ШЫБЕЛИТЛӦМ

Ӧти действиеа пьеса

ВОРСЫСЬЯС:

ДМИТРИЙ ВАСИЛЬЕВИЧ — сельсӧветса председатель.

ОЛЬГА ИВАНОВНА — сылӧн гӧтыр, колхозница.

СЕРГЕЙ ПЕТРОВИЧ — парторг.

ПОРСЬЮРОВ ИВАН ДЕМИДОВИЧ — снабженец.

Шпалеритӧм комната. Занавескаяса ӧшиньяс, пызан, улӧсъяс. Шуйгавылын и видзӧдысьяслы паныд — ӧдзӧсъяс. Стенын часі. Комнатаын пукалӧны Сергей да Ольга. Ольга мыйкӧ вурӧ.

СЕРГЕЙ. Вӧлі тӧрыт, Ольга Ивановна, «Заря» колхозын, но и безобразие сэні. Сэтшӧм бур поводдя, а колхозникъяс праздничайтӧны — Успенье празднуйтӧны. И тіян Дмитрий Васильевичыд тшӧтш сэні вӧлӧма. Прӧстӧ оз веритсьы. Ме нарошнӧ локті юавны.

ОЛЬГА. Оз веритсьы? Нинӧм сэні вериттӧмыс абу.

СЕРГЕЙ. Частӧ юӧ али мый нӧ?

ОЛЬГА. Эн шу, Сергей Петрович, ме весиг ог нин и тӧд, мый сэсся вӧчны сыкӧд. Частӧкодь пондіс юлывны. Со и талун: дас час нин, а сійӧ век на абу. Бара кытчӧкӧ ылалі.

СЕРГЕЙ. И важӧн тадзи?

ОЛЬГА. Водзсӧ ӧд эз юлы, Сергей Петрович, а вот воис эсійӧ проклятӧй Порсьюровыс да ӧні пӧшти быд лун рытнас код. Юӧ и юӧ — пом некутшӧм абу.

СЕРГЕЙ. Ковмас, сідзкӧ, торйӧдны найӧс. Дмитрий Васильевич сідзсӧ тӧлка морт, но характернас небыдджык.

ОЛЬГА. Порсьюровлӧн нин некутшӧм тӧлк абу. Гортӧдз локтас, Сергей Петрович, гортӧдз! Ваяс сьӧрсьыс вина да юкталӧ Митяӧс. А юраныс воыштас да гортын оз пукавсьы: синъяссӧ шармӧдӧмаӧсь да пыр мунны кыйӧдчӧны кытчӧкӧ. Некутшӧм оланног эз кут лоны. Тӧв со локтӧ, нывлӧн пальтоыс абу, седьмой классӧ нин кутас ветлыны, а сійӧ — юӧ...

СЕРГЕЙ. Сёрнитла кыкнанныскӧд. А тэ, Ольга Ивановна, эн сибӧд Порсьюровӧс. Прӧстӧ вӧтлыны колӧ, кор локтас винаӧн.

ОЛЬГА. Кӧть ӧд вӧтлан, да Митя тшӧтш мунӧ, Сергей Петрович, кутны он вермы. Ме нин тшӧтш тіян нимӧн сійӧс повзьӧдлі: мися, норася Сергей Петровичлы, партсобрание вылын выступита, кутан кӧ водзӧ Порсьюровкӧд другасьны.

СЕРГЕЙ. А сійӧ мый?

ОЛЬГА. Швачкис пызанӧ. Смотри, шуӧ, лысьтлы сӧмын жалуйтчыны! Ме, шуӧ, петкӧдла сэк гаж!

СЕРГЕЙ. Грӧзитчӧ, сідзкӧ?

ОЛЬГА. Кинас сійӧ некор на менӧ эз вӧрзьӧдлы. Кор ме грӧзиті, сы бӧрын дзонь вежон кост кодӧн эг аддзыв. А ӧні бара заводитіс. Вот кыдзи, Сергей Петрович. Ме кӧсъя нин вӧлі тӧрыт нарошнӧ тэ ордӧ пыравны та йылысь; бур, мый ачыд локтін.

СЕРГЕЙ (сувтӧ да ветлӧдлӧ джодж кузя). Да! Делӧыс абу лад вылын, Ольга Ивановна. Дмитрий Васильевичӧс юӧмысь колӧ непременнӧ дугӧдны. (Кост.) Бутылка пыдӧсын, шуӧны, унджык шогыс кладбище вылын серти. И вермас делӧыс мисьтӧма помасьны.

Посводзын грымгысьӧ тыртӧм ведра. Дмитрийлӧн гӧлӧс: «Пукталӧма сэтчӧ кок улӧ быдсяма дряньсӧ!»

ОЛЬГА (пуктӧ вурсянӧс, сувтӧ). Воис. Бара, тыдалӧ, код.

Парторг пуксьӧ стендорса улӧс вылӧ. Дмитрий пырӧ, гажакодь, парторгӧс оз аддзы, вомгорулас сьылігтыр мунӧ пызан дорӧ да пуксьӧ.

ДМИТРИЙ (барабанитӧ чуньяснас). Тара-рам, пам-пам, та-ра-рам... Иван Демидовичыс эз волы?

ОЛЬГА. Другтӧ юасян?

ДМИТРИЙ. Да, да. Воліс?

ОЛЬГА. Важӧн нин виччысьӧ. Со. (Индӧ парторглань.)

ДМИТРИЙ. Иван Демидович... (Радпырысь бергӧдчӧ и аддзӧ Сергей Петровичӧс.) И... Кхы!.. Сергей Петрович? (Шӧйӧвошӧ, сувтӧ, пӧрччӧ шапкасӧ.) Здравствуйте, Сергей Петрович.

