* * *

Краситчис-баситчис тшапитчысь баба моз вӧрыс,

Дзоридза чышъянӧн гыалӧ дорыс и шӧрыс.

Тӧдчӧ на шонділӧн небыдик пывсян кодь жарыс —

Тыдалӧ, воӧма миянӧ майбырыс-арыс.

Номйыс да, лӧддзыс да, гутыс да гӧгӧрысь бырис,

Тшакыс да вотӧсыс ягъясын-расъясын тырыс.

Нопъя да пестера пармаын сиктыс и карыс —

Тыдалӧ, воӧма миянӧ майбырыс-арыс.

Лэбӧны уткаяс, курасьӧ ю весьтын дзодзӧг,

Усьласны тыӧ да лэбӧны кытчӧкӧ водзӧ.

Курасьӧ енэжын асланым варышыс-сарыс —

Тыдалӧ, воӧма миянӧ майбырыс-арыс.

Краситчис-баситчис тшапитчысь баба моз вӧрыс,

Дзоридза чышъянӧн гыалӧ дорыс и шӧрыс.

Дугдісны юасьны, уна-ӧ меным нин арӧс —

Збыльысь тай миянӧ воӧма майбырыс-арыс.