БУР СЬӦЛӦМА НЫВБАБА

Лысьтысьӧм бӧрын Мария Бабикова кисьталіс воръясӧ шоммӧдӧм нур. Мӧсъяс сёйисны окотапырысь. А ӧтилы, Февралия нима мӧслы, Мария сетіс нурсӧ ведраӧн.

— Раминик зэв да ёртъясыс ӧбижайтӧны, — шуӧ Мария. — Он кӧ торйӧн сет — нинӧм сылы оз сюрлы... Кор нурйыс быри, Мария лэдзис воръясӧ шоныд ва. Туруныд, дерт, таво лёкджык, но фермаын дӧвӧль силос, шоныд ва... Мария Мефодьевналӧн 12 мӧс, вердасаӧсь, чистӧйӧсь. Тавося ӧкмыс тӧлысьӧн доярка лысьтӧма нин быд мӧслысь 2147 килограмм йӧв. Сӧстӧма вӧдитӧ мӧсъяссӧ Мария Бабикова. Сӧстӧма и лысьтӧ. Тӧдчӧ ӧд: стенас ӧшӧдӧма газет, а сы вылын — чистӧй ки чышкӧд.

— Мария — кывзысьысь да зэв уджалысь нывбаба, — висьталӧ фермаса заведующӧй Дмитрий Ильич Вокуев.

Мариялы ӧні на жаль сійӧ бур мӧскыс, кодӧс ковмис начкыны: сюрӧма вӧлі йирсигас сутуга тор да висьмис. Том доярка сэки бӧрдіс быдӧн.

Оз кокниа овсьы том нывбабаяслы. Олӧ вокыс керкаын, а вокыслӧн аслас зэв ыджыд семья. Да Мария Мефодьевналӧн кык челядь. Том нывбаба быдтӧ нӧшта мӧд воклысь, М. Вокуевлысь, нывсӧ, Тамараӧс. Тамаралӧн мамыс абу нин, а батьыс дорын, Михаил Вокуев дорын, Тамара оз кӧсйы овны. Нывка велӧдчӧ 4-ӧд классын.

Абу кокни ӧтка мамлы быдтыны, кӧмӧдны-пасьтӧдны да вердны куим челядьӧс. Верӧсыс сылӧн пӧгибнитіс удж вылын, баржа вылӧ подъёмнӧй кранӧн вӧр грузитігӧн. Некор оз быр тайӧ ыджыдсьыс-ыджыд сьӧлӧм дойыс.

Некымын во сайын, кор Мария Мефодьевна уджаліс школаын уборщицаӧн, аддзывліс вын да кад мыськавны детсадлысь бельё: прӧстыняяс, полотенцеяс, пӧдушка кышӧдъяс да мукӧдтор. Уджавны ковмыліс войясын. И ставсӧ ки помысь: стиральнӧй машинаяс детсадлӧн сэки эз на вӧвны.

Вӧдитіс Мария Бабикова и куканьясӧс. А ӧні со коймӧд во нин уджалӧ дояркаӧн. И, колӧ шуны, бура уджалӧ.