ЗЫРГУНОВ ЮРАЛӦ

Ёна радліс Ёгор Зыргунов, кор сійӧ нем виччысьтӧг лои райсобесса юралысьӧн. Воддзаыс, кодӧс вуджӧдісны мӧд удж вылӧ, вывті нин кокниа сеталӧма пенсияяссӧ. Тӧлысь вӧлӧм оз коль, а пенсия вылӧ петӧм мортыс деньга нин босьтӧ. Дерт, колана документъясыс век вӧлӧм тырмымӧн, но оз жӧ позь тадз тэрмасьны! Оз, Зыргунов оз кут тэрмасьны. Зыргунов петкӧдлас, кутшӧма кужӧ юравнысӧ: мед пенсия вылӧ петысьыс видлас пенсияыслысь кӧрсӧ.

Зыргунов кутыштіс киас сьӧкыд папка да жмоткис сійӧс пызан вылӧ. Тайӧ папкаас вӧліны справкаясыс Павел Каневлӧн — пенсия корсьӧм вылӧ. Кык во чӧжӧн сы мындаӧс мортыд чукӧртӧма — комната мӧд позьӧ нин кышны.

— Этша на справкаыс, — ышловзис Зыргунов. — Ковмас нӧшта ӧтчыд ыстывны Каневӧс комиссия вылӧ. Дерт, быд комиссия вылын врачьяс, быттьӧ сёрнитчӧмаӧсь, пуктӧны ӧткодь диагноз да сетӧны мӧд группа инвалидность. А мыйла мӧд группа? Мыйла оз первойӧс либӧ коймӧдӧс? Ковмас ыстыны Каневӧс карӧ.

Ветліс Канев карӧ. Аддзӧ Зыргунов: колӧ сетны мортыслы пенсия. Но ӧд он жӧ дзик пыр сет! Со, шуам, Каневлӧн куим челядь и куимнансӧ вердӧ ачыс. «Мыйӧн вердӧ? — думыштчис Зыргунов, — ӧд Каневыс кык во нин оз уджав, а пенсиясӧ эг на сетӧй. Сэсся справкаыс кык во сайся. Тайӧ каднас челядь пиысь кодкӧ вермис и кувны, а вермис и выль лоны. Дерт, Канев зэв нин пӧрысь да и висьӧ, но мыйыс оз овлы. Ковмас корны выль справка».

Канев ыстіс справкатӧ, сэсся тӧлысь-мӧд мысти пырис ачыс.

Зыргунов дыр видлаліс пуд джын сьӧкта папка, кӧдзыда видзӧдліс ӧдва ловъя Канев вылӧ да пуктіс кабырсӧ папка вылӧ: — Ставыс пӧрадок, Канев ёрт. Тэныд позьӧ нин сетны пенсия. Но колӧ нӧшта ӧти справка, мый тэ ловъя.

— Он ӧмӧй аддзӧй? — шатовмуні Канев.

— Аддза. Но ӧд тэнӧ, Канев ёрт, папкаас он вур... Миянлы документ колӧ!

Павел Канев довъялігтырйи петіс кабинетысь.

Недыр мысти кывсис: Павел Канев пӧ сьӧлыштӧма пенсия вылас да нюжӧдӧма коксӧ.

— Вот лёк йӧзыд!

Кык во шедӧдіс пенсия да эз вермы нӧшта воджын виччысьны.