САД ЙЫЛЫСЬ

Уна бать-мам на ӧнӧдз чайтӧны, мый челядь заводитчӧны велӧдчыны сӧмын школаын ар кӧкъямыссянь. Сэтчӧдз найӧ тӧждысьӧны сӧмын, мед эськӧ челядь вӧліны пӧтӧсь, паськӧмаӧсь да эз висьны. Сійӧ кӧ эм, сэсся налы нинӧм оз ков, сэсся челядь йылысь оз и думыштны, мед эськӧ толькӧ оз дӧзмӧдчыны, этшаджык кок улас бергаласны, да и сэн на мамъяслы дзик мат посни челядькӧд: быдлаӧ сюйсьӧны, быдлаӧ кайӧны, оз и дугдывны быдтор йылысь юасьӧны. Мамъяс уджалігад дӧзмӧны, тувкӧны и кучкӧны челядьтӧ, юасьӧм вылас налы оз и кужны частӧ висьтавныс. Сідз челядь и кольӧны ӧтветтӧг, а найӧ ӧд сійӧ велӧдчыны нин заводитӧмаӧсь: ар нёльсянь челядьлӧн пондӧ юр вежӧрыс воссьыны, найӧ заводитӧны быдтор йылысь, мый аддзӧны, думайтны, быдтор сэки налы колӧ тӧдны. Сійӧн найӧ и юасьӧны и вӧрӧдӧны быдтор и быдлаӧ сюйсьӧны. Сэки найӧ быттьӧ садьмӧны, а ми асланым тӧдтӧмнаным найӧс торкам, огӧ лэдзӧй сюсьмӧдчынысӧ. Сы понда ӧд миян челядьным частӧ локтӧны школаад мыр кодьӧсь, дыр накӧд лоӧ ноксьыны велӧдысьяслы. Сійӧ бырӧдӧм вӧсна Сӧветскӧй Правительство ӧні быдлаӧ кӧсйӧ восьтавны детскӧй садъяс. Ӧткымынлаын эмӧсь нин. Сэтчӧ босьтӧны челядьӧс куим арӧссянь сизимӧдз. Уна бур вайӧ сад челядьлы: сэн найӧ ичӧтысяньыс велӧдчӧны ӧтилаын мукӧдкӧд унаӧн овны, ворсігмоз велӧдчӧны ӧтвылысь уджавны, сюсьмӧдчӧны — быд юалӧм вылӧ налы ӧтвет сетӧны. Ещӧ уна бурыс сэсь мамъяслы: лунтыр найӧ вермасны уджавны тӧждысьтӧг, ӧти-кӧ — челядь оз дӧзмӧдчыны, а мӧд-кӧ — сьӧлӧмыд местаын, буринын олӧны.

Сӧмын сійӧ омӧль, оз на вермы Правительство быд сиктӧ сэтшӧм садсӧ восьтыны, быдтор на миян этша, да чайтам, регыд сійӧ бырӧ; коми нывбаба босьтчас уджавны — отсавны Сӧветскӧй власьтлы, уджалысь нывбаба понда ёна тӧждысьысьлы.

Велӧдысь.