ЫДЖЫД ТУЙВЕЖ

Тайӧ лунъясӧ миян радио (сутугатӧм телеграф) вайӧ выльысь-выль да бурысь-бур юӧръяс.

Ӧтик — Кронштадт бӧр Сӧветскӧй власьт улын. Ещӧ ӧтчыд петкӧдліс Сӧветскӧй власьт ставмувывса лёк йӧзлы (белогвардеечьяслы) ассьыс ёнлунсӧ. Найӧ эз вермыны нинӧм керны косясьӧмӧн война вылын, да Рочму Республикатӧ пытшсяньыс торкны кӧсйисны.

Колӧ быдӧнлы гӧгӧрвоны, Сӧветскӧй власьт нинӧмысь и некодысь оз повзьы: сійӧ ёнмис нин. Став врагсӧ вермас. Коді кӧсъяс торкны сылысь удж вылӧ кутчысьӧмсӧ, быдӧнкӧд вермас водзсасьны, быдӧнлысь пиньсӧ (кыдз шулӧны) кисьтас.

Мӧд — Польшакӧд мир кырымалӧма. Дыр нюжаліс мир йылысь сёрнитӧм. Пыр озыръяс (капиталистъяс) торкисны, мед эськӧ эз ло Россиялӧн Польшакӧд мир. Нинӧм эз вермыны керны. Кӧть ыджыд уступка Россия вӧчис тайӧ мир вӧсна, но колӧ тӧдны: мирыс, бура олӧмыс йӧз костын донаджык быд уступка дорысь.

Ӧні став йӧзыс нин гӧгӧрвоас — Россия пӧ оз каттьысь война вылӧ, оз думайт мукӧд йӧзлы лёк вӧчны.

Коймӧд — Англиякӧд вӧчӧма тӧрговӧй договор. Тайӧ пӧшти во кыссис. Быд ногӧн сідз жӧ озыръяс кӧсйисны торкны, да нинӧм жӧ эз вермыны керны. Ӧні сэсся дзикӧдз нин бырӧ Россия гӧгӧрысь кытш (блокада). Кутас воны миянӧ быдсяма пӧлӧс тӧвар ылі муысь.

Сэсся Турциякӧд вӧчӧма мир.

Ставыс тайӧ висьталӧ: Сӧветскӧй власьт ёнмис, озыр (буржуазнӧй) государствояс нин сыкӧд лыддьысьӧны (признайтӧны).

Ӧні став Республика пасьта колӧ сӧмын уджавны дай уджавны — мед миян ӧдйӧджык, регыдджык кыптас оланногыс да содас эмбурыс. Сэки Кронштадт кодь бунтъяссьыд оз ковзьы повны, оз лысьтны сэтшӧмъяссӧ вӧчны.

Уджалӧмӧн толькӧ ми вермам петны татшӧм дзескыд олӧмсьыс.

Ми ӧні сулалам ыджыд туйвежын, быдтор быдласянь миянӧ кутас воны.

Мунӧй бур уджнаныд паныд эмбурыслы!

Агас.