СЕРГЕЙ. Бур рыт, Дмитрий Васильевич. С праздничком!

ДМИТРИЙ. Мый тэ, Сергей Петрович? Талун ӧмӧй кутшӧмкӧ праздник?

ОЛЬГА. «Праздник!» Праздник тай тэныд быд лун, яндысьтӧм синлы. Бара нин лакӧмыд? (Пырӧ орчча комнатаӧ.)

СЕРГЕЙ. Вот и объяснит, Дмитрий Васильевич, кутшӧм тэн помтӧм праздник воӧма?

ДМИТРИЙ. Меным? Меным некутшӧм абу праздник.

СЕРГЕЙ. Абу праздник, а праздничайтан, гажӧдчан быд рыт? Ачыд тӧлка морт и абу лёк работник, а неуна ылавны кутін румкаяс дінын.

ДМИТРИЙ. Да ӧд быдӧн неуна грешитӧны, Сергей Петрович. Менам удж бӧрад юыштӧмыд ыджыд вред оз вӧч. Шуӧны: «Ю, да делӧсӧ тӧд».

СЕРГЕЙ. Тэ, гашкӧ, думайтан сідз жӧ да, кыдзи сёрнитан?

ДМИТРИЙ (нюмъёвтӧ). Вернӧ, Сергей Петрович. Ме, дерт, гӧгӧрвоа, но...

СЕРГЕЙ. Оправдывайтчан?

ДМИТРИЙ. Но, да...

СЕРГЕЙ. Вот мый, Дмитрий Васильевич. Ме талун ог нин кут сёрнитны тэнад грекъяс йылысь. Талун тэ код. Палялан да сэки сёрнитам. Колӧ шыбитны румкаасьӧм да стопкаасьӧм. Абу делӧ тайӧ! Тэ жӧ коммунист, Порсьюров вылӧ тэ эн видзӧд. Сійӧс ӧтитор, тыдалӧ, сӧмын вермас справитны. Думыштлыны колӧ та йылысь. Гӧгӧрвоин?

ДМИТРИЙ. Мыйла нӧ эг гӧгӧрво?

СЕРГЕЙ. Но вот сідз. (Лӧсьӧдчӧ мунны.) А аски тэныд колӧ кайлыны райсӧветӧ совещание вылӧ. Звӧнитлісны. Но аддзысьлытӧдз. (Мунӧ ӧдзӧслань.)

Пырӧ Порсьюров. Сійӧ ёна гажа, кыкнан зептас вина бутылка.

ПОРСЬЮРОВ (парторгӧс чайтӧ Дмитрийӧн, кӧсйӧ кутлыны). Привет, Васильевич! Гуляйтам, Васильевич, во! Ми, брат...

СЕРГЕЙ. А, ноко, бергӧдчы бӧр!

ПОРСЬЮРОВ. А?

СЕРГЕЙ. Бӧр бергӧдчы! (Бергӧдчӧ ӧдзӧслань.)

ПОРСЬЮРОВ. Тайӧ тай абу Васильевич? Но, абу кӧ Васильевич и знать не знаю. Кӧні Васильевичыс?

ДМИТРИЙ. Ме тані.

ПОРСЬЮРОВ. Во! Закон-порядок! Васильевич, давай ми тэкӧд...

СЕРГЕЙ. Давай ми, муса друг, мунам гортад.

ПОРСЬЮРОВ. А-а, парторг... (Бӧрыньтчӧ.) Сергей Петрович... Ме, дерт, извиняйтча... Ме локті Дмитрий Васильевич дінӧ ӧти делӧ йылысь тӧлкуйтыштны. Колӧ меным разберитчыны ӧти делӧӧн.

СЕРГЕЙ. Давай, давай аски разберитчам. (Петӧны.)

ДМИТРИЙ. Нда-а, неприятнӧ! Гортӧдз воліс менӧ видны. (Кост.) А аски, сідзкӧ, райсӧветӧ. (Комната ӧдзӧслань.) Оля! (Петӧ Ольга.) Аски кол\ӧ ветлыны совещание вылӧ райсӧветӧ. Тэ висьтав конюхлы, мед час сизим кежлӧ вӧв доддялас.

ОЛЬГА. Кутшӧм совещание?

ДМИТРИЙ. Ог тӧд. Парторг висьталіс, звӧнитлісны пӧ...

ОЛЬГА. Другыд аски тожӧ тӧварла мӧдӧдчӧ. Бара ӧтлаасянныд?

ДМИТРИЙ. Сійӧ, буракӧ, тӧварысла оз райсӧветӧ мун.

ОЛЬГА. Ті, небось, аддзанныд ёрта-ёртнытӧ.

ДМИТРИЙ. Но и мый?

ОЛЬГА. Юлы сӧмын! Ме сэк Сергей Петровичыдлы ставсӧ висьтала.

ДМИТРИЙ. Мыйла нӧ ӧбязательнӧ юа? Зэв бура верма и не юны.

ОЛЬГА. Воан кӧ кодӧн, сідзи и тӧд, сразу норася. (Пырӧ комнатаӧ.)

ДМИТРИЙ. Тэ бара норасян, тэнад артмас.

Друг воссьӧ ӧдзӧс, пырӧ Порсьюров.

ПОРСЬЮРОВ. Ме дінӧ дзик сира прать моз сирасис, муртса и мездыси. (Ӧдйӧ вежӧ сёрнисӧ.) Юрыд висьӧ? Колӧкӧ веськӧдыштам.

