ЫЛЫН-ЫЛЫН, ВОЛГА ДОРЫН

Ылын-ылын, Волга дорын,
Йӧзӧс суис ыджыд шог;
Гӧгӧр синва киссьӧ шорӧн,
Воис сьӧкыд оланног.
Сэні кӧдза косьмис ставыс,
Жарла сотчис сэні нянь.
Уна йӧз сэсь кулі таво,
Тшыгла кулі, шондібан!
Смерть сэн ветлӧ, йӧзӧс шырӧ,
Кылӧ бӧрдӧм лун и вой;
Джуджыд кӧдзыд Волга йирӧ
Уна ланьтіс челядь шой.
Уна коньӧр ыджыд шогӧн
Колис ас му, чужан му,
Бӧрдігтырйи, синва сорӧн,
Муніс кытчӧ син оз ну...
Йӧзыс тшыгла вижов-кельыд,
Ставыс ветлӧ вуджӧр моз.
Ымзӧ гырысь, горзӧ челядь:
— «Кодкӧ смертьысь мездас оз?»
Уджалысь йӧз бӧрдӧм кыліс,
Сувтіс налы отсӧг дор.
Коми йӧзлы тшыглун йылысь
Колӧ тӧдны медвойдӧр.
Паськыд Волга дорысь воліс
Пыр на Коми муӧ нянь;
Водзӧс мынтан пӧра воис,
Отсавтӧгыд абу шань.
____

Уна бур йӧз Коми муын
Тӧдӧ водзӧс мынтан мог.
Ас юр вывті куим воӧн
Ёна мунліс курыд шог.
Ылӧ-ылӧ Волга бердӧ
Ыстас гӧснеч коми йӧз;
Тшыгла-шогла дыр нин бӧрдӧ
Волга дорын коньӧр йӧз.
Ыджыд «аттьӧ» челядь шуас,
Уна мамлӧн бырӧ шог. — 
Мед жӧ отсӧг помтӧг мунас!
Мед оз вунлы ыджыд мог!