* * *

Сьылӧ морт, мый шонтӧ сылысь лов,

Мыйысь лӧсьыд сьӧлӧм вылас сылы.

Коми муын горзыны оз ков,

Коми муын горзытӧгыс кылӧ.

Миян вӧрын-ваын векджык лӧнь,

Гашкӧ, сӧмын буавлӧны тӧвъяс

Да лӧз гудырсайса вира вӧнь

Жвиньйӧдлывлӧ сьӧдас биа кӧвъяс.

Коми мулӧн лолӧ пыран гор,

Сэтысь шӧпкӧм турунъяслӧн кылӧ,

Сэтысь кылӧ, кыдзи дзольгӧ шор,

Кыдзи шонді вартчӧ вӧр-пу йылӧ.

Яга ёльын гырысь сэтӧр моль,

Сэтчӧ чукчи галяизла волӧ.

Некор сьӧлӧм сьылантӧг оз коль,

Чужанінад сӧмын овны колӧ.