КӦМӦДІСНЫ...
Гусьӧн висьтала: ковмасны кӧ тіянлы вӧралан понъяс — шыӧдчылӧй Федул Вась дінӧ, но и понъяс жӧ сылӧн, ай торъя нин ош вылад бура мунӧны. Ньӧбӧй, эн жалитӧй деньгатӧ, он кутӧй каитчыны, и дыр на бӧрас кутанныд шензьыны, тайӧс тіянлы, ме, вӧралысь морт, висьтала. Ті, дерт, кӧнкӧ кывлінныд Пирог Вань йылысь? Вот, вот, сійӧ ме и эм. Тӧв и гожӧм оштӧ кыя. Кольӧм вонас ошкыд менам Свистунлысь сювсӧ пу вылӧ ӧшӧдіс, а понтӧгыд нӧ кыдзи? Ачыд ӧд бӧжӧдыс оштӧ он нетшкы! Микайлӧыд сэтшӧм шуткаястӧ омӧля гӧгӧрвоӧ и обязательнӧ ружьетӧ мырддяс. Вот, кӧть сэсся шӧри орӧдчы, а понъяс колӧны, сэтшӧм-татшӧм понъясыд сиктад, дерт, эм, лыддьыны кӧ заводитан — щӧтіӧн лунтыр ковмас пукавны, но найӧ-ӧ мӧй понъяс? Налӧн нимыс сӧмын понъяс.
Ме нин кӧсъя волі нопъясьлыны да чужйысьлыны орчча сиктъясӧ, но воис ме дінӧ Федул Васьыд.
— Менам, — шуӧ, — эм понъясыд.
О, шуӧ, понъяс, так понъяс. Мун, шуӧ, тэ вӧрад, пуксьы мичаджык местаӧ, сэсся коктӧ крестав да чай юигмоз виччысь. Менам, шуӧ, понъясыд вайӧдасны оштӧ баляӧс моз ныр улӧдзыд. Сэки, шуӧ, тэ, оз кӧ ло дыш, и пезьдӧд. Дерт, шуӧ, кульнытӧ сэсся аслыд ковмас: менам понъясыд, шуӧ, оштӧ кульны оз на кужны.
Читкыралӧ синъяссӧ Федул Вась: ньӧб, шуӧ, нэмтӧ кутан меным кевмыны кузь нэм да бур шуд.
Видзӧдлі ме кыкнан понсӧ. Понъяс кыдз понъяс: нёль кок, ныр, гӧнаӧсь кыкнаннас, весиг бӧжъяс эмӧсь. Гашкӧ эськӧ и эг на ньӧб, но понъясыс вӧліны арджынъя чаньясысь весьт судтаӧн на джуджыдджыкӧсь. Но, думайта, эстшӧм понъястӧ кӧ он ньӧб, — кулӧм бӧрын на дыр кута каитчыны. Эстшӧм понъясыд ошъястӧ кутасны ӧшинь улӧдз кыскавны, паччӧрсяньыд и позяс лыйлыны.
Ньӧби. Сьӧмтӧ ме эг жалит, сеті Федул Васьыдлы сы мында, мый ӧні на, думыштла да, юрсиӧй сувтлӧ.
— Пасибӧ, — висьтала, — бур морт. Медводдза ош кусӧ жӧ вая гортад крӧвать дорад вольсавны.
Пыдзыртім Федул Васькӧд сулея вина, пожйыштім понъяссӧ кыдзи полагайтчӧ, и вежон-мӧд мысти ме йӧткыси вӧрӧ — видзӧдлыны ош петляяс да капканъяс.
Муна и нюмъяла, вомӧй пельясӧдз паськалӧма: мися вит-квайт оштӧгыд талун гортӧ ог лок. Сӧмын вот сы мында кусӧ, пӧжалуй, ӧтпырйӧ он вермы лэччӧднытӧ, ковмас, буракӧ, мӧдысь кайлыны.
