* * *

Сер-сер нин лымъя парма лӧскыс,

Но нюдз на Ӧсип керка дін.

Сьӧд пувйыс окыштчӧм кодь чӧскыд,

Дзик сідз жӧ быдсӧн куньлан син.

Дзонь сирӧд конда татысь соті,

Мед йирмӧг сьӧлӧмӧ эз пыр.

Да пувсӧ пестер тырым воті,

Кӧть менам вотӧмӧн эз быр.

Мый колис — сьӧла-тарлы колис,

Лым усьтӧдз олас кын ли сыв.

Йи улӧ пыртӧдз сьылас ёльыс

Дзик менлы вылӧ сьыланкыв.

Код колӧ, эз тай талань волы,

Мӧд ягын, кӧнкӧ, вотчан ді.

Гӧрд пелысь гажаджыка олӧ —

Син водзын сӧмын сылӧн би.