КОРТӦМ ГӦСТЬЯС

Кык ствола ружье киас кутӧмӧн Алексей Сергеевич чӧла пукаліс коз улын, виччысис. Коли час, мӧд, коймӧд. Асыввыв гӧрдӧдіс, ыпнитіс алӧй биӧн, а сэсся мыччысис шонді. Дыр на пукаліс Алексей Сергеевич, но гӧсть эз лок. Медбӧрын, ковмис петны коз улысь.

— Ладнӧ, другӧ, — думыштіс Алексей. — Талун эг аддзысьлӧй, аски локтан да сэки нин сёрнитыштам.

Руд пася «гӧсть» — кӧин — воис татчӧ лун-мӧд сайын и вевъяліс нин прамӧякодь «гӧститны»: джагӧдіс некымын ыж.

Алексей Сергеевич нёль вой кыйӧдіс сійӧс ыж стада дорын, но кӧин эз волы. Мый вӧчны? Горзӧмӧн корны — весьшӧрӧ: нинӧмысь оз лок. «Ак кутшӧм ме! — ас вылас дӧзмис Алексей. — Гӧстьӧс виччыся, а сёян-юан эг лӧсьӧд! Тадзи оз позь».

Алексей Сергеевич босьтіс стадаысь ӧти ыжӧс, нуӧдіс сійӧс вӧрӧ да вӧснидик гезйӧн и домыштіс, а ачыс пуксис коз улӧ лӧсьӧдӧм местаӧ, кытысь сійӧ некутшӧм боксянь эз тыдав. Друг кустъяс сайсянь визьнитіс руд мыгӧр, чардби моз чеччыштіс ыж вылӧ да кватитіс сійӧс горшӧдыс. Грымӧбтіс лыйӧм шы. Охотник чеччыштіс коз улысь. Порок тшын вӧсна нинӧм эз тыдав. Котӧрӧн локтіс, видзӧдӧ: садьтӧг повзьӧм ыжсянь метр дас ылнаын чужъясьӧ-пессьӧ кӧин. Алексей гӧститӧдіс сійӧс мӧд стволсьыс зарадӧн да шуис:

— Но вот и бур. Кулям ӧні пасьті, и ставыс лоӧ ладнӧ...

Регыд Алексей Сергеевичлы воис премия — витсё шайт. Кажитчӧ, мездіс меткӧй лыйсьысь Кельчиюрскӧй сельсоветса колхозъясӧс ӧпаснӧй хищникысь, но со бара воис юӧр: «Ударник» колхозлысь косявлӧмаӧсь нёль ыж. Аддзылӧмаӧсь кык кӧинлысь кок туйяссӧ: мама-пиа шӧйтӧны.

Алексей Сергеевич Хозяинов, «Правильный путь» артельса колхозник, бара ветліс вӧрӧ. Сылы удайтчис лэдзны кӧин-мамлы бокас бур зарад. Ӧні кӧинъяс оз кывсьыны: буракӧ, картеч зарадысь кӧин-мам кӧнкӧ кулі.