БАБА СЁРНИ

Шонді петӧ, шонді лэччӧ,
Ӧдйӧ кольӧ лун и вой.
Пӧрысь баба муртса чеччӧ,
Да-э, мунӧ шӧйтны, оз и сёй!..

Шӧйтігмозыс быдтор сӧрӧ,
Оз тай тупкысь сылӧн вом:
— Коммунистлӧн власьтыс пӧрӧ,
Да-э, регыд воас налы пом!

Тулыс локтас, Эжва воссяс,
Кывтас Эжва кузя йи,
Сэки-й налӧн тані овсяс,
Да-э, кылӧдас тшӧтш найӧс йи!..

Прӧста-д абу ӧні бурӧсь,
Сулалӧны гӧль йӧз дор:
Тӧдӧны ӧд найӧ бура — 
Да-э, кывтны лоӧ пом ни дор!..

Керенскӧй пӧ бӧр нин локтӧ,
Регыд пуксяс бара сар, —
Большевикӧй, кыскы коктӧ,
Да-э, эновт ӧдйӧ Сыктывкар!

Коркӧ пӧрысь пӧчлы воча
Паныдасис большевик,
Кыв-мӧд шуис сылы воча — 
Да-э, пӧрысь пӧчӧс суис пик!

— Ок тэ, пӧчӧ, пӧрысь пӧчӧ!
Водзӧ сӧрны тэ эн лысьт!
Мый тэ лун-лун тані жӧдзан,
Да-э, код тэд вайис татшӧм висьт?..

— Бласлӧ Кристос! — пӧчӧ шуис, — 
Абу-ӧ тэ большевик?!
Кутшӧм грек нӧ менӧ суис? — 
Да-э, ме ӧд абу мыжа дзик!

Ставсӧ кывлі тайӧ карын,
Ог тэд соссьы, муса ёрт.
Олӧ Парижын Опарин — 
Да-э, локтіс налӧн салдат морт.

Сэні ӧтчыд локтысь морткӧд
Сёрни вӧлі тадзи дзик,
Правда‐абу, ме ӧд ог тӧд — 
Да-э, йӧз шуӧны — «збыль пӧ сідз»...

— Ок, тэ, пӧчӧ, пӧрысь пӧчӧ,
Кор нӧ тэныд воас смерть?
Он тӧд немтор, йӧз мый вӧчӧ — 
Да-э, мун син водзысь, пӧрысь морт!

Став му пасьта гӧрд би ӧзйӧ,
Регыд лоӧ олӧм бур;
Коммунистыд став бур йӧзсӧ
Да-э, кыпӧдіс нин аслас дор.

Керенскӧйыд оз нин волы,
Йикӧд коммунист оз кывт,
Озыръяслӧн олӧм коли — 
Да-э, пӧрысь пӧчӧ, курччы кыв!