Прӧйдитім ми ӧти капкан, мӧдӧс, сэсся буракӧ воим, кытчӧ ме петляяс пуктавлі. Матыстча первой петля дорӧ. Сьӧлӧм, дерт, йӧктыштӧ, видзӧда: мыйкӧ эм. Ош кӧ-а? Но, ерӧмаканьыд, ош ӧд и эм! Куйлӧ. Пессис| кӧнкӧ, петляад, майбыр пӧсявтӧдзыс, а сэсся водіс лолыштны. А гашкӧ джагалі да? Юавны, асьныд гӧгӧрвоанныд, абу лӧсьыд. Понъяс уськӧдчисны ошланьыд. О, думайта понъяс менам! Курокъясӧс лэптӧмӧн матыстча. А Микайлӧыд тай кыдзи кыпӧдчас да равӧстас! Ме нинӧмысь ог пов, дай то сьӧлӧмӧй коклябӧрӧдз лэччыліс, а понъястӧ менсьым быттьӧ тӧлӧн лэбӧдіс. Пуляяс моз ме дінті лэбовтісны бӧрлаысь. О, думайта, понъясыс менам!
Микайлӧыд сьӧлыштіс, пызйис дульнас да мӧдӧдчис ме вылӧ...
Но, думайта, промакнитча кӧ — ярмӧм ошкыд петлясӧ орӧдас да нюмъёвтлытӧг и куляс менсьым шапкаӧс.
— Бух! Бах! — шковги кыкысь.
Неуна мӧвпалыштӧм бӧрын микайлӧ нюжӧдчис. Пасьсӧ кулигмоз ачым сэсся и мӧвпала: но, мися, не кӧ эськӧ Федул Васьлӧн понъясыс, лёк эськӧ вӧлі делӧыс.
Лэччи ме вӧрсьыд, пырті ош кутӧ керкаӧ. А крӧвать увсянь кыдзи тай пызйыштасны менам вӧралан понъясыд да ывлаӧ — муртса ӧдзӧссӧ эз нуны. Гӧтыр висьталӧ, ог пӧ тӧд, мый и думайтны.
Воисны пӧ понъясыд гортӧ, уйисны крӧвать улӧ да ыркъялісны, быттьӧ найӧс лихорадка вӧдитӧ.
Ош ку лэччӧдӧм бӧрад вежон гортӧ эз волыны. Верст-мӧд сайын гӧгралӧны керка гӧгӧр, кыйӧдчыштасны пельӧс сайсянь и бӧр. Но всё-таки ме найӧс куті да сэсся исӧді жӧ ош куад сьӧлӧм бурмытӧдзныс.
Но, юала ме тіянсьыныд, мый вылӧ мен татшӧм понъясыс? Жаритнытӧ менам и ош яйыс тырмымӧн. Вай, думайта, нуӧда понъяссӧ Федул Васьлы бӧр. Но ме и кыскыси жӧ орчча сиктӧдзыд ош кунад да кык поннад, ой-ой-ой... Кык ош туша нопйӧн километр кызь сайсянь кокньыдджыка эськӧ лэччӧді.
Вои да — кӧть дӧрӧм и гач пыдзрав, ведра куим пӧсьтӧ, ме думайта, лэдзи.
— Василь Федулович, тэ гортын?
— Мыйкӧ могӧн?
— Понъясыс тай вывті нин бурӧсь, да кӧсъя вӧлі донсӧ содтыштны. Сэсся ош ку кӧсйыси да вайи...
— О, ме тай шулі, — радпырысь гӧрӧбтіс Федул Вась паччӧрсянь.
Ме пырті посводзысь ош ку. Понъяс кузя нюжмасьтӧг вошины крӧвать улӧ.
— Полӧны кӧ-а? — шензьыштіс Федул Вась, а аслас синъясыс бокӧ видзӧдӧны.
— Яндысьӧны! Тэнад понъяс пыдди, Василь Федулович, ассьым кӧ баляӧс катӧдлі, бурджыка эськӧ увтіс ош вылад...
Коли ме Федул Васьлы понъяссӧ. Сеті и ош кусӧ. Мед, мися, водіг и чеччиг сувталӧ сы вылӧ.
