧм кокыштны. Челядь оз отсавны. Миянӧс вердӧм пыдди мукӧддырйи беддьӧн шыбитасны.
Дед Мороз тувкнитіс бедьнас:
— Талун жӧ рытнас пӧдарокъяс сеталігӧн быдӧнлы висьтала, мед аскисянь жӧ быдлаын восьталасны столӧвӧйяс. Сола тшак да жаритӧм нидзувъяс сэні, дерт, оз ло, а мукӧдторйыс лоӧ.
— Пуӧм яй колӧ, — горӧдісны катшаяс.
— Нӧрӧвитлӧй ті! — ӧвтыштіс бедьнас Дед Мороз.
Матыстчис йӧра да раминика шыасис:
— Вӧр пасьта петляяс ӧшлӧмаӧсь, дедушка... Гожӧмнас нылӧй сэтчӧ веськаліс да сісьмис. Неважӧн дедӧй джагалі.
Печора дорса нырд вылын лои чӧв-лӧнь.
Дед Мороз ёна скӧрмис, муртса бедьсӧ эз чеглав.
— Коді пукталіс петляяссӧ? — юрӧбтіс вӧрын. — Пызьӧдз нӧйта.
— Дыш Ваньлӧн уджыс...
— Абу тай сійӧ морт вӧлӧма. Пӧдарок сетӧм пыдди талун гач потласьтӧдзыс вурла!
— Сійӧ и миян овны оз сет, — кыліс гӧлӧс Печора вывсянь. Ставӧн бергӧдчисны. Тайӧ сьӧмга вӧлӧма. Мыччысьӧма ю вылӧ вӧчӧм юкмӧссянь да шумитӧ.
— Ті ӧд, другъяс, ва пытшкын оланныд, — шуис Дед Мороз. — Гожӧмнас, кор Дыш Вань локтас чери кыйны — чукӧртчӧй унджыкӧн да пӧрӧдӧй пыжсӧ.
Сьӧмга нора шуис:
— Ог вермӧй, дедушка. Арнас ми воксӧ, гашкӧ, кызь пуд кыйис да солаліс. Ӧні на, кӧнкӧ, сёйӧ!
— Ладнӧ. Ме талун петкӧдла сылы пуж! — мыччис кабырсӧ Дед Мороз.
Сёрнитӧм-варовитӧм бӧрын Дед Мороз сеталіс пӧдаркияс. Та бӧрын гаровтіс тыртӧм мешӧксӧ да шуис:
— Сэсся, другъяс, бура олӧй. Ме ӧні йӧз дорӧ муна да висьтала, мый йылысь тані сёрнитім.
Дед Мороз кыпӧдліс шапкасӧ да тӧвзис водзӧ.
