ВАНЯ КАНЕВ — ДЕПУТАТ

Йӧзыс клубын вывті уна,

Коймӧд час нин сёрни мунӧ.

Босьтӧ кыв со Ичӧт Кузьма:

— Кӧть и рытыс, ёртъяс, кузь на, —

Дыр ме тіянӧс ог манит.

Кольӧм тӧвнас Канев Ваньӧс,

Ставныд помнитанныд татӧн,

Бӧрйылім ми депутатӧн.

Мортыс бур зэв, нинӧм шуны.

Наказ сетлім сылы уна:

Кык шор вомӧн посъяс вӧчны,

Клубӧ пачьяс выльысь тэчны.

Важ юкмӧсын ваыс сукмис,

Шулім кодйыны выль юкмӧс,

Да эг ӧтикӧс, а нёльӧс,

Ӧд ми васӧ юам ёльысь!

Ёльыд, ёртъяс, абу матын:

Верст джын колӧ мунны катыд.

Веня шуліс: «Ставсӧ вӧча

Кыдзи колӧ — бура, стӧча».

Тулыс локтӧ. Регыд бара

Шоръяс ловзясны зэв яра.

Нолтӧ, Ваня, висьтав ӧні:

Шоръяс вомӧн поскыс кӧні?

Клубад пачьяссӧ эн тэч ни,

Кӧть и ачыд зэв бур печник.

Кӧть дзонь во нин коли кадыс —

Кирпичьясыд пыр на складын.

Важ юкмӧсад курӧг подйӧ.

Выль юкмӧссӧ эн жӧ кодйӧд.

— Но и мый нӧ? Кодъяс, гашкӧ, —

Канев Ваньлӧн дедыс кашкӧ.

Кузьма видзӧдліс зэв стрӧга:

— Тэ, дед, ме вылӧ эн лӧгась,

Шуа тэныд: бур йӧз дырйи

Мыжа внуктӧ эн и дорйы.

Дыр-ӧ виччысьнысӧ сэсся?

Кадыс во нин коли сэсянь,

Кор ми внуктӧ бӧрйим татӧн

Сельсӧветӧ депутатӧн!

Тадзи уджавны оз шогмы.

Татшӧм уджсьыс вывті шог мен...

— Уна больгынысӧ нинӧм:

Кутіс сюмавны нин кынӧм! —

Лэптіс кисӧ Шома Петыр.

Пинясьӧ нин, кӧнкӧ, гӧтыр.

Чӧсмасьыштны колӧ чайӧн.

Помаламӧй сэсся вайӧ...

— Вевъялан на мунны гортад,

Кывзам ӧні Канев ёртӧс, —

Председатель шуис гора.

— Канев ёртӧс? Корам, корам!

Петкӧдлы вай ассьыд чужӧм

Да и ошйысь, мыйӧн кужан.

— Мыйӧн ошйысьнысӧ меным?

Мыжа, ёртъяс да и сӧмын, —

Канев Ваня шуис шога. —

Ковмас уджавны выль ногӧн.

Юкмӧс кодъям, поссӧ вӧчам,

Да и клубӧ пачьяс тэчам.

Чайта, эг на ёна сёрмы.

Сэсся уна ог и сёрнит.

Председатель лэптіс кисӧ:

— Кодлы нӧшта сетны кывсӧ?

Гашкӧ, ёртъяс, эскам сылы?

— Кольӧм во ӧд тадз жӧ сьыліс! —

Шома Петыр лэптіс гӧлӧс. —

Ваньлӧн кывйыс, ёртъяс, пӧлӧс:

Больгӧ уна, вӧчӧ этша.

Колӧ сылы, ёртъяс, петшӧр!

Отзовитам депутатысь!

— Ачыд мун вай бурӧн татысь! —

Ёна скӧрмис Ичӧт Кузьма. —

Быд удж вылын зілян узьны!

Ваньлы эскынытӧ позьӧ:

Быд удж вӧчӧ, оз пыр розьӧ.

Йӧзыс шызисны зэв ёна:

— Ваня Канев миян дона,

Эскам сылы — вӧчас ставсӧ!

Эг ӧд прӧста сійӧ татӧн гӧрддзав

Бӧрйылӧй ми депутатӧн!

Шуис аслыс Канев Ваньӧ:

«Оз позь вердны менӧ няньӧн,

Ог кӧ йӧзлысь тшӧктӧм кывзы,

Ог кӧ гӧгӧрво бур кывсӧ...».