ЫДЖЫД ЕНБИА ГИЖЫСЬ

Театр радейтысьяслы оз ков уна висьтавны Александр Ларев йылысь. Ленинградса театральнӧй институтын велӧдчигӧн на, а вӧлі тайӧ 1956 воын, сійӧ гижис «Льӧм пу дорын аддзысьлӧмъяс» пьеса. Сійӧс пыр жӧ казялісны театръясса режиссёръяс. И со 1959 вося апрель 25 лунӧ Москваысь Н. В. Гоголь нима театр медводдзаяс лыдын пуктіс тайӧ пьеса сертиыс спектакль. А сэсся муніс 986-ысь Сӧветскӧй Союзса 65 театрын. Коми драмтеатрын сы серти спектакльсӧ пуктісны 1960 воын да сійӧ лоис коми театр радейтысьяслы медся пыдди пуктанаяс лыдын. Со татшӧм шуда вӧлі драматургияӧ туйыс Александр Ларевлӧн.

Чужис Александр Константинович Емдін районысь От сиктса Кырув грездын 1930 вося январ 7 лунӧ. Великӧй Отечественнӧй война воясӧ сизим класс помалӧм бӧрын зіля уджаліс верстьӧяскӧд тшӧтш. 1946–1947 воясӧ велӧдчис Коми Республикаса драмтеатрлӧн театральнӧй студияын. Сэсся мырсис вӧр пилитан да обработайтан Сыктывкарса комбинатын.

1952 вося сентябрын мукӧд коми ныв-зонкӧд лоис Ленинградысь А. Н. Островскӧй нима театральнӧй институтлӧн коми национальнӧй студияса студентӧн. 1957 воын велӧдчӧм помалӧм бӧрын кутіс уджавны Коми Республикаса драмтеатрын актёрӧн. А сэсся вӧлі радиожурналистӧн, Коми АССР-ысь Верховнӧй Сӧвет Президиумса председательлы отсасьысьӧн, Коми республиканскӧй радиоса редакторӧн.

Тайӧ кад чӧжнас эз эновтчыв гижан уджысь. Сылӧн перӧ улысь петіс дас ӧти пьеса. Тайӧ и «Гӧтрасян кад», и «Пиян эз воны гортаныс», и «Миян суседъяс», и «Биа ты», и «Гажтӧм вальс». Александр Ларев — Россияса гижысь котырӧ пырысь. Сылы сетӧма Коми АССР-ысь культураса заслуженнӧй уджалысьлысь ыджыд ним. Уна вося зільӧмсӧ пасйӧма медальясӧн.

* * *

Январ 7 лунӧ ыджыд енбиа коми гижысьлы тырӧ 75 арӧс. «Коми му» газетса уджалысьяс асланыс лыддьысьысьяс нимсянь пӧся чолӧмалӧны Александр Константиновичӧс гӧгрӧс пасӧн, сиӧны сылы кузь нэм да бур шуд, гижны водзӧ мича пьесаяс, кодъяслӧн лоас кузь олан туйыс сцена туйыс вылын.