ДМИТРИЙ. Юр висьӧмыдлы тай честьӧ он во!

ПОРСЬЮРОВ. Ветлам миянӧ, веськӧдчыштам.

ДМИТРИЙ. Ог, гӧтыр видчӧ дай аски колӧ райсӧветӧ совещание вылӧ мунны.

ПОРСЬЮРОВ. Ме мӧдӧдча жӧ районӧ тӧварла. Ӧтлаын мунам. (Кост.) Да! А кыдзи миян ӧнтая сёрни йывсьыд? Менсьым актъяссӧ заверитан?

ДМИТРИЙ. Кутшӧм актъяс?

ПОРСЬЮРОВ. Вунӧдін нин? (Кост.) Но, эсійӧ куим бӧчка чери йывсьыд, кодӧс тай вӧйтім перевоз дінӧ.

ДМИТРИЙ. Ог вермы, Демидыч, оз позь. Ме жӧ немтор эг аддзыв и немтор ог тӧд.

ПОРСЬЮРОВ. Кыдз эн аддзыв? Ӧтилаын, ӧти пароходӧн локтім тэкӧд. Тэ, дерт, ёнакодь сэк гажа вӧлін, но помнитны должен.

ДМИТРИЙ. Тэкӧд ӧти пароходӧн локтӧм ме ог помнит. Да и сэтшӧм кода юрӧн ме некор на карысь эг волывлы.

ПОРСЬЮРОВ. Кыдзи жӧ сэтшӧмтор он помнит? Ӧтилаын пароход вылын локтім. Сэн жӧ миянкӧд МТС-ысь вӧлі счетовод. Куимӧн юим. Ме ещӧ тэнсьыд сэк 25 шайт деньга удждысьлі.

ДМИТРИЙ. Менсьым деньга удждысьлін?

ПОРСЬЮРОВ. Весиг и тайӧс он помнит? Ай-ай-ай! Кызь вит шайт ас кинад жӧ сетін.

ДМИТРИЙ. Ог тӧд, ог помнит, Демидыч. Ей-богу ог помнит!

ПОРСЬЮРОВ. Но, он кӧ помнит, оз и ков. А актъяс менсьым век жӧ ковмас кырымавны. Понятӧйяс пыдди ме кырымӧді перевозщик Евстапейӧс да Тима Ласейӧс, а тэ должен заверитны налысь кырымпасъяс. Ӧд делӧыс вӧлі вежон сайын нин, а менам актъясыс век на оформиттӧмӧсь.

ДМИТРИЙ. Тима Ласей нӧ кутшӧм понятӧйӧн вермас лоны. Сыысь прамӧйджык мортыс нӧ сэсся эз нин сюр?

ПОРСЬЮРОВ. Но, колӧкӧ, вермам понятӧй пыдди МТС-са счётоводӧс кырымӧдны. Сӧмын вот сы дінӧдз комын километр сайӧдз ковмас ветлыны.

ДМИТРИЙ. Ладнӧ, Демидыч, та йылысь мӧдысьджык.

ПОРСЬЮРОВ. Меным жӧ колӧ актъяссӧ кыдзкӧ регыдджык оформитны, а то вермас лоны ревизия. Куим бӧчка чери — абу шутка.

ДМИТРИЙ. Ладнӧ, Демидыч. Аскомысь воа районысь, сэк и оформитам. А ӧні, кыдз шуасны, «бай-бай» — кадыс ӧд войшӧр гӧгӧр нин.

ПОРСЬЮРОВ (ӧдйӧ кыскӧ зепсьыс бутылка). Правильнӧ! Юыштам по стопочке, и — «бай-бай». (Индӧ ӧдзӧслань.) Гӧтырыд узьӧ нин? Ноко, мыччыв стӧканъястӧ! Аддза, юрыд, коньӧрлӧн, висьыштӧ.

ДМИТРИЙ (кок чунь йылас ветлӧ стӧканъясла). Сӧмын ичӧтика.

ПОРСЬЮРОВ (кисьталӧ стӧканъясӧ). Эн пов, сӧмын бутылка пыдӧсас и кольыштіс ӧнтай. Тэ мыйкӧ сэн парторгкӧд ноксин, а ме сэккоста бутылка джынсӧ ӧтнам кокышті. Но, босьт. (Юӧны.)

ДМИТРИЙ. Сідзкӧ, аски ӧтлаын мунам районад?

Сцена вылын пемдылӧ. Пырӧ Ольга.

Пырӧ Дмитрий, сійӧ гажа, киас чемодан.

ОЛЬГА. Но и олӧм жӧ лои, бара нин код локтӧ! Совещание вылӧ ветліс и кодакості удитӧма юны!

ДМИТРИЙ. Вот и вои. А тэ, значит, пукалан? Аха! Ладнӧ, пукав, пукав. А? Гажа, шуан? Ме ог шу, мый ме зэв гажа, но неуна эм.

ОЛЬГА. А тэ жӧ кыв сетлін парторглы водзӧ не юны.

ДМИТРИЙ. А?

ОЛЬГА. Вунӧдін?

ДМИТРИЙ. Кодӧс? Да, Сергей Петрович? Хм... Хымх! Ндаа... Ме ӧд ӧнтай шулі Порсьюровлы, а сійӧ мути-бесыд торкис.

ОЛЬГА. Бур кывсӧ кӧ сылысь эн гӧгӧрво, ӧні гӧгӧрвоӧдас. Аски пӧкмелитӧдас тэнӧ!

ДМИТРИЙ (петушитчӧ). Но и мед... Ме... А мый ме? Мен, значит, оз позь и юыштны? Кӧн сэтшӧм законыс, а? Абу?

