* * *

Нолтӧ, волы, гӧрбуш коса,

Видла тэнсьыд дор да бан.

Часлы, шутёвтам покосӧ,

Ме на первой зонмыс тан.

Коді шензьӧ, медым шензьӧ,

Кутшӧм Габӧ Микит рӧд.

Ставыс мамсянь, ставыс Енсянь,

Сӧмын уджӧн код да пӧт.

Мый нӧ сулалан, крестьянка?

Ноко, бӧрсянь тшӧтш жӧ пет.

Тэ да, ме да чужим тан кӧ,

Эз жӧ дышӧн шуны мед.

Эстӧн — помас — лоас козин,

Сета йӧзсьыс гусьӧнмоз.

Мекӧд окасьнытӧ позьӧ,

Мукӧдыскӧд — ньӧти оз.

Ок и бур жӧ лэчыд коса,

Абу ӧтчыд, кыкысь бур.

Турун регыд сюрас косӧн,

Гӧтыр мед и оз на сюр.