ЫТВА ДЫРЙИ

Тӧвбыд коми войтыр
Вӧрын ёна пессис,
Эз тӧдлы бур ойбыр — 
Сортовка кер лэдзис;

Гажа тулыс локтас,
Муртса на йи вӧрзьӧ,
Юяс дорын зіля
Пуръялӧ нин вӧрсӧ.

Гажа тулыс воас,
Воссяласны юяс,
Юяс кузя помтӧг
Мӧдӧдчасны пуръяс.

Тувсов ваыд паськыд,
Бергӧдчӧны юръяс:
Лун и вой ю пасьта
Шывгӧны кер-пуръяс.

«Гырысь паськыд пуръяс,
Кытчӧ нӧ ті кывтад,
Кодлы нуад вӧрсӧ?
Висьталӧй!.. А? Кылад?»...

— «Кардорӧдз ми мӧдім,
Нимкодьпырысь мунам,
Вӧр пыддиыд регыд
Эмбур воас уна;

Загранича ваяс
Рочмуӧ мый колӧ,
Сьӧкыд, дзескыд олӧм
Регыд бӧрӧ кольӧ.

Война вӧсна миян
Рочму ёна гӧльмис,
Сизим воӧн чирсіс
Эмбурсӧ бур йӧзлысь.

Ӧні лёк йӧз улысь
Уджалысь йӧз петіс,
Гӧрд Армия вӧля
Аслас вынӧн перйис.

Сэсся нуам вӧрсӧ
Пабрик, завод ломтны,
Да кӧрт туйяс миян
Некор мед оз сувтны»...

Уджалӧй жӧ бура,
Кылӧдӧй став вӧрсӧ,
Вӧр пыддиыд тӧвар
Ылі муысь вӧрзьӧ!

Уджалӧй жӧ зіля,
Тулысыд ӧд матын,
Оз кӧ кылав вӧрыд — 
Ставным воам матӧ!

Уджалӧй жӧ зіля — 
Тулысыд ӧд дженьыд,
Мед оз косьмы вӧрныд,
Мый ті тӧвбыд лэдзид!

Уджалӧй жӧ бура,
Кылӧдӧй став вӧрсӧ,
Эмбур доранінӧ
Ыстӧй татысь пессӧ:

Дугдывтӧг мед завод
Ыргӧн, чугун кисьтӧ,
Машинаяс вӧчӧ,
Крестьяналы ыстӧ!

Сувтлытӧг мед кӧрт туй
Быдтор йӧзлы вайӧ,
Пабрик труба вывті
Пыр мед сьӧд тшын кайӧ!