КАРЫБЙЫВ

Снимок вылысь ті аддзанныд Карыбйыв сикт, а шуны кӧ веськыда — сиктлысь шогӧ уськӧдысь колясъяссӧ.

Тані коркӧ вӧвлі, орчча Батурорд сикткӧд ӧтлаын, «На подъёме» колхоз.

Карыбйылын овлысь йӧз видзлісны уна сикас пемӧс: мӧс, куканьяс, ыжъяс. Колхозникъяс сдайтлісны государстволы йӧв, яй, рудзӧг, ид, зӧр, весиг шобді да градвыв пуктасъяс.

Эз кокниа овсьы да уджавсьы йӧзлы, но вердлісны, кӧмӧдлісны-пасьтӧдлісны асьнысӧ, семьяныссӧ дай йӧзсӧ. А ӧні? Ӧні Карыбйыв — кулӧм грезд. Гожӧмнас татчӧ волывлӧны на кымынкӧ пенсионеръяс, а тӧвнад некод нин абу.

Йӧзыс бур кылӧн казьтылӧны Карыбйывса медбӧръя олысьӧс — Илья Васильевич Кузнецовӧс, коді участвуйтліс Великӧй Октябрьскӧй революциялӧн событиеяс дырйи, кор служитліс артиллеристӧн Кронштадтын, прӧйдитліс би пыр и ва пыр Гражданскӧй да Великӧй Отечественнӧй войнаяс вылын.

Сэсся уджаліс «На подъёме» колхозлӧн медбӧръя председательӧн. Илья Васильевич оліс рӧднӧй сиктын медбӧрӧдз. Кувсис мортыд — куліс и Карыбйыв.

Кӧть ӧні и дзик, вӧвлӧм сикткӧд, орччӧн мунӧ асфальтӧн вевттьӧм туй, но автобус оз нин сувтлывлы: некод оз пет сиктӧ, некод оз пыр...

Кӧнӧсь ті, том йӧз? Онӧ кыдз кӧ вермӧ бӧр ловзьӧдны тайӧ сиктсӧ? Сійӧ — Эжва бердса джуджыдысь джуджыд да мичаысь мича нӧрыс вылын! Татшӧм мичаинсӧ ӧдвакӧ аддзан матысь. Татчӧ, Кармыльк вылӧ, уна сюрс во сайын овмӧдчывлӧмаӧсь медводдза йӧз — чудьяс. А ӧд найӧ овмӧдчывлӧмаӧсь медся бур да мича местаясӧ.

Коляс: во-мӧд-коймӧд, а гашкӧ и ёна унджык, но колӧ чайтны и эскыны, мый бара ловзяс Карыбйыв. Важӧн моз кутасны кывны челядьлӧн долыд гӧлӧсъяс. Воссясны вузасян инъяс, гажӧдчан керкаяс и ловзяс вошӧм сикт!