КЫВ ТУЯЛЫСЬ, ЙӦЗӦС ГАЖӦДЫСЬ...

1999 вося кос му (апрель) 13 лунӧ коми филология наукаын лоис ыджыд воштӧм. Кувсис кыв туялысь Владимир Александрович Ляшев, кодлы эськӧ тавося урасьӧм (февраль) 7 лунӧ тыри 60 арӧс. Владимир Александрович вӧлі тӧдчана специалистӧн коми диалектологияын, кыв велӧдан методикаын, дзоньнас коми кыв туялӧмын. Учёнӧй экспедицияясӧн кытшовтіс став Коми мусӧ. Торйӧн нин унаысь да дыр ветлӧдліс Емва бокса сиктъясын. Экспедицияясын да научнӧй командировкаясын чукӧртӧм материалсӧ йӧзӧдӧма 60 сайӧ статьяын. Петаліс и некымын небӧг да кывчукӧр.

Научнӧй корсьысьӧмъясысь ӧтдор Владимир Ляшев лыддьыліс лекцияяс школаса учительяслысь профессия кыпӧдан институтын (ИУУ), нуӧдліс торъя курсъяс Сыктывкарса, Ижевскса, Будапештса университетъясын, Коми пединститутын, школаясын. Вӧчліс научнӧй докладъяс уна конференцияяс да конгрессъяс дырйи. Научнӧй да педагогическӧй уджысь 1997 воын В. А. Ляшевлы сетісны «Йӧзӧс велӧдӧмын зэв бур уджалысь» почёт ним да «Уджвывса ветеран» медаль.

Ыджыд пай пуктіс Владимир Александрович рочьясӧс да мукӧд кывъя войтырӧс коми кывйӧ велӧдан небӧг лӧсьӧдӧмӧ. Учёнӧй пыр вӧлі дась отсавны том методистъяслы бӧрйыны колана литература, научнӧй статьяяс.

В. А. Ляшев чужліс Визин сиктсӧветувса Кольёль грездын. 1960 вося гожӧмын помаліс Визин сиктса шӧр школа да сійӧ жӧ арнас пырис велӧдчыны Коми пединститутса филология факультетӧ. Диплом босьтӧм бӧрас том учитель сӧмын тӧлысь-мӧд и уджыштіс Позтыкерӧсса кӧкъямыс класса школаын — босьтісны армияӧ. Служба вывсьыс воӧм бӧрын (1965 вося моз (август) недыр уджыштӧма Пычимса кӧкъямыс класса школаын, а сэсся босьтӧмаӧсь ВЛКСМ Коми обкомӧ инструкторӧн. 1967 моз (август) 28 лунсянь В. А. Ляшев бӧр вуджӧма учитель уджӧ — Шошкаса кӧкъямыс класса школаын велӧдіс нёль во, 1971 воӧдз.

Чужан кыв пыдісяньджык тӧдны кӧсйӧмыс чуксалӧма велӧдчыны водзӧ. Пырис Москваса языкознание институтӧ (1971–1974 вояс). Диссертациясӧ дасьтіс да гижис профессор В. И. Лыткин юрнуӧдӧм улын.

«Фонетико-морфологические особенности вымского диалекта коми языка» филология наукаясса кандидат ним вылӧ диссертациясӧ Владимир Александрович дорйис 1977 вося йирым (октябрь) 17 лунӧ Тарту карса (Эстония) университетын.

Авъя морт, учёнӧй, бур ёрт колис йӧз паметьӧ нӧшта бур баянистӧн. И студентъясӧс гажӧдліс, и удж ёртъяссӧ, и гортсаяссӧ. Торйӧн нин ёна — радейтана челядьсӧ.

Кыв туялысь учёнӧйӧс 60 вося юбилейӧн пасйыштӧмыс лоӧ мортсӧ став бурсьыс аттьӧалана казьтыштӧмӧн.