ТЭД, ИЧӦТ ЗОНКА

Ышмы да ворс тэ ас бур челядь дырыд,
Сійӧ тэн — тувсовъя кад.
Вежӧрыд ясыд, он ов шогсигтырйи,
Мӧвпыдлӧн — сӧдз да бур лад.
Мӧвптӧ став кӧсйӧмнас этша на йӧртан,
Пет сыкӧд кузь туйӧ, пет.
Гулю лӧз бордъяссӧ сылысь эн кӧртав,
Лэбан туй сылы тэ сет.
Йӧз костын висьт эм, сэн збыль нисьӧ сӧрӧм:
Важӧн, зэв важӧн, дитя,
Лэбач, кор ветлӧма йӧз костын пӧрӧс,
Ваяс морт ловзьӧдан ва.
Сійӧс оз повзьӧдны мореяс, крежъяс,
Туй, коді сьӧкыд да кузь.
Вына, ён бордъяснас венас лӧз эрдъяс,
Сьӧлӧмнас сійӧ оз усь.
Сы моз жӧ думъясыд тэнад зэв ылӧ
Лэбасны збыльмӧдны мойд.
Лэбасны, ваясны йӧз шудлун вылӧ
Бурдӧдчан лысвалысь войт.
Тэ дорӧ друг кӧ бедакӧд сэк шоглун
Воас, то сыысь эн пов:
Бурдӧдчан войтнас став мог тэнад могмас,
Кыпыдӧн лоас век лов.
Мӧвптӧ став кӧсйӧмнас этша на йӧртан,
Пет сыкӧд кузь туйӧ, пет.
Гулю лӧз бордъяссӧ сылысь эн кӧртав,
Лэбан туй сылы тэ сет!