ВУДЖӦДЫССЯНЬ

Рая Бартенскӧд вичмис уджавны бӧръя восӧ ӧтлаын, ӧти кафедра вылын, кывзі сылысь коми да удмурт кывъяслӧн артмӧм да сӧвмӧм йылысь спецкурс. Тайӧ нывбабаыс важӧн нин туялӧ коми кывнымӧс, а сідзжӧ и коми йӧзкостса поэзия да литература. Сёрниясын юасьлывлі, мый медводз кыскӧ сійӧс комиӧн став гижӧмасьыс? Вочавидзис дженьыдика — Иван Куратов. Ме и ачым медвылӧ пукта тайӧ коми генийсӧ, Сыктыв вожысь жӧ петлӧм мортсӧ, ассьым землякӧс. Таӧдз нин тӧдлі, мый Р. Бартенслӧн петаліс И. Куратов да Ен йылысь гижӧд, 1990 воын. Окота лои комиӧдны гижӧдсӧ, медым эськӧ лыддис сійӧс гижысь и критик, коми кыв велӧдысь и студент. Профессор Бартенслы лои зэв рад татшӧм мӧвпсьыс, отсаліс вуджӧдігас и бӧрас на видзӧдліс вуджӧдӧмсӧ. Сыктывкарын нин Паула Кокконен бара видзӧдліс гижӧдсӧ да стӧчмӧдіс некымынлаті. Ставнысӧ аттьӧала отсӧгсьыс.

Бергӧдчывны кӧ И. Куратов дорӧ, то буретш Рая Бартенс водзмӧстчыліс нуӧдны 1989 вося ноябрын торъя симпозиум, кодӧс вӧлі сиӧма миян медводдза поэтлы. Р. Бартенс серти, И. Куратов финн литература дорӧ медся матысса гижысь, сійӧ гижис и оліс ӧти кадӧ Алексис Кивикӧд, финн поэзиялы подув пуктыськӧд. Нӧшта тӧдчӧдіс, мый И. Куратовлысь кывбуръяссӧ тырвыйӧ гӧгӧрвоны вермас сӧмын бура велӧдчӧм морт (мифология, религия, философия тӧдысь). Тайӧ пӧ коми литератураын збыльысь интеллигент-поэт, кодлысь кывбуръяссӧ ковмас туявны уна дас во на.