ОЛЬГА. А йӧзыс, йӧзыс мый шуӧны?

ДМИТРИЙ. Коді? Кутшӧм йӧз? А йӧзыс мед чӧв олӧны, ме, буракӧ, ог налысь ю?

ОЛЬГА. Синъяс ог нин лысьт некод вылӧ лэптывны тэ вӧсна.

ДМИТРИЙ. А тэ эн и лэптав, он кӧ лысьт. Тӧд ассьыд делӧтӧ и, значит, — ставыс.

ОЛЬГА. Охо-хо... Метӧ тӧда, а тэ вот, донаӧй, вунӧдны мӧдін.

ДМИТРИЙ. Коді? Ме? Ме нинӧм эг вунӧд. Ме тӧда, аски Сергей Петрович мен... Меным аски сіӧ... Эк! Но ме абу мыжа, ми локтім Демидовичкӧд и вот...

ОЛЬГА. Тряпка тэ, Митя.

ДМИТРИЙ. Ме абу тряпка, а ме — председатель сельсӧвета и уджала быд лун, а вот рытъяснас, значит, неуна и...

ОЛЬГА. Дыр-ӧ нӧ тадзи верман уджавны, чӧвтасны ӧд удж вывсьыд.

ДМИТРИЙ. Хо! А ми абу полысь десяткаысь. Чӧвтасны — бур, значит, мӧд удж аддзам, а оз чӧвтны — бара жӧ бур. Ми вокнас оз на ӧтарӧ-мӧдарӧ шыбласьны. Вот, значит, кыдз. Ми руководящӧй работникъяс, и миян быдлаысь сюрӧ руководящӧй удж. Тэ думайтан, значит, ми вокыс быдлаын, быд бӧрӧздаын туплясям?

ОЛЬГА (шога). Ок тэ, Митя, Митя...

ДМИТРИЙ. Вот, вот, Митя, а Митя — сійӧ Дмитрий Васильевич, а Дми...

ОЛЬГА. Вод вай! «Дмитрий Васильевич!» Пыр комнатаас, узь да тӧлкмы кӧть неуна.

ДМИТРИЙ. Ог ме узь. Демидович кӧсйис пыравны.

ОЛЬГА. Тэ нӧ йӧймин али мый сэсся! Войшӧр-вой — узьны колӧ.

ДМИТРИЙ. А кодлы колӧ, мед и узьӧ. Ме, буракӧ, ог мешайт!

ОЛЬГА. Нывтӧ кӧть жалитышт: тӧв локтӧ, а пальтоыс ӧд абу. Тэ жӧ бать! (Бӧрдӧ.)

ДМИТРИЙ. Ме, буракӧ, гортысь нинӧм на эг нулы, и нинӧм сэні лювзавны. И вообще ме терпитны ог вермы, кор бӧрдӧны. (Сувтӧ.)

Ӧшинь улын кылӧ: «Бывали дни весёлые, гулял я молодец».

Аха! Вот, значит, и Демидович. Локтӧ, значит... А тэ, гӧтыр, эн люсъяв. Ми, значит, по стопке дёрнитам, и — шабаш...

Пырӧ Порсьюров, сійӧ ёнакодь гажа.

ПОРСЬЮРОВ. Вот ме и шуа: «Мися, мыйла не юыштны?» Вернӧ, Васильевич? Ми юам ассьыным, а ог сылысь. А если сідз, то мыйла ме должен сетны отчёт, кӧть сійӧ и парторг? (Кыскӧ вина.) А сійӧ меным шуӧ: «Мед тэнад дукыд эз вӧв Дмитрий Васильевич керкаын!» (Мигнитӧ.) Во, кыдзи! Менӧ дзескӧдӧ тіян парторгыд. Давай, Васильевич, тайӧс лязӧдам, и — закон-порядӧк.

ДМИТРИЙ (видзӧдлӧ гӧтырыс вылӧ). Да, пӧкмелитчыштны оз мешайт. Ольга, вай миянлы мыйкӧ закуситыштны.

ОЛЬГА. Иван Демидович!

ПОРСЬЮРОВ. Ак, Ольга Ивановна! (Пӧрччӧ шапкасӧ.) Здравствуйте вам!

ОЛЬГА (скӧрысь). Гортад мун, Иван Демидович. Оз жӧ позь сэсся тадзи быд лун.

ДМИТРИЙ. Оля, тэ ланьт.

ОЛЬГА. Мун гортад, Демидович, и некор вина бутылкаясӧн эн лок!

ДМИТРИЙ. Оля!

ПОРСЬЮРОВ. Хе! Ми, Ольга Ивановна, сӧмын по стопочке...

ОЛЬГА. Юанныд да быглясянныд, видзӧдігас восӧдӧ. А матькӧмыс, шумитӧмыс...

ДМИТРИЙ. Ольга!

ОЛЬГА. Мый «Ольга»! Пыр мун да вод, синъястӧ шармӧдӧмыд вина вылӧ. (Босьтӧ верӧссӧ сойӧдыс.) Порсьюров ехиднӧя видзӧдӧ, кыдзи нуӧдӧны Дмитрийӧс, килькъялӧ. Дмитрий аддзӧ тайӧс, яндысьӧ, нетшыштчӧ.

ДМИТРИЙ. Тэ, Оля, эн сюйсьы, кытчӧ оз юавны. Ме абу на код, и стопка винаыд оз на личкы. Ми юыштам, значит, и — всё. Вайлы мыйкӧ, черитор ли мый ли...

