Дзолядырйи

Дзолядырйи ставыс ыджыд —

Керка, кильчӧ, жытник, йӧр.

Дзолядырйи ставыс джуджыд —

Потшӧс, сюръя, керӧс, вӧр.

Дзолядырйи ставыс паськыд —

Чалльӧг, ордым, улич, пос.

Дзолядырйи ставыс гырысь —

Кельчи, сьӧла, анькытш, оз.

Дзолядырйи ставыс чӧскыд —

Гӧнян, сёркни, гежень, гум.

Дзолядырйи ставыс уна —

Вӧля, радлун, серам, нюм.

Дзолядырйи ставыс мича —

Бобув, нидзув, лёльӧ, зі.

Дзолядырйи ставыс дивъя —

Шонді, енэж, тӧвру, би.

Дзолядырйи ставыс помтӧм —

Тӧлысь, вежон, весиг лун.

Дзолядырйи ставыс дона,

Сэтысь нинӧмыс оз вун.

Дзолядырӧй ыджыд вӧлі,

Колис дзоляник нэм пом.

Сійӧ век на чӧдъя йӧла,

Сэні век на лыска чом.