СИЗИМ МОЛОДЕЧ ДА ДЕД

Сизим молодеч мӧдлапӧвсянь вуджӧны. Пыж мунӧ сир моз ӧдйӧ. Кыкӧн сынӧны, ӧти бӧжалӧ, а нёльӧн сьылӧны — видзӧднысӧ любӧ. Молодечьяс уджыштісны, кӧнкӧ, буриника, и со ӧні, рытланьыс, гортаныс тэрмасьӧны. А налы паныд ичӧтик пыжӧн локтӧ Спиридон дед. Ньӧжйӧник сынӧ. Дед зэв нин пӧрысь, ӧдва вӧрӧ.

— Здорово, дед! — горзӧны молодечьяс. — Бара нин вуграсьны?

— Но и олӧм жӧ тэнад, дедӧ, — довкйӧдліс юрнас Бубин Вась, — уджавны ни тӧждысьны оз ков. Мойд, а абу олӧм!

— Ме, пиянӧ, ассьым уджалі-олі и, думайта, эг омӧля. Эм мый казьтывны, — вочавидзис дед — А ӧні нӧ мый? Ӧні ёкышпиянӧс кыйыштам, юква пуыштам да паньыштам, вот и став уджыс...

— А ми, дедӧ, буриника уджыштім, кисьтыштім пӧсьнымӧс, — ошйысис Бубин Вась. — Со быдса ді весалім быдсяма лӧпсьыс.

— Зэв бур, пиянӧ, — ошкис дед. — Турун пуктігад машинаясыд оз кутны жугласьны. А ме вуджала, ёкышъясӧс нидзувъясӧн чӧсмӧдышта...

Дед качайтчыштіс ыджыд пыжлӧн гыяс вылын да кывтіс водзӧ.

Недыр мысти сійӧ пукаліс нин ваӧ видзӧдысь бадьяс улын да, рытъя кыаӧн любуйтчигтыр, кадысь кадӧ кыпӧдаліс ёкышъясӧс.

Вуграсьыштӧм бӧрын дедлы окота лои пусьыштны да ужнайтыштны. Матігӧгӧрын кос пес эз вӧв. Дед кавшасис крут берегті видз вылӧ, но пыр жӧ видыштіс асьсӧ: кутшӧм нӧ пес вермас лоны видз вылын, кодӧс лунтыр весалісны сизим молодеч! Спиридон дед видзӧдліс гӧгӧр да збодермыштіс: неылын тыдалісны бадь кустъяс, а сэні, дерт жӧ, эмӧсь кос вожъяс, а то и ыджыд ваӧн вайӧм пу торъяс.

Дед веськӧдчис бадьяслань, но эз на вевъяв и дасысь воськовтны, кыдзи син улас уси муӧ тувъялӧм майӧг пом, «Кольӧм во вӧв дӧмлӧмаӧсь, а молодечьясыд абу аддзӧмаӧсь, — думыштіс дед. — Туруныс быдмас, а майӧгыд оз быдмы, вот ытшкан машинаыд и бара жугалӧ». Дед копыртчис да зілис нетшыштны майӧгсӧ, но сійӧс тувъялӧмаӧсь, вӧлӧмкӧ, сьӧлӧмсянь, бура. Дыркодь мырсьӧм бӧрын дед кыдзкӧ-мыйкӧ шедӧдіс да шыбитіс берегӧ. Пӧлясигтырйи мӧдӧдчис водзӧ, но пыр жӧ крукасис кузь сутугаӧ да нюжӧдчис дженьыдик туруна видз вылӧ. Дед ёрччыштіс, гартіс сутугасӧ кольчаӧ да мӧдӧдчис водзӧ, но бадьяс дорӧ сідз эз и во. Аддзис кос краж, сэсся кыскис берег дорӧ сімӧм трос.

— Сизим молодеч! «Буриника уджыштім, кисьтыштім пӧсьнымӧс», — ропкис дед. — Лодырьяс!

Аддзис дед и сімӧм коса, шатун, а сэсся зурасис джынвыйӧ жугалӧм бонаӧ. Сідз нин скӧрмӧм дед дзикӧдз пузис. Вывлань чеччыштлӧмӧн сійӧ петкӧдліс кабырсӧ.

— Ме тіянлы петкӧдла! Гач потласьтӧдзыд нӧйта!

Неуна кӧдзалыштӧм бӧрын Спиридон дед локтіс пыж дорас. Дед гӧгӧрвоис: том молодечьяс унджык кадсӧ гожйӧдчӧмаӧсь, весалӧмаӧсь дісӧ кытсюрӧ да кыдзсюрӧ, и сійӧ ӧтнас став дісӧ выльпӧв весавны некыдз оз вермы.

Пестіс бипур, пуктіс пӧртйӧ ёкышъясӧс, картупель, шомкор. Ужнайтіс, вуграсьыштіс, сэсся вуджис сиктӧ.

Эг кывлӧй, мый йылысь дед сёрнитіс Бубин Васькӧд, но мыйкӧ дыра мысти Бубин Вась, сёр рыт вылӧ видзӧдтӧг, чукӧртіс ёртъяссӧ.

Сизим молодеч бӧр лэччисны берег дорӧ. Ёрта ёрт вылас видзӧдтӧг найӧ пуксялісны пыжӧ да вуджисны видз вылӧ...