САДЬМӦДЧЫ, КОМИ НЫВБАБА!

Эн скӧрмы, кор лыддян тайӧ кывъяссӧ, ме тӧда, тэ пыр думыштан: «Дерт пӧ нин, коркӧ эштывлан ӧні узьны, он дугдыв пыр толькӧ ныр вылад усьтӧдз век керан, унджыкыс коли ӧтка морт челядькӧд да пӧрыськӧд, вой и лун уджалан да думайтан, а век ещӧ тшӧктӧны кутшӧмкӧ узьӧмысь садьмыны.» Тайӧ тэнад кывъясыд быдсӧн збыль. Ме тайӧ гижысьыс дзик жӧ тіян кодь пемыд баба, челядя и гӧлиника олысь, но менам босьтчис дум, мый ми кӧ кутам тадзи овны, толькӧ тӧдны ас гӧгӧрнымӧс, ассьыным челядьясӧс да гортӧс, ми дзик нинӧмӧ воам.

Вайӧ жӧ ӧтувтчамӧй тшӧтш мужикъясыскӧд и кутамӧ индавны найӧлы, кыдзи эськӧ лоӧ лӧсьыдджык и регыдджык лӧсьӧдны олӧмсӧ. Ми частӧ аддзам, мый правитысьясыс вӧчӧны неладнӧ, и видам власьтсӧ, а ме ӧні кыдз ачым куті тшӧтш накӧд уджавны и лыддьыны, кыдз тшӧктӧ законыс вӧчны, вӧлӧм власьтыс дзик абу мыжа, а мукӧд йӧзыс асьныс сідзик уджалӧны. Вот мед эськӧ водзӧ неладнӧсӧ эз кутны вӧчны и олӧмсӧ регыдджык кокньӧдны, ӧтувтчамӧй и кутамӧй быдлаӧ пуктыны тшӧтш нывбабаӧс и кутамӧй индавны, кыдзиджык эськӧ лӧсьыдджык лоӧ овнысӧ миянлы и миян челядьлы. Оз кӧ кутны тіянӧс лэдзны мужикъясыд Исполкомъясад и кутас кӧ кодкӧ ӧбӧдитны, гижӧй карӧ Уженотделӧ, сэтӧні тіянлы отсаласны быд шогысь. Гижнытӧ тшӧктӧй школьничаясӧс; ӧні быд ныв дас кык арӧссянь кужӧ гижны комиӧн. Ме быд вӧлӧсьтсянь кута бабаяссянь виччысьны ӧтвет тайӧ гижӧмыс вылӧ и водзӧ кута тіянлы гижны.

Висьталӧ и юалӧ быдтор.

Выль морт.