ПАРИЖСА КОММУНА

Буретш ветымын во сайын талунъя лунӧ (18 марта 1871 воын) Франция столичаын — Парижын — гӧль йӧз ас киас босьтісны и восьтісны коммуна. Сэки первой на уджалысь йӧз ас киас вермыліс власьтсӧ босьтны, мед войдӧр на аслас олӧм вылас ачыс ыджыд лои.

Ас киас власьт босьтӧм бӧрын Парижса уджалысь йӧз пондісны ӧтвылысь олӧм лӧсьӧдны, став йӧзсӧ кутісны ӧткодявны.

Но эз кузь нэма вӧв Парижса коммуна. Сійӧ вӧлі сӧмын ӧти карын — Парижын. Озыръяслы, тӧдӧмысь, эз вӧв сьӧлӧмсьыс уджалысьяслӧн власьт. Став Франция пасьталаас буржуйяс пиньсӧ йиригтырйи организуйтчисны, вомсьыс быг петӧ локтісны Парижса уджалысь йӧз вылӧ, Парижса коммуна вылӧ.

Париж кар кытш пиӧ босьтісны. Грымгыны кутісны пушкаяс. Дыр косясис Парижса уджалысь йӧз, эз кӧсйы муса коммунаас пеж капиталистъясӧс лэдзны. Но эз тырмы вын-эбӧсыс: ёна на вынаӧсь вӧліны буржуйяс, ёна на нэр вӧлі коммуна. Уджалысь йӧзъясӧс виаліг, шойяссӧ таляліг пырисны Парижӧ кыз рушкуа буржуйяс.

Комын сюрс (тысяча) коммунаръясӧс «без суда и следствия» лыйлісны-ӧшлісны зверӧ пӧрӧм буржуйяс. 40 сюрс сюйисны тюрмаӧ, ыстісны катарга вылӧ. Тадзи уси Парижса коммуна. Сійӧ оліс сӧмын кык тӧлысь.

Со мый вӧсна ми празднуйтам Париж Коммуна восьтан лунсӧ.

Ыджыд нималӧм Парижса коммунаръяслы!

Визь.