ӦТВЫЛЫСЬ
Некымын во сайын вӧлі сідз: чукӧртасны, чукӧртасны велӧдысьяс челядьлысь бать-мамсӧ сӧбрание вылӧ да сідз нинӧм оз и артмы: оз локны бать-мам дай ставыс. Но бӧръя воясӧ делӧыс крута вежсис. Лина Иововна кутіс нуӧдны сӧбраниеяссӧ выль ног.
Некымын лун водзджык бать-мамлы ысталісны пригласительнӧй билетъяс. Таысь кындзи вӧлі ӧшӧдӧма объявление. Стӧч индӧм кадӧ вӧччӧм бать-мам локталісны.
— Пӧрччысьӧй, пӧрччысьӧй, ёртъяс... Прӧйдитӧй водзӧ, — пӧся паныдалісны найӧс велӧдысьяс.
— Мамъяс, пырӧй, пӧжалуйста, столӧвӧйӧ.
— Чай юны?
— Юам и чай, но водзджык сёрнитыштам...
Галина Ивановна петкӧдліс мамъяслы, кыдзи сервируйтны пызан, мичаа сёйны... Сэсся мамъяс юисны чай. Мамъяс вӧліны зэв дӧвӧльнӧйӧсь.
Эз весь овны и батьяс. Коридорын кылӧ гажа сёрни, серам. Помся трачкӧдчӧ пневматическӧй ружье. Батьяс тӧдмалісны, коді на пиысь медся бур лыйсьысь.
Сэсся бать-мам чукӧртчисны ӧти классӧ. Сиктса фельдшер А. И. Тюрнин лыддис лекция мортлӧн гигиена йылысь. Лекция бӧрын Лина Иововна тӧдмӧдіс бать-мамӧс четвертьлӧн итогъясӧн. Сӧбрание кежлӧ петіс карикатураясӧн мичмӧдӧм стенгазет «Бать-мамлӧн гӧлӧс», коді петӧ быд тӧлысь. Татшӧм собраниеыд бать-мамлы, дерт, ёна кажитчис.
Уна сёрни кыпӧдіс сиктын пӧчьяслӧн рыт, кодӧс котыртіс Лина Иововна. Кодсюрӧ шулісны, мый ӧдвакӧ удайтчас кыскыны пӧчьясӧс шоныд паччӧрысь школаӧ. Шензяна кӧть абу, а индӧм кадӧ пӧчьяс локталісны школаӧ. Вӧччӧмаӧсь, нюмъялӧны, весиг томмӧмаӧсь. Воис весиг ӧти прабабушка, коді некымын во нин абу петавлӧма сиктӧ. Корлісны 16 пӧчӧс, а воис... 17. Пӧчьяс пӧся радейтӧны ассьыныс внукъясныссӧ. Та вӧсна частӧ могмӧдӧны налысь быдсяма пӧлӧс капризъяссӧ. Тайӧн, дерт, тшыкӧдӧны челядьсӧ. Сёрнитісны и та йылысь. Пӧчьяс ёна отсалісны велӧдысьяслы бурджыка тӧдмавны велӧдчысьясӧс. Мед водзӧ уджалігӧн ёнджыка восьтыны велӧдчысьяслысь бур качествояссӧ да вочасӧн бырӧдны лёкторсӧ.
Пӧчьяс сёрнитігкості внукъясыс пусисны, пузьӧдісны чай. Пӧттӧдзныс сёрнитӧм бӧрын пӧчьяс гӧститісны. Мунігас корисны, медым школа частӧджык корлывлас найӧс татшӧм рытъяс вылас.
Тадзи Лина Иововна аслас уджын пыр корсьӧ да аддзӧ мыйкӧ выльтор да пӧртӧ сійӧс олӧмӧ. Орчча сиктса велӧдысьяскӧд методическӧй сӧвещаниеяс пыр овлывлӧны ӧтлаын. Овлывлӧны труд кузя, рисование да сьылӧм кузя практикумъяс.
Зэв бура пуктӧма делӧсӧ стеннӧй печать кузя. Школаын быд лун петӧ сатирическӧй лист бок «Ёж», вежоннас ӧтчыд лэдзсьӧ «За учёбу». Быд тӧлысь петӧ «Бать-мамлӧн гӧлӧс», быд номерын карикатураяс. Оз мешайт тадзи жӧ вӧчны и мукӧд школаясын.
Уна вояс чӧж став сьӧлӧмсянь, вынъяс жалиттӧг уджалӧ Лина Иововна Семяшкина. Став кужӧмлунсӧ, тӧдӧмлунсӧ да пӧсь сьӧлӧмсӧ сетӧ челядьӧс велӧдан да воспитайтан делӧлы. Тӧдӧмлун да кужӧмлун асьныс оз шедны. Лина Иововна вывті уна лыддьӧ методическӧй литература, журналъяс, и ни ӧти выльтор оз мун сы синъяс бокті.
Лина Иововна абу сӧмын стрӧг да требовательнӧй. Сылӧн бур сьӧлӧм. Олӧмад быдторйыс овлӧ. И быд пӧрйӧ директор воліс отсӧг вылӧ, кор бур кывйӧн, кор бур делӧӧн, кор бур сӧветӧн... Уна вояс чӧж сійӧ частӧ выступайтӧ лекцияясӧн да докладъясӧн.
Лина Иововна Семяшкина ёрт — Коми АССР-са заслуженнӧй учительница. Уважайтӧны да радейтӧны сійӧс велӧдчысьяс, велӧдысьяс да сиктса йӧз. И эм мыйысь.