ПОРСЬЮРОВ. Во! Закуска, и — закон-порядӧк!

ОЛЬГА. Сідзкӧ, Митя, он кывзысь? Но, ме сэсся ог кут тэныд дӧзмысьны, ачыд тӧдан.

ДМИТРИЙ. Закуска, мися, вай, гӧгӧрвоан?

ОЛЬГА. Аски кутан гырддзатӧ курччавны, да он судз. (Сувтовкерӧ, пырӧ орчча комнатаӧ.)

ДМИТРИЙ. Вот, Демидович, делаясыс кутшӧмӧсь.

ПОРСЬЮРОВ. Нда-а... Косӧн буди юыштам-а?

ДМИТРИЙ. Косӧн абу делӧ. И вообще давай ог юӧ сэсся.

ПОРСЬЮРОВ. Эн сёрнит! Мунам ми ордӧ. Менам эм сола огурчикъяс, во! Кывтӧ ньылыштан! Бӧчка аслым пырті. Снабженец кӧ и — снабженец, асьнымӧс ог кутӧй ӧбижайтны. Вернӧ ме сёрнита, Васильевич? Ме и тэн верма пыртны ӧти бӧчка, кыдзи друг мортлы.

ДМИТРИЙ. Кутшӧм бӧчка? Но и паразит жӧ тэ, Демидович! Ме ог ло ме, оз кӧ тэныд прокурор тальччы бӧж вылад.

ПОРСЬЮРОВ. Хоо! Ми лыйлӧм воробейяс, Васильевич, тӧдам закон-порядӧк. Ми ог кодлысюрӧ: аслыс предрайпотребсоюзалы бӧчка огурцы кежӧді.

ДМИТРИЙ. Ме аски жӧ кытчӧ следуйтӧ, а то гижа газетаӧ.

ПОРСЬЮРОВ. Тэ явитан?! Тэ мый, Васильевич, ачыд-ӧ?

ДМИТРИЙ. Тэ код добраӧн сідзи тӧргуйтан? Аснад? (Кучкӧ пызанӧ.)

ПОРСЬЮРОВ (повзьӧ). Но мый тэ, мый тэ, Васильевич? Вай ог кутӧй... Ас йӧз кыдзкӧ век нин ладмӧдчам. И бостон верма тэд...

ДМИТРИЙ. Кыдз тэ лысьтан татшӧмторъяс йылысь мекӧд сёрнитны?

ПОРСЬЮРОВ. Васильевич, Васильевич, да ме жӧ... Ме жӧ шутита... Хе-хе... А тэ нӧ, збыльысь... Хе-хе... Кыдзи нӧ позьӧ? Абу ӧд аслам! Мый тэ? Али окота меным ӧрешки сайын решетка сёйны. Тьфу! Решетка сайын ӧрешки сёйны?

ДМИТРИЙ. Соссьыны мӧдін? А кутшӧм огурцы йылысь висьталан?

ПОРСЬЮРОВ. Да тӧрыт вайим, Васильевич, но и магазинъясӧ эг на удитӧ пыртны, а асьным кило-мӧд видлыны босьтім. А, гашкӧ, портитчӧма, он ӧд тӧд, Васильевич. Пыртан магазинӧ, а сійӧ — сісь. Коді мыжа? Порсьюров. Мыйла эз видлы? Вот кыдзи делӧыс! А тэ збыльысь думайтін?

ДМИТРИЙ. А кутшӧм бостон тэ меным вӧзъян?

ПОРСЬЮРОВ. Да некутшӧм абу. Ме видзӧда да, тэ ӧзйыны мӧдін. Час, думайта, содта жарсӧ, видзӧдла, мый лоӧ водзӧ. Хе-хе-хе...

ДМИТРИЙ. Чӧрт тэ! А ме думайтлі збыльысь.

ПОРСЬЮРОВ. Но-о, мый тэ?

ДМИТРИЙ. А век жӧ, Демидыч, тэ мыйсюрӧ куралан аслыд.

ПОРСЬЮРОВ. Да ӧд сэсся, Васильевич, колӧ сідз думайтны. Но вот, вайисны, шуам, бостон, а менам пинжакӧй киссьӧма, но ӧд аслым босьттӧг ог жӧ ов, ме ӧд морт жӧ, Васильевич. Но и босьта, мынта деньга, оформитам, и — ставыс.

ДМИТРИЙ. Хм... Но ладнӧ, чӧрт тэкӧд, плутуйтан кӧ, ачыд жӧ сюран. (Очсалӧ.) Водны сэсся колӧ, и юр висьӧм со прӧйдитны кутіс, слава богу. А аски парторг, колӧ чайтны, век жӧ пывсьӧдыштас.

ПОРСЬЮРОВ. А тайӧс? (Индӧ бутылка вылӧ.)

ДМИТРИЙ. Ог. Гӧтыр тшӧтш со видчӧ.

ПОРСЬЮРОВ. Э, да тэ тай челядь на, Васильевич. Хе! «Гӧтыр видчӧ!» Да найӧ сы вылӧ и эмӧсь, мед видчыны. А парторглы кутшӧм таӧдз делӧ? Тэ жӧ уджалан бура, но и закон-порядӧк. А сё грамм мыйла не юыштны? Полан кӧ гортад юыштны, петалам миянӧ. Миянын видчысь некод абу. Сэні жӧ и актъяс меным заверитан.

ДМИТРИЙ. Кутшӧм нин бара сэні актъяс?

ПОРСЬЮРОВ. Тӧрыт жӧ тэ кӧсйысьлін вӧйтӧм куим чери бӧчка вылӧ акт кырымавны.

