УСКӦД ВИЗУВТӦ, А ВОМӦ ОЗ ВОЛЫ
Котӧртӧны Щельяюр кузя йӧз: пӧрысь и том, мужик и баба. Тринякылӧны банкаяс, бидонъяс, ведраяс. Тӧв ныр моз пызйыштіс том зонка, а со пошиктӧ кузь тошка дед, зільӧ ордйӧдны бидона пӧчӧӧс, но пӧчӧ оз думайт сетчыны.
Ме сулала туй вылын да шензя: збыльысь ордйысьӧны али мый? Но ордйысьӧны кӧ, мыйла сьӧрсьыныс бидонъясыс?
— Пӧжар али мый кӧнкӧ? — юалі нывбабалысь. Но вочавидзӧм пыдди сійӧ скӧракодь видзӧдліс ме вылӧ да тӧвзис водзӧ.
Окота лои тӧдмавны, мыйын делӧыс. Котӧрӧн уськӧдчи йӧз бӧрся. Котӧрті да котӧрті Щельяюр кузя пӧшти помӧдзыс, ордйӧді кузь тошка дедӧс, суӧді пӧчӧӧс, и дыр мысти, кор синъясӧй кутісны нин пемдыны, а кыв нюжалі, матысми... кладбище дорӧ. Тані сулалісны нин уна йӧз. «Буракӧ, покойникъяс пӧтка йӧлӧн тӧргуйтӧны», — шмонитышті ме. Но пӧтка йӧлӧн некод эз вузась. Воис Діюрса «Победа» колхозысь йӧв тыра бидонъяса вӧла, и йӧз чукӧртчисны додь гӧгӧр.
— А ӧд неважӧн ньӧбавлім йӧвсӧ универмаг дорын, а ӧні со кӧні, кладбище дорын нин паныдалам йӧв вайысьсӧ, дай то оз сюр, — ышловзис кутшӧмкӧ нывбаба.
Паныдасис кузь тошка дед, аддзис, мый йӧв абу нин, ёрччыштіс, сьӧлыштіс да пуксис туйбокса кер вылӧ. Уналы, ок и уналы эз сюр йӧлыд! Верстьӧ йӧзыд, дерт, терпитасны, а челядьыд кыдзи?
Щельяюрын вит тысяча гӧгӧр морт, районса населениелӧн витӧд юкӧныс. Дерт, йӧлыд татчӧ колӧ уна. Эм йӧлыс, эм! Ижемскӧй район тырӧма йӧлӧн, сӧмын сійӧн вузасьӧмсӧ абу котыртӧма. Щельяюрса олысьяс шуӧны: районын йӧв уна, но сійӧ сӧмын визувтӧ ус кузя, а вомӧ оз веськав. «Победа» колхоз петкӧдӧ йӧвсӧ рынок вылӧ, но сійӧ оз тырмы. Колӧ вузасьны йӧлӧн государственнӧй магазинын. Кодлы колӧ тшӧктыны восьтыны йӧв вузалан магазинсӧ? Щукин ёрт (ОРС-са начальник). Оз позь шуны, мый Щукин ёртлы эз висьтавлыны та йылысь. Унаысь сылысь быгзьӧдлісны сьылісӧ уджалысьяс и районса руководительяс, но Щукин юр вылын кӧть майӧг ёсьты. Кывсьӧ, ачыс Щукин ёрт ёна жӧ пӧ радейтӧ йӧвтӧ юны, оз бергӧд нырсӧ мӧдарӧ и нӧкъя рыськысь, а вот йӧзсӧ оз кӧсйы вердны.
Йӧв вузалан магазин колӧ восьтыны Щельяюрын ӧні жӧ, талун!
А Щукин ёрт оз кӧ кӧсйы тайӧс вӧчны, то, гашкӧ, аддзысяс мӧд морт, коді кутас тӧждысьны уджалысь йӧз вӧсна.
