КЫЛАННЫД, КРЕСТЬЯНА!

Ми колян №-ын (17ʼ «Удж») гижлім ичӧтика, кутшӧм ыджыд кокньӧд, мися, сетас выль закон — натуральнӧй налог йылысь.

Сы бӧрын, 24-ӧд лунӧ мартын, радио бара вайис юӧр: закон налог йылысь вӧчӧма (утвердитӧма) нин.

Всероссийский Центральный Исполнительный Комитет да Совет Народных Комиссаров, крестьяна вӧсна тӧждысьӧм кузя, ыстӧны быдлаӧ миян Рочму пасьта бур юӧртӧм. Тшӧктӧны лыддьыны тайӧ быдлаын (вӧлӧсьтъясын, деревняясын, пабрикъяс вылын, красноармеечьяс пытшкын), мед став крестьянаыс, став уджалысьыс кывлісны тайӧ, мед ставыс тӧдіс та йылысь.

Ӧні ті, му уджалысьяс, асьныд аддзанныд, гӧгӧрвоанныд, кутшӧм бур сетӧ тіянлы выль закон!

Бура лыддьӧй, онӧ кӧ гӧгӧрвоӧ рочнас, тшӧктӧ велӧдчӧм йӧзӧс комиӧн висьтавны, — та йылысь юӧртӧмсӧ (обращение) ВЦИК-лысь да Совнаркомлысь, кодӧс ми лэдзам талунъя газетын.

Сійӧ юӧртӧм бӧрад уна оз нин и ков гижны: асьныд гӧгӧрвоанныд, — ӧні кӧ онӧ лючки вермӧ ставсӧ тӧдны — бӧрвылас тӧданныд, да ошкыны кутанныд.

Ми шуам зэв ыджыд аттьӧ Краснӧй Армиялы, коді мездіс уджалысь йӧзӧс лёк йӧз улысь! Краснӧй Армия аслас мывкыднас да ыджыд сьӧлӧмнас перйис крестьяналы татшӧм кокньӧдсӧ.

Колӧ тӧдны ещӧ ставыслы: тайӧ законыс абу на век кежлӧ. Кыдзи тай шуӧма сійӧ юӧртӧмад, — налогыд вочасӧн пыр кутас чинны, да-й коркӧ дзикӧдз бырас. Ӧні ичӧтика нянь босьттӧг крестьянасянь Сӧветскӧй власьт оз на вермы овны: колӧ вердны Краснӧй Армияӧс (джынсӧ, мӧд джынсӧ лэдзасны гортаныс, уджавны), колӧ вердны пабрикъясын, заводъясын, кӧрт туйяс вылын уджалысьясӧс да мукӧдӧс, кодъяс олӧны му уджавтӧг (оз гӧрны-кӧдзны).

Сідз, ми ещӧ шуам: зільджыка уджавны, кокньыдджыка овны, ёнджыка эмбур содтыны крестьяналы!

Нёбдінса Виттор.