БУР ТРАДИЦИЯ

«Март 8-ӧд лунӧ воссяс выставка. Пыралӧй Кельчиюрса школаӧ!» — чуксаліс тыдалана местаӧ ӧшӧдӧм гижӧд. Выставка вылысь эм мый видзӧдлыны. Стенъясын, пызанъяс да этажеркаяс вылын уна пӧлӧс экспонатъяс: вышивкаяс, вурӧмторъяс, салфеткаяс, рисунокъяс, фотокарточкаяс, макетъяс, пуысь вӧчӧм изделиеяс да уна мукӧдтор. Со сулалӧ джоджын табуретка. Сійӧс вӧчисны Толя Вокуев да Петя Канев — витӧд класса велӧдчысьяс. Тані жӧ лобзикӧн пилитӧм мича рамаяс, кодъясӧс вӧчисны Валерий Филиппов да Женя Семяшкин. Пельӧсын ӧшалӧны 5-ӧд да 6-ӧд классаясса велӧдчысьяслӧн карандашӧн да акварельӧн вӧчӧм рисунокъяс. Торйӧн нин бура артмӧмаӧсь рисунокъясыс квайтӧд класса велӧдчысь Александр Каневлӧн.

7-ӧд класса велӧдчысьяс фотокружок вылын тӧдмасисны фотоаппаратӧн. Кружокса членъяс сетісны выставка вылӧ ассьыныс фотокарточкаяс, кӧні петкӧдлӧма школа олӧмысь эпизодъяс.

Ёна шензьӧдӧны выставкавывса вышивкаяс. Со зэв ыджыд вышивка «Тройка». Видзӧдан и он верит, мый татшӧм мичаа кужис вышивайтны 2-ӧд класса велӧдчысь Валя Артеева. Либӧ со «Ур», сійӧ сідз жӧ мӧдӧд класса велӧдчысьлӧн, Вера Тюриналӧн. Мича, нинӧм шуны. Бурӧсь вышивкаяс Роза Беляевалӧн, Оля Поповалӧн.

Выставка вылын таво участвуйтӧны тшӧтш и Усть-Ижмаса, Большое Галовоса да Малое Галовоса начальнӧй школаяс.

Со ӧткымын гижӧдъяс выставкавывса тетрадьысь: «Бӧръя воясӧ школа ортсысяньыс эз вежсьы, но кор пыран пытшкас — радуйтчан. Выставка зэв ёна воис сьӧлӧм вылӧ. Ф. Сметанин». А со мӧд гижӧд: «Выставкаыс бур. Тӧдчӧ, мый челядь быдмӧны удж радейтысьясӧн. С. Вокуева».

Урокъяс бӧрын выставка вылӧ волывлісны колхозникъяс, рабочӧйяс да служащӧйяс. Тайӧ быд вося выставкаыс — миян школалӧн бур традиция.