«ЫДЖЫД МОРТЛӦН» ЛОКТӦМ
Том зонмӧн на Питирим Александрович Сорокин мунліс Коми муысь велӧдчыны да велӧдны. Роч муӧ. Сэсся и водзӧ. Мунліс эз аслас кӧсйӧм серти. Сійӧс, уна мукӧдъяскӧд тшӧтш, коммунистъяслӧн режим вӧтліс йӧз муӧ, кӧні лоис нималана социологӧн, США-ын мир пасьтала тӧдса школалы подув пуктысьӧн. Ас чужан муас, Римьяын, Гамын да Туръяын сы йылысь некор эз вунӧдлыны, пыдди пуктӧмӧн нимтылісны «Ыджыд мортӧн». Сӧвет власть кадӧ республикаын ыджыдалысьяс вӧчлісны ставсӧ, медым коми войтыр эз тӧдмав П. Сорокин йылысь и нинӧм сы йылысь эз помнит. СГУ-ын вит во чӧж велӧдчигӧн ме сӧмын кыкысь и кывлі нималана философ да социолог йылысь. «Научнӧй коммунизм» велӧдігӧн зэв дженьыда, пырмунігмоз нимтылісны Сорокинӧс кыдзи «США-са империализмлысь тӧдчана идеологӧс».
Зэв бур, мый кадыс тайӧ вежсис, и ӧні эм позянлун пыдіа тӧдмасьны П. А. Сорокинлӧн олӧмӧн да уджӧн. Коми лыддьысьысьлӧн ӧні лоӧ позянлун лыддьыны сылысь автобиографиясӧ чужан кыв вылын. Рочӧн йӧзӧдӧм небӧгыс вывті дона (33 шайт) да ӧдвакӧ паськыда разалас, торйӧн сиктъясӧ.
П. А. Сорокинлӧн автобиографияын 5 юкӧн, кодъяс пиысь коми йӧзлы медся интереснӧйӧсь медводдза куимыс, кӧні сёрниыс мунӧ Россияын олӧм йылысь сылӧн Чехословакияӧ мунтӧдз. Коми войтырӧс П. Сорокин лэптӧ зэв вылӧ, дженьыда да стӧча висьталӧ нэмӧвӧйся коми оланног да ӧбича йылысь. Сылӧн серпасалӧмыс вужвыйӧ торъялӧ К. Жаковлӧн видзӧдласысь (кутам тӧд вылын сылысь
П. Сорокин асьсӧ оз шу ни комиӧн, ни рочӧн, кӧть быдлаын мыйлакӧ шуӧны «роч» философӧн. Но падъявтӧг сійӧс позьӧ лыддьыны Коми мулӧн пиӧн.
«Кузь туй вуджӧм» автобиографияысь юкӧнъяссӧ ме комиӧді английскӧй кыв вылын лэдзӧм книгаысь, коді петавліс Америкаса Нью-Хейвен карын 1963 воын.
