АППАРАТ «БУЛЬ-БУЛЬ!»
Заседаниеяс да совещаниеяс районад, ті асьныд тӧданныд, тырмӧмӧн уна. И менам Ульяна — руководящӧй тьӧтка — сёрнитӧ сэні и тані, нянь йылысь и йӧв йылысь, куйӧд йылысь и вӧв йылысь; сӧмын ме йылысь некутшӧм совещание вылын оз казьтыв. А колӧ эськӧ. Ӧд ме верӧс, ловъя морт, а абу нитшсялӧм сюръя. Меным колӧ шоныд керка, мелі гӧтыр, мед удж бӧрын позис пукыштны пӧсь самӧвар сайын, сёрнитыштны-варовитыштны гӧтыркӧд. А мый артмӧ? Войшӧрӧдз заседайтӧм бӧрын гӧтыр воас руш редька кодь, кельыд чужӧма, мудзӧма — вомдорсӧ нюлыштны оз вермы. Дум вылас ӧти тор — ӧдйӧджык водны да узьны. А кор нӧ сёрнитыштны, кор пукыштны пӧсь чай стӧкан сайын? А гашкӧ, ерӧмакань, меным и окыштчыны на окота? А кулӧмакодь мортыдкӧд нӧ кутшӧм окасьӧм? Бурджык пыртны кын краж да сыкӧд окасьны. Олӧм-ӧ татшӧмыс? Абу олӧм. Кӧть юксьы да выльысь гӧтрась. Но тайӧс вӧчны некыдз ог вермы: синва петмӧн жаль гӧтырӧй. Мыйкӧ мӧдтор колӧ мӧвпыштны. И вот ме чорыда думыштчи.
Гӧтыр сёрниясысь тӧді: совещаниеяс нюжалӧны кузь сёрнияс вӧсна. Мукӧд сёрнитысьыс босьтас кыв да больгас час джын, кӧть тайӧс жӧ позис висьтавны ӧти-кык минут чӧжӧн. Дай нырсӧ весалӧм вылӧ вель уна кад колӧ. «Ваыс, сідзкӧ, сёрниас уна», — думышті ме и шуи вӧчны аппарат, коді эськӧ эз сет сёрнитысьлы киськавны васӧ.
Кокни шуны — вӧчны. Кӧть ме и механик, но мырсьыны ковмис уна. Нырӧй ёсьмис да нюжаліс весьт кузьтаӧдз, синъяс гӧгрӧстчисны, ачым муртса эг дзормы. Во джын мырсьӧм бӧрын аппарат лои гӧтов. Но «ура» горзыны вӧлі водз кодь на. Колӧ видлыны, кыдзи сійӧ уджалӧ. Вермас лоны, мый дивӧ кодь тӧлка аппарат пыдди артмис «дзуж». Ыджыд совещание вылӧ аппараттӧ нуны эг лысьт. Виччыси, кор лоӧ колхознӧй собрание. Сэні ас йӧз, тӧдсаӧсь. Нинӧм кӧ эз артмы — оз ёна серавны.
— Уля, — шыаси гӧтыр дінӧ, — ме лӧсьӧді аппарат. Сёрнитан кадсӧ позьӧ регулируйтны ӧти минутасянь часӧдз! И вот сідз ӧти минут чӧж сёрнитысь сёрниын лоӧ кӧ куш ва аппарат гораа висьталас: «Буль-буль-буль!»
— Мый тэ, Петя! Минутыд вывті этша лоӧ. Мукӧд сёрнитысьыслы минутыс колӧ сёрни водзвылас кызӧдӧм вылӧ.
— Макаренколӧн воспитанникъяс-колонистъяс собраниеяс вылын сёрнитысьлы сетлісны кадсӧ дзик ӧти минут. И тайӧ минутыс зэв бура вӧлі тырмӧ, — шуи ме. Но регулятор пукті кык минут вылӧ.
Сизим час рытӧ ме босьті тіралысь киясӧ ичӧтик чемодан ыджда аппаратӧс да муні собрание вылӧ. Йӧз чукӧртчигкості сёрниті колхозса председателькӧд, ошйысьышті аслам аппаратӧн. Кык минут чӧж сёрниын лоӧ кӧ куш ва — аппарат став йӧзыслы гораа висьталас: «Буль-буль-буль!» Оз кӧ ло ва — аппарат чӧв олӧ. Трибуна сайын сулалысь кутас кӧ сёрнитны регулятор вылын индӧм кадысь кӧть ӧти секундаӧн дырджык — аппарат пытшкын триньӧбтас звӧнок. Тайӧ кӧ оз отсав — аппарат дугӧдас больгӧмсӧ мӧд ногӧн.
