ВЕТЛІС ГРУЗЛА МИРОН ДЯДЬ

Тпру-ты, ну-ты, Щельяюрӧ
Муніс грузла Мирон дядь.
Ме пӧ вая, мен пӧ сюрӧ:
Эм пӧ тӧлк и юрӧ садь.

Сулеяысь кыскис пробка:
Кынми пӧ да шонтыся.
Лакис Мирон сизим стопка —
Вошис тӧлк и воштіс сям.

Аттӧ дивӧ, мый нӧ тайӧ?
Воши шапка, пышйис вӧв!
Мирон ёрччӧ амбар сайын:
«Кӧн нӧ менам вачӧг пӧв?».

Но, лешакӧ, татшӧм шогсьыс
Стопка ютӧг ог жӧ ов!
Нинӧм вӧсна ме ог шогсьы,
Некодысь вӧд ме ог пов!

Коркӧ вина петіс юрысь.
Мирон бара лои садь.
Тпру-ты, ну-ты, Щельяюрысь
Подӧн локтӧ Мирон дядь.