ВАЖ ВО, ВЫЛЬ ВО ДА ДЕД МОРОЗ

Печора бокса джуджыд нӧрыс вылын сулалӧ Дед Морозлӧн йиысь вӧчӧм дворец, дзирдалӧ уна рӧма югыд биясӧн.

Дед Мороз тэчӧ ыджыд мешӧкӧ выль вося козинъяс. Тані жӧ пукалӧ пӧрысь дед, Важ во, да шпуткӧ-куритӧ. Сійӧ виччысьӧ Выль воӧс, мед сдайтны делӧяс да сёрнитыштны ӧттор-мӧдтор йылысь. Дед Морозлӧн ноксьӧм вылӧ видзӧдігмоз Важ во юалӧ:

— Пӧдарокъяссӧ ӧд, кӧнкӧ, он жӧ быдӧнлы сетав?

— Кодлы пӧдарок, а кодсюрӧӧс и пельӧдыс чепӧльтыштам! — вочавидзис Дед Мороз.

— Сідз, дерт, — довкнитіс юрнас Важ во да петіс ывла вылӧ видзӧдлыны, оз-ӧ тыдав Выль волӧн локтӧмыс. Енэжын мыйкӧ югнитіс, кутіс кывны шум. И со, яръюгыд сявкнитігтырйи, лэччис ичӧтик дирижабль, и сэтысь петіс банйӧм чужӧма нюмъялысь детинка Выль во. Важ во долыда кутыштліс сійӧс:

— Но вот и воин, менӧ вежысь!

— Вои, дедӧ! — гажаа серӧктіс Выль во.

— Давай петкӧдлы да висьтавлы, кыті мый эн удит вӧчны. Кадыс этша нин, а Кремлевскӧй курантъяслӧн ворсӧм бӧрын меным колӧ пыр жӧ пуджны сосъяс да заводитны уджавны.

— Эн тэрмась, пиук, — меліа нюмъёвтіс дед. — Вой шӧрӧдзыс зэв на ылын. Пыралам лок Дед Мороз дорӧ, шойччыштам, сёйыштам да вӧлись нин гӧгӧртам сиктъясӧд. Ӧні тэ кытысянь локтін?

— Кипиевоӧ кежалі. Видзӧдлі тай, кыдзи пукалӧны табак тшын пытшкын правлениеса членъяс да варовитӧны.

— Тулыснас найӧ варовитісны жӧ, сетам пӧ куканьяслы комын гектар видз, — зумыштчис Важ во. — Сідзи эз и сетны. Кӧсйысьӧмтӧ пӧ куим во колӧ виччысьны.

— Локтан гожӧмнас сетасны, — эскӧдіс Выль во. — Обязательнӧ сетасны!

Пырисны Дед Мороз дорӧ. Сійӧ гӧститӧдіс кын чериӧн, пувйӧн, юкталіс кӧдзыд ваӧн. Сэсся Дед Мороз нопъяліс козин тыра мешӧк и куимнанныс пуксисны дирижабльӧ да мӧдӧдчисны Щельяюрӧ.

— РЭБ-са уджалысьяслы пырта пӧдарокъяс, — висьталіс Дед Мороз. — Найӧ сизим вося плансӧ тыртісны тавося июль тӧлысьын дай ӧні зэв бура уджалӧны.

Щельяюрын дирижабль вылын кыпӧдчыны эз вермыны: жугалі. Выль во гудйысьыштіс моторын да юӧртіс:

— Дзик ӧти часть колӧ вежны. «Сельхозтехникалӧн» татшӧм частьыд, дерт, эм. Звӧнитӧ, час мысти колана детальыд вермас сюрны.

— Алло, «Сельхозтехника»?

— Мый? Запчастьяс? — кыліс «Сельхозтехникасянь» унзіль гӧлӧс. — Ни тракторъяслы, ни машинаяслы запчастьяс миян абуӧсь. Сэтчӧ жӧ, заявкаыд тіян эз вӧв. Сетӧй заявка, сэки, гашкӧ, во-мӧд мысти вермам судзӧдны.