Сійӧ ньӧти эз шӧйӧвош, а мӧдарӧ — зэв вӧлі рад. Пукты пӧ пызан вылас. Колхозникъясӧс пӧ аппаратыд оз ӧбидит: найӧ пӧ сёрнитлывлӧны дженьыда да конкретнӧя, а сюрас кӧ больгысь морт — мед сійӧс, колӧкӧ, велӧдыштас. Собрание заводитчӧм водзвылын ме выль пӧв ставсӧ бура видлалі, лӧсьӧді регуляторъяс, да лички кнопка.
Медводз сёрнитіс председатель. Аппарат вылӧ кадысь кадӧ видзӧдлывлігмоз сійӧ вӧчис неыджыд доклад. Сёрни муніс тулыс кежлӧ кӧйдысъяс лӧсьӧдӧм йылысь. Аппарат чӧв оліс. «Абу ваыс докладас, али менам аппаратыс оз уджав!» — волнуйтчӧмӧн думайті ме.
Доклад борын заводитчисны сёрнитчӧмъяс.
Председатель бӧрын сёрнитісны морт куим-нёль, но аппарат эз торкав, сӧмын кадысь кадӧ мигайтіс турунвиж «синмӧн».
Медбӧрын со сувтіс Егор Вась. Сійӧ кӧть и уджаліс вывті дыша, но сёрнитнытӧ зэв вӧлі мастер. А меным сійӧ и колӧ.
Шыльӧдыштіс кинас во дас кымын шырлытӧм сьӧд юрсисӧ да заводитіс: — Тані ёртъяс правильнӧ сёрнитісны. Унатор ми вӧчим да унатор на вӧчам. Мый кыпӧдӧма нылӧ сійӧс, ёртъяс оз ков лэдзны бӧр улӧ. Кӧйдыс сійӧ кӧйдыс и эм. Кӧдзтӧгыд няньыд оз быдмы. А кӧйдыстӧг он кӧдз. Сідзкӧ, колӧ гӧрны, да мый веськалӧ кипод улӧ — сійӧс и кӧдзны. И нинӧм гӧгравны зорӧдъяс гӧгӧр, кор позьӧ гӧрны веськыда... «Буль-буль-буль!!!» Пель чунӧдмӧн гораа йӧзӧдіс аппарат. Йӧз шемӧсмисны, ми председателькӧд серӧктім, а Егор Вась паськӧдіс вомсӧ да чуймӧмӧн видзӧдліс аппарат вылӧ.
Сэсся сайкаліс, кызӧктіс да бара заводитіс сёрнитны, кӧть и эз нин важ мозыс збоя.
— Оз прӧста шуны: мый койыштан — сійӧс и курыштан. Тайӧс ми зэв бура тӧдам. Та йылысь ми, ёртъяс, уна нин сёрнитім да уна на кутам сёрнитны. Сёрнитӧг нинӧм оз артмы. Сэсся босьтам ва. Видзӧдлыны кӧ ӧтар боксянь — быдлаын ва, а видзӧдлыны кӧ мӧдар боксянь — абу! Дерт, кӧні няйт, сэтчӧ ваыд оз ков, а кӧні кос — сэтчӧ колӧ. Зэв ёна колӧ, ёртъяс: ватӧгыд он гӧр... — гораа триньӧбтіс звӧнок.
Ёгор Вась тшӧкмуні, ёна шензьӧмӧн видзӧдліс аппарат вылӧ, сэсся бергӧдчис йӧзлань да мыкталӧмӧн шуис:
— Ӧні со сувтӧ в-вопрос: кытысь босьтны васӧ?
Аппарат гораа чушнитіс, клопмуніс — воссис клапан и сэтысянь пызйыштіс кӧдзыд ваӧн Ёгор Васьлы чужӧмас. Ызӧбтіс серам. Медся ёна сералі, дерт, ме. Ме эг кут ӧшйыны места вылӧ. Окота вӧлі весиг йӧктыштны. Аппарат бура уджалӧ! Ог тӧд, кажитчис эз аппаратыс Егор Васьлы, но йӧзыс ошкисны.
Тайӧ рытсяньыс гӧтыр кыскаліс аппаратӧс быд совещание вылӧ. И, веританныд он, ни ӧти совещание эз кут нюжавны сёрӧдз.
Гӧтыр лои гажаджык, варовджык, дай меліджык.
