КОМИ ГИЖЫСЬЯСЛЫ

Кӧнӧсь ті, коми гижысьяс, кытчӧ ланьтінныд, оз тыдавны гижӧдъяс тіян коми газетын, оз кывны тіян кывъясныд спектакльяс вылын. Кытчӧ ті ланьтінныд, лӧсьыд гижӧдъяс онӧ гижалӧй?!

Кӧні тэ, «Ыджыд мыж», «Гудрасьӧм», тайӧ зэв мичаторъяссӧ гижысь?! Локтісны спектакль вылӧ коми йӧз, жугыльӧсь, очсалӧны. Мыйла нӧ, другъясӧй, жугыльӧсь? Гашкӧ, причча кутшӧмкӧ суис? — Приччаыс суис, дерт, шогъяс зэв уна... но медъёна гажтӧмтчам сы понда: оз гиж нинӧмтор Нёбдінса Виттор, коми йӧзӧс гажӧдысь ланьтӧма.

Тэ нӧ кӧні, Лебедев, медводдза гижысь, комилысь шогъяс да уджъяс гажа сьылӧмӧ пӧртысь? Тэнсьыд коми йӧз виччысьӧ операяс — «Мича ныв» кодьӧсь бурӧс, «Пӧрысь тун» кодьӧсь лӧсьыдӧс, виччысьӧ «Зарни чукӧр» кодь дона мойданкывъяс.

Кӧн нӧ тэ, Колегов Ёгор, комилысь збыль олӧм гижысь, лёк оланногнысӧ петкӧдлысь? Сет коми йӧзлы «Храм праздник» кодь, «Баба песласьӧм» кодьӧс, мед реаля гижӧмторъястӧ лыддяс да шуас: «Збыль ӧд сідзи и эм!»

Коми поэтъяс, тіянлысь коми йӧз виччысьӧ гижӧдъяс. Коми йӧзӧс гажӧдысь Виттор, лӧсьыд сьыланкыв гижалысь Лебедев, коми олӧмлӧн фотограф Колегов Ёгор, гашкӧ ті ыджыдтор гижанныд, сійӧн ланьтӧмныдӧсь, али тіянлысь таланттӧ уджъясӧн эксплуатируйтӧны?!.

Видз.

Кӧні нӧ тэ, Илля Васьӧ? Некор тай нӧ он гижыштлы газетӧ комиӧн.

Кӧні Сандрик Микул?

Кӧні мукӧд коми гижысьяс?

Ставныс ланьтӧмаӧсь, некод нинӧм газетӧ комиӧн оз гиж. Шог, вывті шог.

Сизь.