ДМИТРИЙ. Аски, аски. И юны вообще талун кежлӧ тырмас.

ПОРСЬЮРОВ. А мыйла откладывайтны аски кежлӧ, позьӧ кӧ юны талун. Юыштам неуна и закон-порядӧк. (Сюйыштӧ Дмитрийлы вина стӧкан.) Давай...

ДМИТРИЙ. Оз ков.

ПОРСЬЮРОВ. Эк, «оз ков». Чӧскыд да этша, вот мый шу. Но, босьт!

Чокнитчӧны да заводитӧны юны. Тэрыба пырӧ Ольга. Кыкнанныс тшӧкмунӧны да кызӧктӧны.

ОЛЬГА. Ті нӧ дугданныд али он коркӧ? (Тойыштӧ верӧссӧ комнаталань, а Порсьюровӧс ӧдзӧслань.) Убирайтчы татысь и тэ, мун гортад!

ПОРСЬЮРОВ. Да ме, Ольга Ивановна... Да ми... (Зільӧ локны пызан дорӧ.) Да, винасӧ кӧть босьта, тэн ӧд ог, буракӧ, коль? (Сюйӧ бутылкасӧ зептас.) Вот, пӧнимайтан кӧ, кутшӧм баба! (Петӧ.)

ОЛЬГА. Но юин? Пӧтін, гашкӧ, сэсся, али эн на? Аски аддзылан жӧ тэ гаж.

Дмитрий юрсӧ ӧшӧдӧмӧн пукалӧ.

ОЛЬГА. Пыр мун да вод. Али нуӧдлан на другтӧ?

Дмитрий сувтӧ да рама пырӧ орчча комнатаӧ.

Недыр кежлӧ би куслӧ. Пызан сайын пукалӧны Сергей да Дмитрий.

СЕРГЕЙ. Сідзкӧ, бурӧн шуӧм он гӧгӧрво? Тӧлктӧ воштін Порсьюровкӧд другасигад? Нинӧм шуны, бур другӧс корсьӧмыд. Вунӧдін удж йывсьыд, семья йывсьыд, йӧз йывсьыс? Вунӧдін ставсӧ, кутін тӧдны сӧмын асьтӧ, Порсьюров другтӧ да вина бутылка?

ДМИТРИЙ. Но тайӧ вывтіджык нин, Сергей Петрович.

СЕРГЕЙ. Мый «вывтіджык»? Тэ нӧшта правдайтчыны лысьтан? Кӧн вӧлін Успенье лунӧ? Массӧвӧй прогул предотвратитӧм пыдди тэ, сельсӧветса председатель, гажӧдчин бригадиръяс ордын?

ДМИТРИЙ. Кӧнешнӧ, сійӧ...

СЕРГЕЙ. А тэ тӧдан, мый висьталіс тэ йылысь «Заря» колхозса председатель, кор ме юалі, коді сетіс сылы право пьянствуйтны урожай идралігӧн? Ачыс пӧ Дмитрий Васильевич тшӧтш вӧлі. Тэ вылӧ ыстысьӧны. Тэ сетан колхозникъяслы примерсӧ.

ДМИТРИЙ. Ме гӧгӧрвоа, Сергей Петрович, мый неладнӧ вӧчсьыс, но...

СЕРГЕЙ. Сійӧ и лёкыс: гӧгӧрвоан, а вӧчан. Страдайтны кутіс уджыд тэнад. А семьяыдлы кутшӧмджык?

ДМИТРИЙ. Но сійӧтӧ эськӧ нинӧм да.

СЕРГЕЙ. Кыдзи «нинӧм»? Кутшӧм олӧм тэ вӧчан Ольга Ивановналы? Ӧд сійӧ со лун и вой скӧтнӧй дворын уджалӧ, а локтас гортӧ да шойччӧм пыдди тэ кутшӧм шойччӧг сылы вӧчан? Прамӧя кутін шыбӧлитны. Партийнӧй организация оз кут видзӧдны тэнад безобразничайтӧм вылӧ. Ме пукта вопрос партийнӧй собрание вылын.

ДМИТРИЙ (сувтӧ). Мый тэ, мый тэ, Сергей Петрович? Кыдзи позьӧ? Ӧд эстшӧм позор! Ме ӧд абу жӧ аслым враг сэсся. Ме и кӧсъя нин вӧлі шыбитны, но тӧрыт совещание бӧрын ӧтлаасим Порсьюровкӧд, и ылӧдіс чӧртыд.

СЕРГЕЙ. Кокниа новлӧдлӧ нырӧдыд! Тэ ӧ — коммунист.

ДМИТРИЙ. Да ӧд Порсьюров быд лун ме дінӧ сирасьӧ, Сергей Петрович, некыдз он мын.

СЕРГЕЙ. Мыйла ме дорӧ оз сирась? Мыйла сӧмын тэ дорӧ?

ДМИТРИЙ. Да ме жӧ, Сергей Петрович...

СЕРГЕЙ (лӧсьӧдчӧ мунны). Водзӧ ог кутӧй терпитны тэнсьыд пьянствуйтӧмтӧ. Гӧгӧрвоан сійӧс?

ДМИТРИЙ. Но кыдзи нӧ ог гӧгӧрво, Сергей Петрович...

Парторг сувтӧ. Мунӧ ӧдзӧс дорӧ.

ДМИТРИЙ. Верит, Сергей Петрович, сэсся ме... Но капля ог видлы. (Парторг юрнас довкнитӧ да петӧ.) Ндаа! Збыльысь пӧкмӧлитӧдіс. (Кост.) Вот кытчӧдз вои. (Комнатаысь петӧ Ольга, пасьтасьӧ.)

