ПЫР ЙӦЗКӦД

Вой. Сикт узьӧ. Но ставыс-ӧ узьӧны? Со сикт кузя лэбовтіс вӧла да джем сувтіс. Доддьысь чеччыштіс морт да котӧртіс керка дорӧ.

— Тук-тук-тук! Александр Иванович!

Дзуркнитіс керка ӧдзӧс.

— Александр Иванович! Гӧтырӧй сьӧкыда висьмис...

— Ме дзик пыр, сӧмын пасьтася, — кыліс Александр Ивановичлӧн гӧлӧс.

И со нин вӧла тӧвзьӧ орчча сиктӧ. И тадзи век: лунын и войын, шойччан лунӧ и праздникӧ, зэра поводдяӧ и турӧб дырйи, Кельчиюрса фельдшеръяс Александр Иванович Тюрин да сылӧн гӧтырӧс Пелагея Ивановна то подӧн, то вӧлӧн тэрмасьӧны висьысьяс дінӧ.

Кывкутана да сьӧкыд уджыс сиктса фельдшеръяслӧн. Но Александр Иванович абу йӧршитчӧма сӧмын аслас удж пытшкас.

Со праздник дырйи клубӧ чукӧртчӧмаӧсь йӧз. Сцена вылын гитараяса, балалайкаяса да мандолинаяса йӧз. Юрӧбтіс оркестр. Ворсісны ӧтитор, мӧдтор. Зал пузис:

— Би-ис! Нӧшта!

— Ок и ворсӧны жӧ.

Тайӧ струннӧй оркестрнас веськӧдлӧ Александр Иванович, коді ӧткодя бура ворсӧ гитараӧн, мандолинаӧн и балалайкаӧн.

1960 воын вӧвлӧм «Ударник», «Выль олӧм», «Красный косарь» да «Правильный путь» колхозъяс ӧтувтчисны ӧти ыджыд овмӧсӧ, кодлы сетӧма «Дружба» ним. Ӧтувтчисны и партийнӧй организацияяс, а сідзжӧ и агитколлективъяс. Тайӧ агитколлективӧн веськӧдлыны коммунистъяс индісны бара жӧ А. И. Тюринӧс.

Быд вежонӧ Александр Ивановичӧс позьӧ аддзыны школаысь. Тані сійӧ нуӧдӧ занятиеяс том досаафовецъяскӧд. Аддзӧ кад лыддьыны и лекцияяс.

Сьӧлӧмсянь, зіля уджалӧ сиктса фельдшер. Та вӧсна йӧзыс сійӧс пыдди пуктӧны да радейтӧны.