* * *

Аттьӧ, пармаӧй — вердысь-удысьӧй,

Сьӧкыд кадъясӧ ловйӧн кутысьӧй.

Эськӧ важӧн нин тэтӧг кулалім,

А со водзӧ на олам-сулалам.

Мыйкӧ вотыштам, мыйкӧ кыйыштам,

Мыйкӧ ӧктыштам, мыйкӧ лыйыштам,

Мыйкӧ косьтыштам, мыйкӧ солыштам —

Ӧттор-мӧдтор тай ставыс колыштӧ.

Дозмӧр борда на стеныс керкалӧн,

Яя шыдӧн на тасьті бергалӧ.

Ог на вижӧдӧй, ог на пыкталӧй,

Ог на вошласьӧй, ог на мыкталӧй.

Водз зэв асывнас век на кыпалам,

Коркӧ нёрпалам, коркӧ гыбалам,

Коркӧ бӧрдыштам, коркӧ сьылыштам,

Нитш под увсьыс моз кӧть да кылыштам.

Аттьӧ, пармаӧй — вердысь-удысьӧй,

Сьӧкыд кадъясӧ ловйӧн кутысьӧй.

Эськӧ важӧн нин тэтӧг кулалім,

А со водзӧ на олам-сулалам.