ЗАРНИ КАРТУПЕЛЬ
Собрание вылын Сопрон дед пукаліс чӧв, сюся кывзіс, мый йылысь сёрнитӧны-баитӧны бригадиръяс, механизаторъяс. Сэсся шыасис:
— Позьӧ сёрнитыштны?
— Сёрнит, Сопрон Иванович! — тшӧктіс председатель. Дед сувтіс, бергӧдчис йӧзлань да малыштіс ыджыд уссӧ. Йӧзыс шпыннялӧмӧн виччысисны, мый висьталас Сопрон дед. Быдӧн тӧдісны: кывъясыс сылӧн жель кодь жӧ ёсьӧсь да бытшласьысьӧсь.
— Менам внук, Петя, тӧрыт норасис: пӧшти быд бригадаын — Кельчиюрын, Большое Галовоын, Усть-Ижмаын — зэв пӧ сьӧкыд лоӧ гӧрны ылысса муяссӧ... Ёна пӧ мешайтӧны куйӧд чукӧръясыс...
— Ылӧдчӧ внукыд! — кыліс залсянь. — Ылысса муяссӧ ракаяс кындзи некод оз вынсьӧдлыв...
— Пӧжалуй, сідзи и эм, — сӧгласитчис дед. — Ме тӧрыт сёрниті бригадир Михаил Матвеевич Сметанинкӧд, да сійӧ ошйысис: эм пӧ миян Кельчиюрын Гуляй му да сэні пӧ збыльысь позьӧ гуляйтны, весиг мачӧн ворсны — некытчӧ он джӧмды. Во дас кымын, буракӧ, куйӧд додь сэтчӧ эз нин нулыны...
— Аддзӧмаӧсь, мыйӧн ошйысьны, — торкис дедӧс Федор Николаевич Канев, Большое Галовоса звеньевӧй. — Да миян, кӧсъянныд кӧ тӧдны, эмӧсь муяс, кодъясӧс эг на вынсьӧдлӧй колхоз лӧсьӧдӧмсяньыс!
— Вот, вот, сэтчӧ и колӧ картупельтӧ пуктыны — рекорднӧй урожай воас, — сюйыштіс дед да тӧждысьӧмӧн юаліс:
— А, гашкӧ, нинӧмӧн вынсьӧднысӧ да, куйӧдыс абу? Сідзкӧ, орчча колхозлысь колӧ ньӧбны!
— Куйӧд гӧраяс сайсяньыс, дедӧ, картаясыс оз нин тыдавны, — шыасисны залсянь. — Метр джын судта слӧйӧн позьӧ став муяссӧ вевттьыны.
— Мыйла нӧ он новлӧй? — шензис дед. — Тракторъяс тырмымӧн, дай куйӧдсӧ сӧвтны механизмъяс эмӧсь. Со тай, Кельчиюрын, рыныш дорын, туплясьӧ пиньяса зэв ыджыд кӧш. Кутшӧмкӧ тракторӧ позьӧ оз сійӧс лӧсьӧдны?
— Лӧсьӧдны, дерт, позьӧ и колӧ, — гыжйыштіс юрбӧрсӧ механик Николай Филиппов. — Зэв лоӧ лӧсьыд и куйӧд сӧвтны и лыа грузитны, но коді сійӧс лӧсьӧдас? Оз ӧд быдӧн куж, а ме эськӧ и кужа, да ог вевъяв...
— Сопрон дед лӧсьӧдас! — серӧктісны залсянь.
Но дед эз сӧгласитчы:
— Он кӧ кужӧ вӧдитчыны добранас, вузалӧй бур дядьӧлы либӧ, ёна кӧ нин сімӧма, сдайтӧй металлоломӧ... Бара жӧ доход лоӧ. — Дед зумыша видзӧдліс бригадиръяс вылӧ да сёрнитіс водзӧ:
— Висьтавнысӧ ӧд яндзим: бӧръя воясас ми «Дружба» колхозын кутім вӧдитны сӧмын нин картупель, дай сійӧс ог кужӧй быдтынысӧ. Картупель мудъян кад воас да «караул» горзӧны. Став йӧзсӧ, гырысьясӧс и посниӧс, петкӧдӧны муяс вылӧ, йӧзыс, важся кадӧ моз, копрасьӧны, кокалӧны мусӧ, юрбитӧны быд картупель корлы. Ставсӧ ки помысь! Серамыд петӧ: кольӧм во картупель мудйӧм вӧсна эз вермыны ас кадӧ петны видзьяс вылӧ. А бур йӧзыс ӧд важӧн нин ставсӧ машинаӧн вӧчӧны. Сэки позьӧ ӧти либӧ кык мортлы став картупельсӧ мудйыны. Мед пуксясны «Беларусь» вылӧ да котралӧны муяс вывтіыс кузяла и вомӧн. Мыйла миян оз позь йӧзыс моз уджавны?
Дед бергӧдчыліс собраниесӧ нуӧдысьлань:
— Вай меным, пиӧй, ва стӧкан: скӧрми да горш кутіс косьмыны...
Ва юӧм бӧрын дед крӧтитіс водзӧ:
— Картупель босьтігӧн бара жӧ пикӧ воам. Став механизацияыс — кӧрт зыр. А ӧд эм машина, кыдз сійӧ... (дед кыскис зепсьыс бумагатор) да, КТН-26.
— Тайӧ машинасӧ неправильнӧ вӧчӧмаӧсь, да он вермы сійӧн уджавнысӧ! — горӧдіс кутшӧмкӧ механизатор.
— Тэ, пиук, дыш вӧснаыд эн вермы сійӧс регулируйтнысӧ, кыдзи колӧ, да сійӧн тадзи сёрнитан. Ме кольӧм во ветлі гӧститны Кипиевоӧ сват дорӧ да ачым аддзылі, кутшӧм бура уджаліс татшӧм машинанас тракторист Иван Чупров.
— А уна жӧ нин колӧ ноксьыны тайӧ картупельнас, — ышловзис кодкӧ залын.
— Зато ыджыд доход босьтан! — вочавидзис мӧд.
— «Доход», гажтӧма серӧктіс Сопрон дед да бара кыскис зепсьыс бумага. — Татшӧм уджнад босьтан доходсӧ. Со ме локтігмоз пыралі правлениеӧ да гижышті кутшӧмсюрӧ лыдпасъяс. Кольӧм во босьтім шӧркодя быд гектар му вылысь 85,6 центнер картупель. А доходыс... доходыс абу! Лои 1,135 шайт убытка!
Кодкӧ кузя шутёвтіс.
— А центнер картупельыс сувтіс 6 шайт 70 кӧпейка, — скӧра пыркнитіс тошнас Сопрон дед. — Татшӧм гырысь воськовъясӧн кӧ кутам мунны водзӧ, то во-мӧд мысти пӧжалӧм картупельыд лоӧ донаджык пуӧм кольк серти! Ме нинӧм ог шу: уна вӧчам йӧв и яй, сьӧкыда ли кокниа ли, а планъяс вевтыртам. Но вот мый висьтала: войдӧр, ӧнія серти ёна сьӧкыдджык кадӧ, ми видзлывлім кӧръяс, ыжъяс, кӧдзлывлім ид, быдтылім град выв пуктасъяс. Ӧні бырӧдім кӧръяснымӧс, пӧшти нин эновтчим ыж видзӧмысь, дугдім кӧдзны ид, макнитім кияснаным град выв пуктасъяс вылӧ. Асланым муяс вылын быдтам сӧмын нин картупель, дай сійӧ кутіс вайны убытка. Э-эк, кӧ-зя-ева!