ОЛЬГА. Ме муна скӧтнӧй дворӧ.

ДМИТРИЙ. Но.

ОЛЬГА. А тэ Демидович друг дорад мунан?

ДМИТРИЙ. Оля, тэ кӧть нин эн йир менӧ, сідз нин абу кокньыд.

ОЛЬГА. Пӧкмелитӧдісны?

ДМИТРИЙ. «Пӧкмелитӧдісны!» Жалуйтчин бара?

ОЛЬГА. Жалуйтчытӧг тай бур йӧзыс аддзӧны.

ДМИТРИЙ. Радлан?

ОЛЬГА. Да. Мен овны окота, а не мучитчыны. Локтан ещӧ ӧтчыдысь код юрӧн — мунам Нинакӧд. Ми ог вермӧй сэсся тадзи овны. Мен колӧ уджавны, а Ниналы велӧдчыны. Тэныд кӧ дона семьяыд — ло мортӧн. Мен зэв сьӧкыд и зэв яндзим. Сідзи и тӧд.

ДМИТРИЙ. Вот кыдз! Значит, олӧм жугӧдны гӧтов?

ОЛЬГА. Вот ті Порсьюровкӧд быд лун жугӧданныд олӧмсӧ. (Кост.)

ДМИТРИЙ. Но ладнӧ, Оля. Сэтшӧм делӧ ог на жӧ вӧчӧ. Дугда...

ОЛЬГА. Кывнад эськӧ дугдан да.

ДМИТРИЙ. Видзӧдлам!

ОЛЬГА. Видзӧдлам. (Петӧ.)

ДМИТРИЙ. Быд боксянь топӧдӧны... Збыльысь колӧ регыдджык эновтчыны стопкаасьӧмысь. А Порсьюровкӧд ковмас на сёрнитны. Оз сійӧ чистӧя уджав. Интереснӧ, волас оз талун?

Пырӧ Порсьюров.

ПОРСЬЮРОВ. Васильевич гортын? Но и закон-порядӧк. (Киасьӧны.) Гажтӧм босьтіс. Кӧсъя волыны тэ ордӧ, но пола: гӧтырыд гортын, дай, аддзылі, парторг вӧлі пырӧ татчӧ. Сэсся видзӧда да, петіс, а недыр мысти и гӧтырыд муніс. (Кыскӧ вина.) Мыйла нӧ парторгыс воліс?

ДМИТРИЙ. Пӧкмелитӧдны.

ПОРСЬЮРОВ. Хоо! Шутитан! А ме ордӧ сійӧ пыраліс жӧ. Юасис, кутшӧм бостонӧн веськыда складсянь ме тӧргуйта и кытчӧ вошті ӧгурцы бӧчкаяс.

ДМИТРИЙ (сюся). А кытчӧ воштін?

ПОРСЬЮРОВ. Да некытчӧ эг. Слава богу, сизим во уджала снабженецӧн, некод нинӧм эз казявлы. А сійӧ юасьӧ: кутшӧм деньга вылӧ ми юам и грӧзитӧ прокурорӧн. Хи! Ми тӧдам закон-порядӧксӧ сыысь не омӧльджыка. (Кост.) Тӧндзия моз жӧ видчӧ, мед ме эг лысьт волыны тэ дорӧ. (Кост.) Мися, думайта, Васильевичлӧн юрыс висьӧ, непременнӧ колӧ пӧкмелитчыны.

ДМИТРИЙ. Ме тай, шуа, мися, зэв нин бура пӧкмелитӧдісны. И тэнӧ со пӧкмӧлитӧдӧмаӧсь.

ПОРСЬЮРОВ. А мый шуӧ?

ДМИТРИЙ. Предупреждение сетіс.

ПОРСЬЮРОВ. Устнӧйӧс?

ДМИТРИЙ. Но да. И гӧтырсянь тшӧтш.

ПОРСЬЮРОВ. Тожӧ устнӧй?

ДМИТРИЙ. Аха!

ПОРСЬЮРОВ. Но гӧтырсянь — сійӧ пустяки. Налы он угодит.

ДМИТРИЙ. Кутшӧм гӧтырлы нӧ любӧ верӧслӧн юӧмыс? Ме чайта, и тэнад оз ошкы?

ПОРСЬЮРОВ. Лун и вой тӧчитӧ. (Кост.) А тэнӧ вот парторгыд весьшӧрӧ ӧбидитіс. Морт уджалӧ, войяссӧ, колӧ шуны, оз узь, а сылы — предупреждение. Тайӧ ӧмӧй закон-порядок? Вай пальӧдыштам шогтӧ, Васильевич. Ӧбидитісны эстшӧм мортӧс. (Пуксьӧ.)

ДМИТРИЙ. Сійӧ прав, Демидович. Давай гырысьджык лёкторъяс ог кутӧй виччысьны, а юӧмтӧ шыбитам. Бурӧдз тайӧ оз вайӧд.

ПОРСЬЮРОВ. Шыбитам, Васильевич, шыбитам. Вот тайӧ нӧшта юам медбӧръяысь, и закон-порядок.

ДМИТРИЙ. Дугдам вай ышмыны.

ПОРСЬЮРОВ. Мый тэ, Васильевич, бӧр ӧд он вузав ньӧбӧм бутылкаяссӧ.

ДМИТРИЙ (решительнӧя.) Но давай! (Вайӧ стӧканъяс.)