Дед Мороз скӧра мурӧстіс:

— Мыйӧн ме Ижмаӧдзыс муна? Автобус коркӧ эськӧ и ветлӧдліс, но ӧні мыйлакӧ оз ветлы. Ковмас, буракӧ, гӧлӧсуйтны.

Дед Мороз пуксис мешӧк вылас да кутіс виччысьны Ижмаӧ мунысь машина. Ӧти машина журкнитіс-муніс, но эз сувтлы. Дед Мороз прамӧя скӧрмис, весиг керка пельӧсъясӧ кутіс грымӧдны-лыйлыны. Сэсся сувтӧдіс мешӧксӧ веськыда туй вылӧ. Локтысь машина сувтіс.

— Миян Ижмаӧдз колӧ мунны, — шыасис Дед Мороз.

— Деньгаыд эм? — кӧсӧйтчыліс гӧрд тошка шопер.

— Кутшӧм деньга?! — мурӧстіс Дед Мороз.

Сылӧн лов шыысь шопер йӧжгыльтчис да зэв ӧдйӧ лэдзаліс шапка пельяссӧ.

— Пуксьы, пуксьы...

Ижмаӧдз воисны лючки-ладнӧ. Дед Мороз муніс пӧдарокъяс разӧдны, Важ во тӧдмӧдіс Выль воӧс Ижмаӧн.

— Мый тані медся тӧдчанаыс? — юаліс Выль во.

— СМУ-лӧн объектъяс, — ышловзис Важ во. — Видзӧдлы кымын стрӧйба заводитӧмаӧсь тшӧтш кыпӧдны. Пӧжар вылын моз шыбитчыласны ӧтилаӧ да мӧдлаӧ. Тӧлкыс, кыдзи аддзан, этша.

Лэччисны Диюрӧ. Мыйӧн мунны Усть-Ижмаӧдз?

— Мунам подӧн. Мый сэсся вӧчан, — шуис Дед Мороз.

Вертеп дорӧ воигӧн Выль во сувтовкерис: мыйла баксӧны мӧсъясыс?

— Шоныд ва корӧны, — висьталіс Важ во. — Тані скӧттӧ йиа ваӧн юкталӧны. Ваялӧны, дерт, вӧвъясӧн, механизацияыс оз на уджав. А кӧсйысьлісны ӧд, ерӧмаканьясыд тӧлӧдзыс вӧчны, но сӧмын ӧти фермаӧ вӧчисны.

Дед Мороз да Выль во чолӧмалісны «Дружба» колхозын уджалысьясӧс, кодъяс водз тыртісны йӧв да яй сдайтан план. Но Важ во век жӧ ышловзис:

— Делӧяс тані эськӧ оз лёка мунны, но абуӧсь шоныд гаражъяс...

Щельяюрӧдз бӧр мунігӧн Выль во казяліс: подӧн ветлӧдлігӧн гынкӧмыс киссьӧма и кок чуньясыс заводитісны кынмыны.

— Бурка эськӧ тэныд колӧ лӧсьӧдны да, — шуис Важ во.

— Звӧнитла Ижмаса комбинатӧ, — пыр жӧ гӧгӧрвоис Выль во. Йитчис Ижмакӧд.

— Буркаяс? — шыасисны комбинатсянь. — Тіянлы кымын гоз колӧ?

— Дзик ӧти гоз, — вочавидзис Выль во.

— Зэв бур. Сетӧй заказ. Матысса кадӧ, гашкӧ, ваясны Наръян-Марысь кыс и заводитам вурны буркаяс. Таво, дерт, оз нин эшты, а мӧд тӧв кежлӧ лоӧ дась.

Ижмасянь Мошъюгаӧ бара ковмис подӧн мунны.

— Но мед: ме тӧда, мый мошъюгасаяс менам честь кузя сетасны бур концерт.

Концерт бӧрас ставныс торйӧдчисны. Выль во видзӧдліс гӧгӧр, гажаа нюмъёвтіс да пуджис сосъяссӧ: водзын вӧлі зэв уна удж 1966 воын.