ЙӦЛА РОК

Устӧм Тит да уска Микит рытъявыв кывтӧны чери кыйны. Ми пӧ кык лун гӧг вӧрзьытӧдз тільсим колхозлы, ӧні позьӧ лун куим шойччыны. Сідзсӧ некоднаныс абу колхозник. Тит сельпоын мыйсюрӧ вӧчӧ, Микит — кӧн-сюрӧ нажӧвитчӧ.

Тит да Микит зэв ёна лӧсялӧны. Тит шуӧ: «Ми тэкӧд, Микит, рӧдняяс: менам мам да тэнад мамыд — кык мам».

Пыжаныс вугыр шатинъяс, кулӧмъяс. Абу вунӧдӧмаӧсь и сёян-юан босьтны: кык ноп тыр зэв зэлыда тэчӧмаӧсь.

Кывтӧны кык друг, варовитӧны. Видзӧдӧны: лыа вылын йӧв новлан бидонъяс.

— Сувтлам, другӧ, йӧв юыштны, — нюлыштіс вом дорсӧ Микит да веськӧдіс пыжсӧ береглань. Сувтісны. Некод некӧн эз тыдав. Сӧмын ылынкодь йирсисны мӧсъяс. Видзӧдліс Тит бидонъясӧ — тыртӧмӧсь. Микит нырисаджык вӧлӧма.

— Волы татчӧ! — горӧдіс сійӧ. — Ӧти со тыра.

— Гашкӧ, обрат да? — малыштіс кынӧмсӧ Тит.

Микит копыртчӧмӧн исалыштіс флягасӧ, сэсся кӧтӧдіс сьӧд уссӧ йӧлас да дзурснитіс-юыштіс.

— Йӧв, другӧ!

Видзӧдлісны гӧгӧр — некод эз тыдав.

— Юам йӧвсӧ, мыйта тӧрас, да мунам, — пидзӧсчанясис бидон дорӧ Микит да дучкис, гашкӧ, ведра джын йӧв.

— Ю, другӧ, — тшӧктіс Титлы. — Кӧдзалыштӧма, да зэв чӧскыд!

Мый-мый, а йӧвтӧ юны Тит вермӧ жӧ. Микитӧс прамӧякодь пановтіс.

Сэсся шойччыштісны да бара юисны сэтчӧдз, мый йӧлыс ныр розьясӧдыс бӧр кутіс петны. Но бидонас зэв на уна коли.

— Нуам сьӧрсьыным, — шуис Микит. — Кулӧмасигмоз юам. Рок позьӧ пуны и. А шоммас кӧ — шома йӧлыд зэв жӧ чӧскыда юсяс.

— Видасны ӧд, — повзискодь Тит.

— Кодкӧ тӧдлас! — макнитіс кинас Микит.

Йӧв тыра фляга пуктісны пыжӧ, вевттисны мешӧкӧн. Кывтісны водзӧ.

Войнас йӧв юигмоз кулӧмасисны. Ведра-мӧд чери шедіс. Асывводз петісны берегӧ, бара пуксисны йӧв юны.

— Эк, шоммӧма! — шогӧ уси Тит.

— Нинӧм! Сукмыштас да бара на зэв чӧскыд лоӧ, — вочавидзис Микит. — Ведра кымын со эм на...

— Ведра йӧв сӧмын нин и коли? — кыліс кустъяс дорсянь гора гӧлӧс. Микит дрӧгмуніс да кынмис места вылас, а Титлӧн повзьӧмысла лигышмуніс ки-кокыс.

Кустъяс дорын сулалісны верзьӧмаяс: бригадир да кык пастук. «Пастукъясыс, буракӧ, аддзылӧмаӧсь йӧв пышйӧдӧмсӧ»! — гӧгӧрвоис Микит.

— Но мый нӧ, йӧв радейтысьяс, мунамӧй миянкӧд, — корис бригадир.

Ёнакодь повзьӧм вӧсна Микитлӧн гудыртчис кынӧм пытшкӧсыс, а Тит йылысь он нин и сёрнит: быд дас воськов бӧрын ляпкӧдчылӧ кустъяс дорӧ.

Йӧв радейтысьясӧс вайӧдісны турун пуктысьяс дорӧ.

— Кытчӧ нӧ ті ӧти войӧн та мында йӧвсӧ воштінныд? — шензисны чӧвтысьяс.

— Юим! Йӧвсьыд ӧд он ум, — зілис ставсӧ шуткаӧ бергӧдны Микит.

— Сэсся рок пуим, — раминика содтіс Тит.

— Йӧла рок, сідз кӧ, радейтанныд? — юаліс бригадир да бергӧдчис пусьысь нывбабалань: — Пу налы, Петровна, рок. Флягаас кольӧма шома йӧв, сійӧн и пу.

— Вай эн дурӧй, ёртъяс, — кутіс кевмысьны Микит. — Миян эм кык ыджыд ведра чери, босьтӧй сійӧс. Йӧв бидон доныд чериыс сувтас жӧ...

— Черисӧ пажун кежлӧ пуам, но тіянӧс, другъяс, йӧла рокнас вердам жӧ! — сералісны чӧвтысьяс.

Шоммӧм йӧла рок пусигкості Титлы да Микитлы ковмис зіля чӧвтны. Сэсся пуксьӧдісны другъясӧс рок тыра ведра дорӧ да збыльысь шуисны:

— Панялӧй!

Тит да Микит йӧжгылясисны, йӧжгылясисны, но — нинӧм он вӧч — панялісны роктӧ.

Йӧла рокӧн чӧсмасьӧмсянь уна нин кадыс коли, но рок йылысь казьтыштӧм бӧрын Титлӧн да Микитлӧн мыш кузяныс век на йирмӧг котӧртӧ.