ПОРСЬЮРОВ. Во! (Кисьтӧ.) Мися тай, дзик нинӧм абуысь тэнӧ ӧбидитісны. Вывті нин стрӧг тіян парторгныд. (Дмитрий босьтӧ сылысь бутылкасӧ, аслыс кисьтӧ этшаник.)

ПОРСЬЮРОВ. А мыйла аслыд сэтшӧм этша?

ДМИТРИЙ. Меным тырмас сэсся. (Лэптӧ стӧкансӧ.) Юам сы вӧсна, мед сэсся не юны!

ПОРСЬЮРОВ. Во, во! Кыдз шуласны, дай бог не медбӧръяысь... Тьфу, мый ме сёрнита... Кӧсъя вӧлі юавны закуска йылысь.

ДМИТРИЙ. Закускатӧгыс пырас. А парторг йылысь лёка некор эн лысьт сёрнитны. Тэа-меаӧс сыкӧд ӧтластитны оз позь.

ПОРСЬЮРОВ. Эновт, Васильевич, сы йылысь сёрнитны. Ю вай, бурджык лоӧ.

ДМИТРИЙ. Ог кут сэсся юны, тырмас! Юыштім нин ассьыным пай! (Пуктӧ стӧкансӧ.)

ПОРСЬЮРОВ. Эн дур, Васильевич! Тэ нӧ збыльысь али мый?

ДМИТРИЙ. Збыльысь.

ПОРСЬЮРОВ. Ни ӧти румка?

ДМИТРИЙ. Ни ӧти капля весиг ог ю.

ПОРСЬЮРОВ. Мукӧдкӧд, дерт, а мекӧдтӧ юыштан. Ю!

Ӧдзӧсӧд пырӧ Ольга да кывзӧ сёрнисӧ.

ДМИТРИЙ. Вот именнӧ тэкӧд и ог кӧсйы сэсся юны.

ПОРСЬЮРОВ (гӧлӧссӧ лэптӧ). А-а! Тшапмин! Он кӧсйы мекӧд юны! Но аддзылам! Бӧрти кутан кевмысьӧмӧн корны, да сёр лоӧ.

ДМИТРИЙ. Неужели тэ менӧ чайтан сэтшӧм мортӧн?

ПОРСЬЮРОВ. А мый сэн чайтнысӧ? Известнӧ делӧ — пьяник председатель. Сыысь вылӧсӧ некод тэнӧ оз и пукты. Сӧмын ме ӧтнам тэнӧ морт туйӧ пуктылі. На ю! (Содтӧ стӧканас.) Эн куражитчы!

ДМИТРИЙ (кучкӧ стӧканӧ да бутылкаӧ). Тырмас тэныд ас винаӧн ветлыны да йӧзсӧ мутитны. Мун гортад, и медым водзӧ татшӧм могӧн эз вӧв локтӧма ме ордӧ! Весась татысь!

ПОРСЬЮРОВ. Збыльысь, сідзкӧ вӧтлан? Менсьым вина юин, и — вӧтлан?

ДМИТРИЙ. Думайта, эг тэ зептысь ю, вот мый менсьым йирӧ сӧвестьӧс.

ПОРСЬЮРОВ. Но пасибӧ, Васильевич, бур кылыд вылӧ. Эг тӧд, мый тэ сэтшӧм... (Босьтӧ киас вина бутылкасӧ.)

ДМИТРИЙ. Мун весась!

ОЛЬГА. Эновт, Митя. Он ӧмӧй аддзы, код нин бара?

ПОРСЬЮРОВ. Сюсь, небось, асланьыд. Юин, юин дарӧвӧй вина, а сэсся вӧтлан? Тожӧ закон-порядӧк. Вот кутшӧм тэ...

ДМИТРИЙ. Кывтӧ кутышт неуна!

ПОРСЬЮРОВ. Эн горзы, ме ог повзьы! Ме вообще абу полысь рӧдысь. Ми тэкӧд рӧщӧтайтчам на, эн пов.

Пырӧ Сергей.

СЕРГЕЙ. Порсьюров, бара нин гажа? Бутылкаӧн и ветлӧдлан?

ПОРСЬЮРОВ. А мый? Тэныд кутшӧм делӧ быдлаӧдз?

СЕРГЕЙ. Прокурор тэнӧ корсьӧ.

ПОРСЬЮРОВ (бутылкасӧ уськӧдӧ). Прокурор?!

СЕРГЕЙ. Сельсӧветын виччысьӧ.

ПОРСЬЮРОВ. Мыйла? Мый сылы колӧ?

СЕРГЕЙ. Вот тэ ветлы да и допросит сійӧс, мыйла лысьтіс корны. Тӧдмӧд закон-порядокнас.

ПОРСЬЮРОВ. Васильевич, мый нӧ тайӧ?

ДМИТРИЙ. Ог тӧд, Демидович. Буракӧ, ачыд тӧдан мыйла?

Порсьюров корсьӧ кепкасӧ, но оз аддзы.

ОЛЬГА. Со кепкаыд.

ПОРСЬЮРОВ. Ог тӧд, мыйла ме ковми прокурорыслы? (Петӧ.)

СЕРГЕЙ. Но, вот, Дмитрий Васильевич, результатъяс кутісны тыдовтчыны. Мый ӧні татчӧ шуан?

ДМИТРИЙ. А мый сэсся шуан? Весиг шунысӧ немтор.

ОЛЬГА. Ӧні весиг шунытӧ немтор? Нӧйтны тайӧс колӧ, Сергей Петрович, прамӧйджыка пывсьӧдны.

ДМИТРИЙ. Менӧ пӧттӧдз нин пывсьӧдісны дай водзӧ на, чайта, пывсьӧдыштасны.

Занавес лэччис.