ДЕД МОРОЗ ВАРОВИТӦ
Видза оланныд, бур йӧз! Менӧ дед Морозӧс ті ставныд бура тӧданныд. Дерт, гожӧмнас ті ме йылысь вунӧдлывланныд, но ме абу тшап да тӧвнас пӧшти быдӧн ордӧ пыравлывла гӧститны.
Таво унаысь нин кывлі Дед Мороз пӧ чорыда ӧшибитчис, водзджык пӧ лымъяліс да сэсся вӧлись нин кынтіс. Ме ог и вензьы збыльысь ӧшыбка лои. Календарь вылӧ видзӧдлӧм бӧрын пукси небыдик лымъя кымӧр вылӧ да мӧдӧдчи. Эг и казявлы, кыдзи вугырті. Яндзим и висьтавнысӧ, а узьсис менам. Кымӧръясыд менсьым индӧдсӧ зэв бура пӧртӧмаӧсь олӧмӧ. Садьми да видзӧда, а мусӧ весьт судтаӧ нин тыртӧмаӧсь небыдик лымйӧн. Ме эськӧ прамӧя кодь зэлӧдчылі, но лым увсьыд сьӧкыд нин кынтыны мусӧ. Но нинӧм, кыткӧ — мыйкӧ зэлӧдыштам.
Кӧть пасибӧ некод оз висьтавлы, а уджсӧ ме зэв уна вӧчи. Йӧзыс пыр ропкӧны туйяс пӧ некытчӧ шогмытӧмӧсь. Доручастокса начальник Канев ёрт арбыд мен виччысис мыйла пӧ сы дыра оз лок главнӧй дорожнӧй мастерыс И со локті, зэлӧді, топӧді. Ветлӧй на здоровье!
Ёна шензьӧдісны менӧ Печора да Изьва ю бӧкъясын. Кипиево дорті йи пласт вылын кывтігӧн видзӧда ю пыдӧсас катер тыдалӧ. Сё лешакӧ Кутшӧмкӧ Хозяинов пӧ вӧйтӧма. Йӧзыс шуӧны, абу пӧ вӧлӧма вывті код, ачыс кӧ ва веркӧс вылас коли. Катер весьтӧ ме кольлі ры, но сэсся макниті кинам да кынті. Гожӧмнас кӧ эз вермыны кыпӧдны, ӧні тӧвнад кытысь нин.
Прамӧя кодь повзьылі ме Ижма сикт дорӧ воигӧн. Ваыс вӧлі ойдӧма. Ме буретш заводиті лӧсьӧдны Изьва вомӧн пос, друг мыйкӧ, кыдзи тай грымвартас, сэсся мӧдысь, дай коймӧдысь. Муртса садьтӧг эг усь, мый нӧ, думайта, татшӧмыс Первойсӧ думышті гашкӧ, мися, менам честь кузя Ижмаса йӧз салют вӧчӧны, но сэсся видзӧдлі да гӧгӧрвои, мыйын делӧыс. Вӧлӧмкӧ СМУ-лӧн гаситтӧм известь тыра бӧчкаяс бомбаяс моз потласьӧны. Бур кӧть меысь кындзи, некод матын эз вӧв, а то эськӧ не сӧмын резіс да чишкаліс — сотіс еджыд быгйӧн, но ковмис на и гу кодйыны.
Изьва ю кынтігӧн бара жӧ тешкодьтор аддзылі ю пыдӧсас тыдалӧ пыж нисьӧ катер. Эзӧ нин Кипиевоса катерыс ва увтіыс кат Видзӧдлі бурджыка да аддзи, мый тайӧ абу катер, а пыж. Мотора и быдсӧн. Мотористыс оз тыдав, тожӧ буракӧ, ва веркӧс вылас кольччӧма. Мошъюгаысь почта кылӧдігӧн пыжӧс вӧйтӧмаӧсь.
Дед Мороз вылӧ ёна броткӧны механизаторъяс. Налысь пинясьӧмсӧ кывлі и Діюрын, и Кельчиюрын, и весиг Ижмаын. Ме ог соссьы мунігмоз кынта двигательяссӧ и найӧс вывті сьӧкыд заводитнысӧ. Кынтытӧг ог ов ме жӧ абу дзоридзьяса тулыс, а Дед Мороз! Вӧчӧй шоныд гаражъяс, и ме сэтчӧ весиг ог кут пыравлыны.
Эскӧда тіянӧс зэв крепыд кӧдзыдъяс на лоӧны. Ваялӧй песныдтӧ и меысь эн полӧй. Том йӧз тай оз повны. Сэтшӧм банйӧма да гажа чужӧмъясӧн ветлӧны — любӧ видзӧднысӧ. А тшапджыкъясыс весиг ботиночкиясӧн на гуляйтӧны.
Но сэсся дыр варовитны ог эшты. Колӧ исковтлыны Изьва да Печора кузя, йи со кызтыштны, мед тракторъясӧн позис ветлӧдлыны.
Аддзысьлытӧдз!
