УДМУРТЪЯСЛӦН МЕДВОДДЗА БИЧЕТ

1998 вося гожӧмын орчча Удмурт муын, Ижкарын петӧма терминъяс лӧсьӧдан да гижанног бурмӧдан сэтчӧс комиссиялӧн I номера юӧр гижӧд, удмурт ногӧн бичет. Медматыс рӧдвуж войтырлӧн кыв сӧвмӧм йылысь миянлы зэв ёна колӧ тӧдны, ӧд унатор позяс босьтны орччӧн олысь гижӧд кывъяслы ӧта-мӧдсьыныс. Кыв историяысь тӧдса, мый кызьӧд воясын на кывбур кыв вуджліс миянлы удмурт сёрниысь. А мыйла ӧні оз позь озырмӧдны ас кывъясӧс татшӧм ногӧн тшӧтш?

Юӧр гижӧдыс вель ыджыд йӧрыша, сэні 118 лист бок, йӧзӧдӧма мича кабала вылӧ кык (удмурт да роч) кыв вылын.

Медтӧдчана юкӧныс миянлы юӧр гижӧдас — выль вӧзъян кыввор. Сійӧс сетӧма аслыспӧлӧс ногӧн, медводз роч кыв, сэсся вежӧртассӧ гӧгӧрвоӧдӧм, сэсся сы бӧрын удмурт кывъяс вӧзйӧм. Шуам, гражданин (Гражданинъ «житель города» — лицо, принадлежащее к постоянному населению данного государства, пользующееся его защитой и наделенное совокупностью политических и иных прав и обязанностей) кунмурт.

Вайӧдам ӧткодьсяма выльӧн вӧзйӧм кывъяссӧ, кодъяс серти миянлы позьӧ тшӧтш лӧсьӧдны выль кывъяс либӧ найӧ миян эмӧсь нин. Со найӧ:

работник — меда,

благословение — бурсизён,

братство — вынлык,

Верховный Совет — Вылӥ Кенеш,

герб — кунпус,

государство — кун,

гражданин — кунмурт,

гражданство — кунмуртлык,

кадры — ужмуртъёс,

календарь — дырпус,

коренной народ — выжы калык,

минерал — муиз,

минеральная вода — муиз ва,

наука — тодос,

недра земли — мупушкес,

нефть — мувӧй,

память — йырсазь,

пошлина — вузвыт,

правило — индылэт,

Правительство Удмуртской Республики — Удмурт Элькун Кивалтэт,

предисловие — азькыл,

предпринимательство — ужбергатон,

предприниматель — ужбергатись,

Президент — Азьмурт,

приговор — пумкыл,

республика — элькун,

самолёт — аслобет,

свидетель — аӟись,

система — сӧзнэт,

символ — тодмет,

столица — шоркар,

ценник — дунпус,

янтарь — изсир.

Кыдзи аддзам, вель уна вӧзъян кыв миянкӧд дзик ӧткодь. Мӧд боксянь, на ног тшӧтш позьӧ лӧсьӧдны-ладмӧдны миянлы бура лӧсялана канморт — «гражданин», канмортлун — «гражданство», уджайӧз — «кадры», муиз — «минерал», муизва — «минеральная вода», тӧдӧс — «наука», уджбергӧдысь — «предприниматель«, Водзморт — «Президент» кывъяс.

Позьӧ некымын торъя кыв веськыда босьтны удмуртъяслысь: элькун — «республика», сӧзнӧт — «система», тӧдмӧт — «символ». Ӧд, шуам, уна сё кыв эстъяслӧн гижӧд кывйӧ пыртӧма вӧлі ас кадӧ суоми кывйысь. Тадзи жӧ позьӧ босьтны кывворсӧ удмуртъяслысь тшӧтш и миянлы.

Ӧти кывйӧн кӧ, Удмурт муын петӧм медводдза бичетыс петкӧдлӧ миянлы рӧдвуж кывъяслысь ӧткодь сӧвман нырвизьсӧ. Кывворыс налӧн тшӧтш паськалӧ-сӧвмӧ, корсьӧ вынйӧрсӧ ас пытшсьыс. Медколана-тӧдчанасӧ на уджысь миянлы колӧ босьтны.