ВА ВОССЯС — УДЖ ВЕЖСЯС

Таво тӧвбыд быдлаын муніс леснӧй заготовкаяс, лэдзисны вӧр, кытӧн мыйта вермисны. Воис тулыс — вӧр лэдзсис, ковмас думыштлыны сійӧс кылӧдӧм йылысь.

Тӧдны колӧ, мый ӧні Англия миянкӧд сӧгласитчӧма тӧварӧн вежлавны. Миянсянь медся ёна ковмас вӧр, вӧр кӧ ог вермӧ сетны — миян бара на нинӧм оз ло. Сы понда быд пу дона, быд пу колӧ воштыны местаӧдз.

Вӧр кылӧдӧм удж кутасны нуны гырысь йӧз, а том йӧзыс ог жӧ кутӧ кольччыны да бокисянь видзӧдны, нинӧм абутӧмнас ӧд миянлы гырысьяссьыс на лёк олӧмыс. Сы понда ми тшӧтш кыдзи мый вермам, сідзи и кутам отсавны.

Вот кӧть босьтам пуръясьӧм, разалӧм, паськалӧм кер чукӧртаныд, кляч песаныд, тувъяс вӧчаныд и мукӧд пӧлӧс удж. Сэтшӧм уджъясас позьӧ и колӧ вӧчны субӧтникъяс.

Сійӧ отсӧг, дерт, медводзын петкӧдлас да и мукӧдсӧ велӧдас том йӧзлӧн нырнуӧдысь — Союз Молодёжи.

Союзса членъяс! Тіян водзын эм зэв ыджыд уджъяс. Лӧсьӧдчӧ вӧр кылӧдігкежлӧ, тӧлкуйтӧ водзвыв, кыдзиджык мый отсавны. Висьтавлӧ быдлаын йӧзыслы, мыйла вӧрсӧ лэдзӧны, кытчӧ мунӧ, а том йӧзлы — мый колӧ налы керны. Кор воас прамӧй удж пӧраыс — мед вӧлі тӧданныд, мый, кӧні, кыдзи колӧ вӧчны.

Ӧньӧ Ӧлексан