КЕРКА

Керка тшупим-котшкӧдім, котшкӧдім,

Діныс тані, йылыс сэні,

Пожӧм керсӧ котшкӧдім.

Лэчыд черъяс йӧктісны, йӧктісны,

Уклад дора, вӧсни бана

Лэчыд черъяс йӧктісны.

Еджыд чагъяс лэбисны, лэбисны,

Варыш бордйӧн, чикыш бӧжӧн

Кытчӧ гажныс лэбисны.

Срубйыс миян тӧлаліс, тӧлаліс,

Тувсов тӧлӧн, шоныд тӧлӧн

Куим вежон тӧлаліс.

Помеч вылӧ чукӧстім, чукӧстім,

Коді эштіс, коді кӧсйис,

Помеч вылӧ чукӧстім.

Кодкӧ керсӧ матыстіс, матыстіс,

Еджыд яя пожӧм керсӧ

Лэптанінӧ матыстіс.

Кодкӧ керсӧ кыпӧдіс, кыпӧдіс,

Триня-тронякылысь керсӧ

«Раз-два, взяли!» кыпӧдіс.

Кодкӧ сюся нитшкасис, нитшкасис,

Ягвыв нитшкӧн, шабді нитшкӧн

Дас квайт судта нитшкасис.

Керка миян кыпаліс, кыпаліс,

Лунӧ бана, зарни бана

Керка миян кыпаліс.

Ваньӧлы да Марьялы — гозъялы,

Томъяслы да, буръяслы да —

Ваньӧлы да Марьялы.

Мед и тані олӧны-вылӧны,

Тайӧ гажа керка помас

Тырыс челядь кылӧны.