САР

Нёль во сайын,
Кыдзи райын,
Овліс миян белӧй сар;
Кодӧн — пӧрліс,
Ёна сӧрліс...
Ставсӧ аддзис Питер кар.
Война паніс,
Шонді банӧс, — 
Йӧзлы корсис сьӧкыд ноп;
Юис, сёйис,
Эмбур тойис,
«Многи лета» сьыліс поп...
Сылӧн гӧтыр
Вӧлі гос тыр
(Сійӧс тӧдӧ вӧлі сар),
Да Распутин
(Тэ не шути)
Сибдывлісны воча пар...
Лунысь лунӧ
Вӧлі мунӧ
Йӧз син водзын налӧн пир...
Кӧнкӧ ылын,
Война вылын,
Гӧль йӧз кисьтӧ вӧлі вир.
Олӧм йывсьыс
Налы кывсис — 
Быдӧн аддзис, мыйысь кось...
Часыс тыри,
Йӧйыс быри:
Тадзи овны дзик оз позь...
Пӧра мунӧ.
Тайӧ лунӧ,
Нёль во сайын, вӧлі зык...
Югыд дзарыд,
Миян сарыд
Сэксянь Питерын оз шык.
Уна бӧрдысь
Сійӧ бердыс,
Коли поп-дяк да буржуй.
Налы колӧ
Важ кодь олӧм, — 
Тайӧ права пеж, оз туй.
Йӧйыс бырӧ — 
Гуӧ пырӧ,
Мый век сьылад, поп да дяк?
Аслад райӧ
Асьныд кайӧ,
Йӧзсӧ кӧть и он нин ляк...
Тырмас дурны,
Йӧзӧс пурны...
Асьныд корсьӧ кынӧмпӧт;
Энӧ бӧрдӧ, — 
Синмыд бердӧ,
Краснӧй салдат сар оз сет.