ӦБИДИТЧИС

Ті радейтанныд пӧсь шаньга? Ме видзӧда да, кодсюрӧ нюмъёвтісны нин. Да коді нӧ оз радейт пӧсь шаньга, кор сійӧ муртса на петӧма пачысь, банйыштӧма и... нюмъялӧ, морыд!

Босьтан ӧтиӧс, тшукӧдлан выйӧ, чӧскыдпырысь лолыштан да шаньга дуксьыс муртса он вошты садьтӧ. Сэсся, синъястӧ куньӧмӧн, курччан ӧтчыд либӧ кыкысь и, видзӧдан да — абу нин. Вомнад тяпкӧдчигтыр нюжӧдчан мӧдла. Чӧскыд, ерӧмаканьыд!

Миян Семен дядь шаньгатӧ сёйны кызь километр сайӧ мунас. И, дерт, аски кӧ зятьыслӧн чужан лун, то, кыдзи ті думайтанныд, колӧ ветлыны чӧсмасьыштны шаньгаяснас али оз? Дона зятьыс, Шпиголь Иванович, сельсӧветса председатель, нарошнӧ воліс корны тестьсӧ.

Пӧсь шаньгаяс, асьныд тӧданныд, пӧжалӧны водз асылын. А кӧдзалӧм шаньгаыд, колӧ веськыда висьтавны, абу нин шаньга. И, дерт, некод оз кут шензьыны, Семен дядь кӧ кӧмаліс кызь вося сапӧгсӧ, кодӧс вурліс ачыс, да мӧдӧдчис дона зять дорӧ рытсяньыс на.

Орчча сиктӧ воис сёрӧн нин, а арся войясыд пемыдӧсь: кӧть еджыд гачӧн прӧйдит сикт кузяыд, некод оз казявлы. «Ок, и празднуйтыштам ми дона зятькӧд!» — туйсӧ вуджигмоз вӧрӧдіс уссӧ Семен дядь. Кокъяс шедалісны сук няйтысь дзурсмунлӧмӧн.

«Татчӧ и сибдыны абу дивӧ», — кок пӧвсӧ нетшкигмоз думыштіс Семен дядь. Сэсся гӧгӧрвоис, мый сибдӧм кок пӧв оз кокниа шед да мый вынсьыс нетшыштчис. Мыйкӧ клопмуні, быттьӧ лыйисны. Кок пӧв шеді, но шуйга кок бара сибді, и воддза сертиыс, кажитчӧ, ёнджыка.

Весьшӧрӧ Семен дядь пескыльтчывліс ӧтарӧ-мӧдарӧ капканӧ шедӧм кӧч моз, весьшӧрӧ заводитліс косны: сибді и мӧд кокыс.

— Квайтымын во ола да татшӧм дивӧтӧ эг на аддзыв, — гораа шуис Семен дядь да кепканас чышкис чужӧм вывсьыс пӧсьсӧ.

Отсӧг вылӧ горзыны абу мича, став надея ас вылад. Шойччыштӧм бӧрын Семен дядь ыджыда лолыштіс, лӧсьӧдчис да упнитӧмӧн став вынсьыс нетшыштчис водзлань. Ратшмуні кутшӧмкӧ сустав, кыткӧ, кылӧ, резьдіс, но кок пӧв шеді, ӧдва-ӧдва вуджис туй вомӧн Семен дядь. Шапка, бедь да шуйга кокысь сапӧг пӧтшва колины туй шӧрӧ, но косалӧм йылысь нинӧм вӧлі и думайтны.

Пӧсялӧма, быттьӧ муртса на петӧма пывсянысь, Семен дядь довъялігтырйи мӧдӧдчис туй бокті. Пӧтшватӧм сапӧгысь петӧм нямӧдыс эльтчигтырйи шарӧдчис, резсис няйтӧн.

— Петас мед кулак кодь чирей медся небыд местаас... Быд выбор дырйи кӧсйысьӧ мостки лӧсьӧдны, — броткис Семен дядь.

Шпиголь Иванович аддзис ӧдзӧсті пырысь тестьсӧ да думыштіс, мый сійӧ пывсьӧма, а пывсьӧм бӧрас поводнӧя кокыштӧма. Семен дядь видзӧдліс нюмъялысь зятьыс вылӧ, сэсся сьӧкыда жмоткысис-пуксис улӧс вылӧ.

— Вай пӧрччысь, пӧрччысь, Семен Петрович, — сувтіс Шпиголь Иванович.

— Аттьӧ, бур пи, пӧрччӧді нин...

Шпигель Иванович шензьӧмӧн лап-лапкерис лӧзов синъяснас: эз-ӧ выжывмы старикыс?

А «выжывмӧм» старик лэптіс коксӧ, легнитіс нямӧднас:

— Аддзан?

— Аддза...

Шпиголь Иванович кӧсӧйтіс синъяссӧ, бокӧн заводитіс исковтны орчча комнатаӧ:

— Т-тэ, Семен Петрович, пукышт, шойччышт, а м-ме...

— Пӧрччы сапӧгъястӧ, бур пи.

— А? — кынмис Шпиголь Иванович.

— Сапӧгъястӧ, мися пӧрччы! Али не сӧмын паметьнад, но и пельнад тшӧтш слабитны кутін?

Бура и быльӧдіс Семен дядь зятьлысь сьылісӧ, висьталіс ставсӧ, мый чукӧрмис сьӧлӧм вылас.

А асывнас чеччис водз, кӧмаліс зятьлысь сапӧгъяссӧ, ӧвтыштіс кинас да муніс бӧр, весиг пӧсь шаньгатӧ эз виччысь.